БегIтани сарра нуша гIямрулизиб бегI гьалабси ганз кацIахъес, гъайдикIахъес бурсидирути. Илдани нушаб сегъуна гьуни чебаахъалра, нушанира иличирад гьарзали ганздикIес, илдала насихIятуни гIерасахъес къайгъибирули дирехIе.
ХIера, улкалис къуллукъуличи арагIер гIямру каибти бегIтала дурхIнира цархIилтигъунтили биэс хIебирар. Илдигъунти пикруми акIуб дила ишди бурхIназиб Сагидова Жаннет Амирхановнала сурат чебаибхIели. Ил, ДР-ла БекIла 2024 ибил дусла октябрьла 11-личибадси 142 ибил номерличилси ХIукму хIясибли, «Жагьилтас патриот бяркъ бедлугнилизи мягIничебси пай кабихьни багьандан» бикIуси Амет-Хан СултIа уличилси медальличил шабагъатларариб. Ж.Сагидовас шабагъат бедиб гьалабван республикализиб бетерхурси ДР-ла культурала коллегияла дазурбазиб, Дагъиста Правительствола Председательла заместитель Муслим Телякавовли.
Жагьилтазир ВатIайчи диги адилкьуси Жаннет Амирхановна халараибси сари РАН-ла НИИ-ла Дагъиста филиалла тарихла, мезла ва литературала институтлизиб 45 дусцадхIи хIянчи барибси, машгьурси тарихчи ГIисаев Амирхан Амирхановичла ва ДР-ла рурибси мугIяллим, педагогикала бузерила ветеран, нешла мез гьаладяхI ардукес, школала бучIанти бяркъчебтили ва багьудлумани бегIбарибтили халабаахъес рузули калунси ГIялиева Аминат Чамсулвараевнала пергер хъалибарглизир. БегIтани Жаннетла уркIилизи кадатурти гьели бусяIятла замана сабухъуни лугули сари. Илра ВатIайчи дигичерсили халараиб, ва гьанна сунела асилси бузериличил республикалис, улкалис гIяхIдешуни дирес даимриубли сари.
Жаннет Сагидовани бекIдеш дирули сари дявила асилдешла Музейла филиаллис. Сунела хIянчи ункъли балнила дурабад, илини жигарла бутIакьяндеш дирули рирар республикала ва Федерацияла кьадрила декIар-декIарти далдуцуначир. Гьаман гьаладирхьули дирар жура-журала выставкаби, иличиб нушала бургъантала дявила гьуниличил гIяхIли тянишбиру.
«ИшбархIи дебали къиянни саби аргъес сагадан миллатчидешли бекI ахъбуцни. ЧебяхIси ВатIа дергъла дусмазиб кьяйдали, нушала бургъантани ахIерси ВатIа хъархIерагардеш балтахъули саби. Гьайгьайрагу, хьунул адам, неш кьяйдали, дилара нушала уршбачи уркIи изули саби. Амма, лерилра илди къияндешуначил дарх, нуша ишбархIи Россияла халкьани цадирнила ва патриотизм ахъбурцнила бикьрумили детарулра. Цадешлизиб саби нушала цIакьра. Уржили, нушани лерилра гьалабизуни ахъниличи, нушала уршби биалли, чула хъалибаргуначи ара-сагъличи чарбулхъниличи, ва даршудеш кабилзниличи рирхулра!» — рикIули сари Жаннет Амирхановна. Гьайгьайрагу, илкьяйдали бетарниличи умутра леб. Жагьилтазир ВатIайчи диги адилкьути илдигъунти нешани лебхIели саби уршбира вегIла мер-муса калахъес, гьанагарли чебакIибси миллатчидешла балагь чебарбукес гъазализи каберхурти.
Жаннет Сагидова бузерила зяхIматчицунра ахIи, пергер хъалибаргла анкъила шалара сари. Илини айкьурли, халаваахъили, гIямрула дякьличи дураиб Арсен бикIуси урши. Илини Суайбат бикIуси дубурлан исбагьиличил кьисмат цабариб. Арсе ва Суайбатла акIубли урши Серажудин лев, сунесра хала дудешла у бихьибси. Сецад хIейгеси биалра, хала дудеш Серажудин, Жаннатла мурул, гIямру бегIлара вавалидяхъибхIели, бехIемцI бетаурли, ахиратла хъули хьуравиубсири. Сен-биалра, Жаннатли цIакьани даргиб хъалибарглис дебали хъарихъли ретаэс. Гьаннара ил уршилис ва уршила хъалибарглис бегIлара гъамси ва дигуси адам сари.
Хьунул адамла рухIла дебадешличила назмурти, поэмаби дархли лукIули бирар. Кьяркьси кьисматла сецад бяхъяни чегалра, ил гьаларяхI рашес, алавчартира уркIичеббирес ункъли бажардириркур. ХIера, илдигъунтала лугIилизирадси сари Жаннет Амирхановнара, бегIтала гIядатуни даимдируси, аслу-мина дигахъуси, миллатла дурхъаси тарихличи халаси пикри бяхIчииуси. Сунела гIяхIтигъунти лерилра къиликъуни жагьилтазира гIерасахъес, багьудлумала гьуни буцахъес илини рирусигъуна къайгъи дакIубирули сари ишбархIира.
Жаннет Амирхановна илгъуна разиси анцIбукьличил, илкьяйдали чесабиуси хьунул адамтала БархIиличил уркIи-уркIиларад мубаракрарес дигулра. ХIела бузери гьатIиралра сабухъчебсили бетаурли, хъулиб биалли, баракат камхIебиубли дигулра. Гъамтала дигили ва малхIямдешли алавруцили, ара-сагъли гIямру деркIаби!
Салимат ГIялиева
