Апрельла верхIличибад вецIну ав­ра­­личи бикайчи Словакияла тах ша­гьар Братиславализир мушул­баш­ни­ла шай­чибси Европала чемпионат­ла абзани детер­хур.
Азадли мушулбашнила шайчиб Россияла ва цархIилти дурала улкнала командабазибадти Дагъиста мушлукьябани дайхъала мургьила медальти сархиб.
Европализивра цIакьси виъни чебиахъуси мургьила медаль сархиб 61 килограммла битIакIлизив Россияла командализив вирхIуси Заур Угуевли. Ил Олимпиадала ва кIина дунъяла чемпион ветаурсири, амма Европала чемпион бегI гьалав сай ветаурси.
Братиславализиб мургьила медаль 24 дус виубси Россияла командализивадси Ибрагьим Ибрагьимовлира сархиб (65 кг.).
Дунъяла чемпионни вируси Россияла командализивадси ГIяхIмад ГIусманов (79кг.) Словакиялизив кIина Европала чемпион ветаур.
Мушулбашути хьунул адамти-ургар Дагъистайзир хIеррируси гъану авра дус риубси Екатерина Вербинара Европала чемпионка ретаур.
Дурала улкнала командабазиб мушулбашути кIел дагъистанланнира Европала чемпионатличир мургьила медальти сархиб. МяхIяммад Рабазановли 86 килограммла битIакIлизиб Болгарияла командалис цаибил мер буциб, Даурен Куруглиевли 92 килограммла битIакIлизиб — Грециялис.
ХIябал Дагъиста мушлукьяли цIуба арц­ла ме­дальтира сархиб: Россияла командали­зи­вад­си 97 кг. битIакIличилси МяхIяммад Кьур­­бановли, Беларусьла командализивадси Мя­хIяммадхIябиб

КьадимяхIяммадовли (86 кг.) ва Азербайжа командализивадси ГIус­ман Нур­мяхIяммадовли (92 кг.).
Азербайжа командализивадси Ислам Базаргановлис ва Албанияла командализивадси Залимхан Абакаровлис жармала медальти дикиб.
Дагъаиста азадли мушулбашнила школа Европализиб бегIлара гIяхIси биъни гьатIира якьинбиуб.
«Рахли нушала азадли мушулбашути спортсменти, Дагъиста командаван абзаначи бякьунти биалри, ил команда Европализиб лебтачибадалра чедибиркусири, — викIар нушала мушлукьябала чедибдешличила багьурси Дагъиста БекI Сергей Меликов. — Ил спортла чедибдешцун ахIенну, адамла уркIила гьавла ва яхIла цIакь саби».

ХIяжимурад  Ражабов