Ишди бурхIназиб Ку­ба­чила шилизиб ЧебяхIси Чедибдеш 80 дус бирнилис хасбарибси столличиб теннисли биркьнила шайчибси Дахадаевла районна чемпионат бетерхур. Районна ши­мазибадли гIяхIцад бутIа­кьян­чиби цалабикиб ил бал­буцличи. Гьарли-марли ил баркьуди спортла ва уржибдешла байрамличи шурбухъун.
Абз дураберкIахъес кумекбариб МяхIяч­къа­ла шагьарла Советский районна депутату­нала собраниела председательла замес­ти­тель Р.Таиловли. Илгъуна баркьудила гIяхI­деш­­ли­чирли абзани ункъли детерхур ва че­ди­би­кибтас савгъатуни дедес им­кан­ба­кIиб.
Ила теннис дигантаницунра ахIи, районна шимала бургира цалабикилри. Абзлизиб цаибил мер сархиб ГIяштила шила бекI Рабазан Ибрагьимовли. КIиибил мер буциб СутбукIла шила бекI Кьагьир МяхIяммадовли, хIя­бъибил – Хуршнила шила бекI ГIя­либег Кьурбановли. Теннисли биркьнила шайчибти гIяхIти устадеш лертили уббухъун ГIяштила шилизибадти цархIилти спортсментира. Илдани цаибил ва кIиибил мер дуциб. ХIябъибил мер сархиб кIишантани.
Дахадаевла районна бекIла шайзибадли абзла лебилра бу­­тIа­кьянчиби мубаракбариб администрацияла баркьудлумала шайчивси управляющий МяхIям­мадхIяжи ГIялиевли.
Балбуцличи цалабикибтанира балахъулри спортла далдуцуни дура­дуркI­­­нили ши­мала адамтала ур­жибдеш чIумадирахъули сари или.
«Кубачила шила бекI ГIяб­дусалам Куртаевлисра абзличи хIядурдеш барнилис, ункъли ил дураберкIнилис ва гIяхIти гIяхIял­деш дарнилис халаси баркалла ба­лахъулра. Илала къайгъначил балбуцла гьарил бетуц ахъси даражаличиб бетерхур ва цалабикибтала уркIбазир гIяхIтицун пикруми калун»,—багьахъур шимала бургани.
Командаби шабагъатладирнила баркьудилизир бутIакья­ндеш дариб физкультурала ва спортла Управлениела начальник ГIябдуллагь Керимовли.
«ИшбархIи нуша спортла балбуцлизир бутIакьяндеш дарилицунра ахIи, дахадаевлантала уржибдешла ва улкала хъархIерагардеш багьандан бургъули калунти гIяхIгъубзни гьанбиркахънила баркьудила бикьрумили детаурра. Балбуцла гьарил бутIакьянчини гIяхIти устадеш чедаахъиб. Нуни лерилра командаби сархибдешуни диахъниличил мубаракдирулра», — буриб ГIябдуллагь Керимовли.