Ахъушала районна СирхIяла Уржагьи шилизивадси Социалист Бузерила Игит Рабаданов Рабадан Рабаданович акIубси сай 1933 ибил дуслизив.
1952 ибил дуслизив Р.Рабаданов ВатIайс къуллукъбарахъес гIяскуртази живарибсири. Амма арадешлизиб нукьсандеш лебни багьандан, хъули чарварибсири.
1953 ибил дусличивад 1958 ибил дусличи бикайчи Дербентла районнизибси К.Марксла уличилси совхозлизив тIутIи дурчули узули калун. ГIур Мамедкъалализи гечвиубхIели, ГIялиевла уличилси совхозлизив узули калун.
Бузерилизир дахъал сархибдешуни диахъни багьандан чумал медальличил ва ХIурматла Грамотабачил шабагъатлаварибси сай. ВДНХ-ла арцла медальличира лайикьвикили сай, Р.Рабадановличила Дербентла районна ХIурматла жузлизира у каберхахъур. Дербентла районна КПСС-ла райкомла членнира калун, ил районна — депутатунала Советла депутатлира.
1966 ибил дусла апрельла 30-йчиб Рабадан Рабадановлис СССР-ла Президиумла Верховный Советла ХIукму хIясибли, Социалист Бузерила Игитла у бедибсири, Ленинна орденничил ва мургьила «Миршра кьякьра» бикIуси медальличил шабагъатлаварибсири, духълумала, тIутIила сабухъ имцIабиахъес багьандан Р.Рабадановла къайгъни ва Дагъистан гьалабяхI арбукес бузерила пай кабихьни кьиматладарили.
С.ГIябдуллаева
