Гьалабван Р.ХIямзатовла ули­­чил­си Миллатла биб­лио­те­­ка­лизиб ТIал­хIят­хъа­ла маш­гьур­си жинсла вакилти гьан­бир­кахъ­ни­лис хас­ба­рибси балбуц бе­тер­хур. Илала бекI­ли­биубси бу­тIали бе­таур ГIябдуряхIим ТIал­хIят­ла «Пес­ни дар­гинский пред­го­рий» би­кIу­­си ули­чил­си жузличил бучIанти тяниш­бар­­ни­ра.

Сергокъалала районна ХIурхъила шилизибадси ТIалхIятхъала кьамла чумра наслули Дагъиста гIилмула ва культурала тарихлизир мурхьти къел калахъун. Илдани жигарла бутIакьяндеш дирутири политикала ва жамигIятла гIямрулизир, дявила баркьудилизир сархибдешуни диахъуб ва республикала культура гьалабяхI башахънилизи мекелли халаси пай кабихьиб.

Балбуц ибхьули, ДР-ла Миллатла биб­ли­отекала директорла заместитель Сарат Жаб­рагIиловани цалабикибти Дагъиста интеллигенцияла ва­­килти илгъуна мягIничебси гьу­нибаъниличил муба­ракбариб ва ТIал­хIятхъала хъалибаргли республика гьала­бяхI башахънилизи кабихьибси пайличила бу­риб.

ТIалхIятхъала гIямрула, бузерила гьуни че­биахъули, мурхьси мягIнала докладуни делчIун сабира ил машгьурси жинсла вакилтили сабти тарихла гIилмуртала кандидат Фатима ТIалхIятли, РАН-ла ДФИЦ-ла ИАЭ-ла Институтла Дагъиста сагаси тарихла отделлис бекIдеш дируси, тарихла гIил­муртала доктор, профессор Эльмира ТIал­хIятли (ил сарри балбуцла сиптакарчира ва дураберкIес халаси кумек барибсира) .

Дявила, пачалихъла ва жамигIятла-политикала машгьурси хIяракатчи сайливан, ХIямид ТIалхIятличила чебетаахъили буриб Фатима ТIалхIятли. Иличилара газетализиб къантI-къантIли гьанбушес дигахъаси.

ХIямид ТIалхIят акIубси сай 1985 ибил дуслизив. Темир-Хан-Шурализиб училище таманбарили, ил Екате­ри­нославский дубурла институтлизи керхур. Февральла революциялис гIергъи, ил Дагъистайзи чарухъун, ва Уллубий Буйнакъскийла бекIдешлиубси Дагъиста аги­тацияла-багьудлуми тIинтI­дир­нила бюролизи уцибсири. Ил Совет хIуку­мат, социальный бяхIчибизлашал бархьси жамигIят белшес багьандан, ургъули калунсири. Ил Дагобкомла РКП (б) членни ветаурсири. ХIямид ТIалхIятли Дагъиста челябкьла Россияличил барх чебиусири.

Дагъистайзиб Граждан дергъ таман­биуб­­хIели, 1924 ибил дуслизиб ХIямид ТIал­хIятли Генеральный штабла Академия хъараахъурсири, Средняя Азиялизибси басмачестволис къаршидеш дирнила анцIбукьуназир бутIакьяндеш дирутири. 1926 ибил дуслизиб ХIямид Украинализибси кавалерийский 71 ибил полкла командирли ветаурсири. 30 ибти дусмала бехIбихьудличир илини декIарси танкабала бригадилис буйрухъуни дедлугутири. 1927 ибил дусла суратлизиб Белоруссияла дявила округлизиб касибси хIунтIена командиртала суратлизив ХI.ТIалхIят челябкьлализиб маршалтили бетаурти Тимошенкола ва Жуковла мякьлав тIашли сай.

1924 ибил дуслизив ХIямид ТIалхIят Дявила ХIун­тIена Байрахъла орденничил шабагъатлаварибсири.

Машгьурси жинсла вакил сарси, тарихла гIилму мурхьли дяркъурси Эльмира ТIалхIятлира Башир ТIалхIятла гIям­ру­ли­зи­радти баянти гьаладихьиб.

Башир ТIалхIят акIубси сай 1870 ибил дуслизив ХIурхъила шилизив. Ставро­поль­ла гимназия, гIур Петербургла уни­вер­ситетл­а юридический факультет таман­дарили, кавказоведениела шайчиб хIянчи барибсири. Илини Кавказла чумал мез, латыньна, грецияла, францияла, урусла мезани ункъли далутири. Университет та­ман­барибхIели, Вла­дикавказлизив хIе­рирули, ил тамай гIил­мулизи мурхьикиб­сири, декIар-де­кIарти хIялумцIлаби ду­ра­­дуркIутири, Кав­казла дубурлантала гIя­­датунира рур­къутири. Ил лебил Россияла гIил­му­ла чумра цалабяхълизи керхурсири. ГIялим ва багьудлуми тIинтIдиран Б.ТIал­хIятли халкьанала ихтиюртала шай­­чирра хIялумцIлаби дарибтири. Илала хIянчурби ишбархIира Дагъис­та гIилмула ва жамигIятла-политикала бе­туцлизирра мягIничертили кавлули са­ри.

ТIалхIятхъала хъалибаргла музыкала шайчир сархибдешуни диахъубтачила доклад белчIун РФ-ла композитортала Союзла член, искусствоведениела кандидат, РАН-ла ДФИЦ-ла ЯЛИ-ла институтла искусствобала тарихла отделла заведующая Эльмира ГIябдуллаевани.

Пианистка, педагог, композитор Женнет ТIалхIят акIубси сари 1885 ибил дуслизир. Ил Дагъистайзир цаибси хьунул адам ретаур чебяхIси даражала багьуди касибси, гIур — Северный Кавказлизир цаибси хьунул адам композитор ретаурси.

А.Рейзенауэрала фортепианола класс хIясибли Лейпцигская консерватория мургьила медальличил ва консерваторияла лауреатла уличил таманбарибсири илини. ГIергъити дусмазиб ил консерваториялизиб Ф.Ройтерла ва Г.Грабнерла класс хIясибли композицияла курсра хъараахъурсири. 1927 ибил дусличибад 1931 ибил дусличи бикайчи П.И.Чайковскийла уличилси Мя­­хIячкъалала музыкала училищелизир дурс­ри кадирхьутири. Илис гIергъи Женнет ТIалхIят Нальчиклизир хIерриубсири ва илар рузули калунсири. Илини хьулчи ка­бихьибси саби Кабардино-Балкарияла дурхI­нас хасбарибси музыкала школалисра.

Советский манзилла дирижер, РСФСР-ла искусствобала урибси хIяракатчи, ДАССР-ла халкьла гIяртист Жамал-Эддин ТIал­хIят акIубси сай 1960 ибил дуслизив. Нешла бекIдешлиур илини музыкализир сунела цаибти гунзри кацIибтири. Москвала композитортала отделение ва Ленинградла консерваторияла дирижертала отделение ункъли тамандарили, Х.ТIалхIятли гIяхIцад дусмазиб Ленинградла Кировский операла театрлизиб дирижерла хIянчи бариб. Иличила дахъал улкназибра балусири ва кьиматлавирусири, сенахIенну ил мурталра дурала улкнази вашусири гастрольтачил, спектакльтачил. Москвализир Дагъиста литературала ва искусствобала миллатла декадаби дурадуркIнилизиб мекелли халаси кумек барибсири. Ж.ТIалхIят Мурад Кажлаевла музыкаличил бетурхуси «Дубурлан хьунул адам» бикIуси Дагъиста цаибси балетла дирижерли вирусири. ГIямрула бегIлара гIергъити дусмазиб илини сагали акIахъубси «Санкт-Петербург оркестр»-лис бекIдеш дирутири.

ХIера, илдигъунти дунъяличирра ха­бардерхурти адамти сабри ТIал­хIят­хъала кьамла. Илдачила шалати гьанбикуни лебилра даргантала, дагъистанлантала, улкалантала уркIбазир даимлис кавлан.
ГIябдуряхIим ТIалхIятла «Песни даргинский предгорий» жузличил цалабикибти тянишбирули, пергер дугьби дуриб РАН-ла ДФИЦ-ла ИЯЛИ-ла институтла лексикологияла ва лексикографияла отеделла заведующий, филологияла гIилмуртала кандидат Хизри Юсуповли. Нушани жузличила гьалабра бурибсири, ил даргантала культуралис дебали мягIничебси, сунезира халкьла пагьму, дигайла лирика, багъишлаби ва масхурти кадерхахъурси жуз саби. Х.Юсуповли илизирад дарган мезли чумал назму делчIун.

КIинайс гъайбухъун ДГУ-ла профессор, гIилмуртала филологияла доктор, писательтала Союзла даргала секциялис бекIдеш дируси Муса БяхIяммадов, «Дагъиста ши» музейла директор Зумруд Сулайбанова, ДР-ла адамла ихтиюртала шайчивси уполномоченный Запир Алхасов, ДР-ла Халкьла Собраниела депутат Шамил ГIямаров, Дагъиста халкьла поэтесса Аминат ГIябдулманапова, Дагъиста музыкантунала Союзла правлениела председатель Хан Баширов, Дахадаевла районна бекI МяхIяммад ГIябдулкьадиров, Россияла документальный кинола режиссер, «РФ-ла кинематографистунала Союз» ДРО-ла председатель МяхIяммад Сулайбанов ва цархIилтира.

Гъайбулхъутачил къяйли, балбуцличир жигарла бутIакьяндеш дариб Дагъиста халкьла гIяртистка Пирдауз Камаловани, Дагъиста ва Чечняла Республикала халкьла гIяртистка ПатIимат Кьагьировани, пергер далайчи Заур ГIялибековли.

Илкьяйдали нушани балкьаахъурсири халаси ахIенси, ТIалхIятхъала хъалибаргла гIямрулис ва бузерилис хасбарибси выс­тавкара. Иличир гьаладихьира Дагъиста тарихлизи мекелли халаси пай кабихьибти ТIалхIятхъала хъалибаргла вакилтала суратуни, документуни, жузи ва цархIилти материалти. ГIяхIлани халаси иштяхIличил илди хIердирулри, гIилмула, культурала ва политикала машгьурти хIяракатчибала гIям­рулизирадти сагати баянтачила балулри.

Гьайгьайрагу, илдигъунти далдуцуни дурадуркIес хIяжатси саби наслуличи тарихла гьанбикуни даахъес багьандан. Дирхулра, ТIалхIятхъала хъалибаргла мисалли жагьилти Дагъистайс ва Россиялис гIяхIдешуни дирахъес гьуцIбирниличи.

 

Салимат Х1яжиева