Республикаличил барх уржили, гьайбатли ганзбикIули, гьанна хIябцIали дусла асилси бузерила гьуни ахъили саби нушала Дагъиста Халкьла Собраниели. Ил, гьайгьайрагу, нушала республикала парламентла бузериличи пикри бяхIчиаэси сабабра саби.ИшбархIи ил регионна законти далкьарахъуси органнис бекIдеш дирули сари Аскендеров Заур Асевовичли.
ДР-ла Халкьла Собраниели мурталра Дагъистан гьалабяхI башахънила кьялубачил дархдасунти масъулти ахъдурцули дирар. Гьайгьайрагу, илдала бузерила бекIлибиубси бутIали бетарули саби социальный бяхIчибизра. Дагъиста парламентлира ил шайчир алкIути масъулти гьунчидикахъес халаси къайгъи дакIубирули саби. СВО-ла бутIакьянчиби ва илдала хъалибаргуни, бахъал дурхIнала бегIти, ветеранти гIеббуцести тяхIяр-кьяйда далдурцули сари. Дявила хасси балбуцла бутIакьянчибала ва ветерантала къуллукъунала шайчибси Комитет акIахъубти улкала регионтазибад цаибсили бетаурли саби Дагъистан. Гьайгьайрагу, дявила майдайчиб нушала ВатIан балтахъутас кумек гIеббиахънилизиб ил мягIничебси ганзлира бетарар.
Республикала Халкьла Собраниела бузериличила гъайрикIухIели, гьанхIебушес хIерирус нушала дарганти депутатуначилара: ГIямаров Шамил ХIясбуллаевич, МяхIяммадов ХIябибуллагь МяхIяммадович, Булатов ГIусман Шамильевич, ХIясанова Узлипат ГIусмановна ва гIуррара цархIилтира. Илди республикала даражаличир детурхути даргала далдуцуни гIердуцес, нешла мезличил ва миллатла культураличил дархдасунти гьунибаънибачир бутIакьяндеш дарес къайгъилизиб бирар. ИшбархIила замана нешла мез мяхIкамдарес ва гьаладяхI дашахъес ибси масъала челукьусили бетаъниличила иргъули, бархкьябазира ил шайчибси хIяракат гIеббуцахъес къайгъилизиб саби.
Нушазивад гьариллис дигули саби Дагъистан вавалибяхъибси республикали чебаэс. Илкьяйдали бетаахъес багьандан, гьайгьайрагу, адамтала гIямрула шуртIри къулайдиахъести законтала проектуни кьабулдирес гIягIниси саби. Ил шайчиб даим бузуси ДР-ла Халкьла Собрание бархьси гьунчибад башули саби.
Илгъуна разиси анцIбукьличил бархбасахъи, республикала парламент ва депутатуни нушала газетала шайзибадра мубаракбирулра, ахIерси Дагъиста ва дагъистанлантала гIяхIдешлис къуллукъличи каибти цIакьани кIиркадиубли дигулра.
Салимат ГIялиева
