Адамтани дурути хабурти ва чедиахъути фильмаби хIясибли, инсаниятлис гьалабяхI башахъес дирглабулхъути убяхIти адамтира мурталра камбирути ахIен. Бурули бираргу, халкь хIябал кьамла бирути саби или, адамтала, хурала ва умхIала. Вайнукьабала кьамла саби викIес вируси илди хурачибра умхIачибра убяхIти биалли. Жанивартала гьалаб къачагъуни, вершаби, кIибяхIянти, усал гъубзни,… азирнали убяхIти ва урехилати саби викIалра хатIа бетхIерар. Жанивартани чула мицIирагла бетуц хIясибли сари уркIецIиагардешла баркьудлуми дурадуркIути. БегIлара убяхIси баркьуди саби адамли балу-балули вайти анцIбукьуни дурадуркIни. Илдигъунти вайберхуни улкалис ва халкьлис къияндикибхIели имцIали дакIубулхъули бирар. ЧебяхIси ВатIа дергъла замана къачагъунани дурадуркIути жанивардешличила наслубани хъумартес бирули ахIен.
Дагъиста ванзаличибра илдигъунти усал гъубзни алкIули биъни дебали хIейгеси анцIбукь саби. Гьар мерличибван Дахадаевла районнизибра илдигъунти вершаби, къачагъуни, чеббалкIунти камли биалра, буили саби. Илди сабри ЧебяхIси ВатIа дергъла замана вацIурбази дигIянбикили, чула дагьри агниличибли вайбаркьуни дурадуркIули хIербирути гIела-гьалакабухъунти усал гъубзни. Политикализи ахъибти-ургабра вершаби камбирули ахIен. Илдани имцIали бекIдеш дирули дирар къачагъунас. ГIяхIгъубзнани ВатIан багьандан гIязиз жан кьурбандирухIели ва бухънаби, хьунул адамти, дурхIни тыллизиб дуги-хIери хIеили бузухIели, къачагъуни усалти баркьудлуми дурадуркIес даимбиубтири. Илдани колхоз-совхозунала ва адамтала лебдеш хъямбирусири, гьункьябала ризкьи ва цархIилти дуку-дужути керисутири, гIяйибагарти адамти кабуршутири. Илдигъунти нясти адамтани челябкьла се сабил хIебала ва ВатIа чебяхIдешла мягIничебдеш хIергъу. Дургъби дехIдихьили тамандиайчи, илдигъунти убяхIтани дубурла шимазибти халкьлис дахъал балагьуни дихули кали саби. Дахадаевлантани сеннира хъумхIерту илдани уркIецIиагардешличил кабушибти гьарли-марти дубурланти ва патриотуни районна Госбанкла управляющийли итхIели узуси Абумуслим Бабаев, ДугIахъарла Ворошиловла уличилси колхозла председатель СягIид МяхIяев, «ВЛКСМ-лис 10 дус» ибси Урагъила колхозла парторганизацияла секретарь Александр (ГIябдуллатIип) Майсиев, Млотовла уличилси Кьункьила колхозла парторганизацияла секретарь ГIямар ГIялиев ва цархIилти гIяхIгъубзни. ВКПб-ла Дахадаевла райкомла секретарь Ацци ГIябдуллаевличи ва НКВД-ла РО-ла начальник Расул ГIямаркьадиевличи къаршили хIилла дураберкIесра кьасбарили буили саби илди усал гъубзнани. Амма Ахъушала районна истребительный отрядла гIяхIдешличирли илди гIяхIгъубзнала жан дерцахъибтири.
ИтхIели чумал кьукья лертири районнизир. Илди-ургаб «Террорист» бикIусира лебри. Илцадра чули дурадуркIути уряхIти баркьудлуми дархьтили чедиути илди вершабани илгъуна у бихниличиблира багьесли саби илди чихъали сабил. Терроризмала хIячми итхIели тамай агархIедарибхIели, ишхIелла манзиллизибра чузир итди кIарзабала хIи дургъути къачагъуни даршути адамтачи къаршили, дигIяй бургъули саби.
Илдала чумра жанивардешла баркьудила бикьрумили детаурра кьалли нуша гIергъиси заманара. 1999 ибил дусмлизир илдани даршути халкьличи дяхIчиаибти уряхIти баркьудлуми, гIядлу-зегъа далтахъути органтала хIянчизарти ламартдешличил кабуршни, школабачи, больницабачи ва бахъал адамти цалабиркути цархIилти объектуначи чебулхъни ва цархIилти жанивардешли инсаниятла дагьриличи вайлашал асархIебарили хIебалта. Адамти кьяркьтили ва чичилра хIебирхутили бетарахъу.
Къачагъунас чула «пагьмурти» чедиахъес гIяхIси бетуцли детаурли сари Украинализир кадиркути дявила анцIбукьунира. Илдала адамтала дагьриличи халаси асар бирути нясти ва уряхIти багьахънибачи бирхарутира камбирули ахIенгу. Хаслира дурхIначи ва жагьилтачи илгъуна бетуцли асарбирни децIагесил анцIбукь саби.
Бархьси саби, илди улкала вершабани дурадуркIути баркьудлуми диъни балулра, амма нушани хъумартес асухIебирар илдигъунтачи къаршиси дявира бузахъес хIяжатли биъниличила. Нуша-ургаб камли ахIенгу ахIерси ВатIан багьандан гIязиз жан кьурбандарес хIядурти патриотуни. ХIебиалли, чеалкIуси наслула гIямру агъуладарахъес илдас имканти хIедиахъес багьандан лебилра жамигIят цабиэс ва къаршили дурабухъес хIяжатси саби.
ПатIимат Кьурбанова
