Гьалабван бузерила архIяличил Ахъушала районнизи вакIибси Россияла Федерацияла Федеральное Собраниела Пачалихъла Думала депутат НурбяхIяндов НурбяхIянд МяхIяммадовичличил гьунибаъни бетерхур.
Цалабикибтала гьалав гъайулхъули, депутатли сай Пачалихъла Думализив багьудлуми тIинтIдирнила шайчиб бузуси Комитетлизив узуси, «Цаси Россия» бикIуси партияла член виъни аргъахъиб. Сунела бузерила бетуцлизив вяхIигути масъултачила, илкьяйдали арагIебли улкализирти аги-кьяйдаличила, дявила хасси балбуцла бутIакьянчиби ва илдала хъалибаргуни гIердурцнила шайчиб дурабуркIуси хIянчиличила буриб илини. Н.НурбяхIяндовли цIакьбарили буриливан, Дагъистан бургъантас кумек гIеббиахъути гьаркьяти регионтала къяйлизиб саби. Илини СВО-ла бутIакьянчиби гIеббурцнила чебкад ахъушантани дурабуркIуси бузерилисра баркалла багьахъур.
Депутатли Ахъушала районнизир детурхахъути проектуначилара гьанбушиб: районна духIнар дарибти спортла шайчирти майдунтачила, къулайдарибти школабачила, культурала Юртаначила, амбулаториябачила, дурхIнала унхърачила, адамтас бамсриихъахъес хасдарибти унхърачила, тIабигIятла газ букибти шимачила ва гIурра дахъал къулайдешуначила.
НурбяхIянд НурбахIяндовли РФ-ла Федеральное Собраниела Пачалихъла Думала депутатла шайзибад Баркаллала кагъуртачил шабагъатлабариб дахъал дусмазиб хIялалси хIянчи барибти ва чеалкIуси наслулис патриот бяркъ бедлугнила шайчир сархибдешуни диахъубти жавабла хIянчизартира. Илди-ургаб лебри Ахъушала шила администрацияла бекI Набигуллагь ГIябдулвагьабов, МухIела шила бекI Ислам Муртазаев, Усишала шила бекI МяхIяммадсягIид ГIябдуллаев, Бутрила шила бекI БяхIяммад ИсмягIилов, районна больницала тухтурти Исбат ГIябдуряхIманова, Жарият ГIяйсаева, Бутрила школала директор Ибрагьим Ибрагьимов, Хадижат МяхIяммадгIялиева, Англияла мезла учительница Татьяна ГIябдуллаева, ДЮСШ-ла тренер Шамил ГIялиев, Усишала кIиибил школала директор СягIида МяхIяммадова ва цархIилтира.
Ил бархIи депутатли челукьути масъултачил сунечи дугьабизурти адамтира кьабулбариб.
Цугнила шилизибси амбулаториялизив тухтурли узуси Рабадан Рабадановли хутIличил гIеббурцниличи, илала ибкьдеш (напряжение) хIебиъниличи пикри бяхIчиаахъиб.
ХIинтIала шила бекIла къуллукъуни заманалис дузахъуси Зубайдат БяхIмудкьадиевани тиладибариб ФАП-лис сагаси юрт лушнишла масъала гьунбиркахънилизиб икьалабарахъес. БусягIятла замана ФАП мерлабиубли саби шила администрацияла Юртлизиб.
ТIебекмахьила шила бекI МяхIяммадсалам ГIялиев биалли, шила халкьла шайзивад умути шинничил адамти гIеббурцнила масъала хIекьлизив дугьаизур.
Депутатли лерилра ахъдуцибти масъулти хIерудилиу касес, илди лайикьси даражаличир гьунчидикахъес вирусигъуна кумекбарес, санигIятлашал хасти ведомствобазир илди хIердарахъес икьалабарес чесиб.
С.ГIябдуллаева
