Нушала челябкьла чи­зибад ва сели­зи­бад бетаруси или пик­риухъалли, ишхIелила биш­тIати дурхIнани саби ил ал­кIахъуси. Илдас сегъуна бяркъ, сецад багьудлуми де­далра, ил­цадра ил къулай­сили бе­та­рар.

РазихIейэс хIейрар, шимала школабазиб бучIантала сархибдешуни чедиухIели, му­гIяллимтани хIерудиличил алав­буцибти дурхIни дагьрилашал гьалабяхI башухIели.
ХIера, гьанна чумал дус Крас­нопартизанскла урга дара­жала школала мугIяллим ХIя­жиева Насибат Зайпуллаев­на­ни дурхIни районна даражала, республикала кьадрила кон­курсуначи, олимпиадабачи, бел­­чIудилашалти де­кIар-де­кIар­ти абзаначи хIя­дурбирули са­­би. Илала къайгъни дугIли ар­хIе­­дашнира якьинбирули са­би бу­­­­тIакьяндеш дирути бу­чIан­­­­та­ни­ра, илдани дигести сар­­хибде­шу­ни дирахъули са­ри.

Гьалабванра илини балкьаахъурти рурсбани – 9-ибил классла ручIан ХIямидова Зубайдат Руслановнани ва 11 ибил классла ручIан ГIялиева Муъминат ИсмягIиловнани — республикала олимпиадабачир цаэсти мерани дуциб. Буралли, илди рурсбани ишдус бегI гьалар ахIен гьаларти мерани касибти, илдани гьар дус олимпиадаличир жигарла бутIакьяндеш дарили, мерани дурцули бирар. Ишаб ца ишгъуна анцIбукьличилара гьанбушес дигахъаси: Муъминат ГIялиевала пикри саби урусла-дагъиста мезанала отделениелизи карерхес. Иличибли чебиулра нушани рурсила нешла мезличи диги ва иштяхI лерни. Илис гьарбизуни дулгехIе. Лерилра хьулани детерхурли, сарира сунела мугIяллимван багьудлумала гьели релгIуси педагогли ретаурли дигулра.

Ишаб пергер рурсбала мугIяллим Н.ХIяжиевани илдас хасбарили белкIунси назмура гьалабирхьехIе:

Сентябрьла цаибси
Гьала гIебшнила бархIи,
АрацIира разили,
Ну цаэсил класслизи.

ИлхIели наб дехIдихьиб
ГIямру школала бяркъла,
Гьалмагъдеш, жузи, далай
ДуцIра хъярхъси жаняхIлаб.

Гьарахълар саргу итди
Дусми школализирти,
ХIунтIен галстук биршути,
Шула кьимат кайсути.

Гьаннара ну рашулра
Ну ручIуси гIевдухьла,
Гьалабла дила мерра
БицIиб никIа булбулта.

УркIи разибирути
Къайгъичерти дучIанти,
ХIушала пагьмуртачи
Саррагу ну разили.

Шаласи челябкьлалис
Гьуни хIушаб ибхьулра,
Шинишли ил калахъес
Балга-дугIя дирулра.

Пагьмули парчдикIули,
Ахъанайти ахъая,
Гибти багьудлумачил
Лайикьси мер буцая!