Хъярбукан рурси Зугьра Кьадирбекова МяхIячкъалализир акIубси ва хIеррируси сари. Илини сунела гьунартачил алавти адамти тамашабирахъули сари.
Илини чеббикIибси спортла жура гIядатласи, цархIилталайчи мешуси ахIен. Зугьрани «Киокушинкай» бикIуси спортла бетуцлизир гIяхIцад сархибдешуни дирахъули сари. Ил спортла журализи ахъибсири дурхIнала анхълизи рашес рехIрихьибхIелил.
Дагъистайзиб спортла джутайдо бикIуси жура машгьурбиубхIейчирад илцад-декIар дахъал дусми ардякьи ахIен, амма илизи ахъес дигути дурхIнала лугIи бархIиличи-бархIи имцIабикIули саби. Ила рашухIелира Зугьрани гIяхIцад чедибдешуни сархиб, илдас бикьридеш дирули сари илини сархибти медальтани ва грамотабани.
БусягIятла замана Зугьра Кьадирбекова 50 ибил школала 4-ибил классла ручIан сари. Спортлизирцунра ахIи, ил белчIудилизирра ункъли бажардириркули сари. Дарган мезла дурсри илис дебали дигахъу ва бегIтала мез ункъли дала. Илала дудеш МяхIяммадхIяжинира, неш ХIяванира, хала неш Марзигетлира халаси къайгъи бирули саби рурсилизи нешла мез дагьахъес, дяркъяхъес.
РиштIахIейчирад спортличи акIубти диги Зугьрала бархIиличи-бархIи имцIадикIули сари викIалра, хатIа бетхIерар. Илала декIар-декIарти абзаначир бутIакьяндеш дарили, сархибти 21 грамота, бяхIлизи даршили гIяхIцад медальтира лер. Леб тамашала ирира, илизи рурсили, сархибти чедибдешуни делкIи сари. ИмцIатигъунти анцIбукьуназир, илини цаибти мерани дурцули рирар.
Зугьрала тренер ХIябиб БяхIмудовли илис спортла шайчиб хасси бяркъ бедес ва илизи, ил лугIилизиб – цархIилти дурхIназира, абзаначиб чедибиркахъес гъира-иштяхI имцIадиахъес къайгъи дакIубирули сай.
Зугьрала халати кьасани-хьулани лер, ил спортлизир гьаларяхI рашес дигули сари: Дагъистацунра ахIи, арагIебли Россияла чемпионка ретаэс. Илала пикруми-кьасани детурхниличи нура чIумали рирхулра, сенахIенну илала хIулбазир спортличи халати дигира иштяхIра чедиухIели.
Гьаларван иличил къарширикибхIели, рурси Грузиялизи рукьесра хIядуррикIниличила багьурра. Илар детурхути абзаначирра Зугьрас нушани сархибдешуницун дулгехIе. ГIуррара дахъал шагьуртази риур ва гьатIира халати гьунарти сарху нушала хабарла хъярбукан рурсили.
Зугьра
Дурхъаси дудешлара
Нешла хала нешлара,
Уми дихулри хIуни
Ил багьандан регIлара
Лебтазир духусири.
Спортлизирра рялхъяри
Медальта бяхI баршилри,
ХIукIун гьанна риштIалри
Халабаибтачирра, марлира, хабарлари.
ГIямрула бархьси гьунчир
Рашес бурсириубри.
Зугьра, хIела гьунарти
Дурули сар медальта,
Илди дяркъес гьамадли
АхIен, ну мукIурлира.
Илцад гьамадли хIуни
Сархибти хIедиалра.
ХIу илгъуна сархIели
Пахрубирулра нуни,
Хъярбукла дурхъал багьа
Ахъбуцибтазир сарри.
ХIела гьунартачи ну
ГIуррара хIерли сарра.
ГIямрула хIябкьяйтачир
ГьаларяхI рашен гIурра,
ГIерруцаби хIу даим
ХIела нешла балгнара,
Рааби мурадлира
Раргаби игъбарлира.
Аминат ГIябдулманапова, Дагъиста халкьла поэтесса
