Ишди бурхIназир Дагъистан Республикала культурала Министерствола коллегияличир, ДР-ла Правительствола шайзирад ХIурматла Грамоталичи лайикьрикиб Ахъушала шилизибси краеведческий музейла директор Мирзаева Зубалжат ХIусейновна.
Зубалжат Мирзаева музей абхьибхIейчирад илис бекIдеш дирули рузули сари. Илини дахъал хIянчи дирули сари музейлизирти экспонатуни дахъдаахъес багьандан. Ил жавабкардешличил рузуси сари ва сунечи сари дебали тIалабкарси сари. Музейлизир лер дахъал жура-журала выставкаби, баянти, суратуни. ЧебяхIси ВатIа дергъла бутIакьянчибас, спортла шайчир сархибдешуни диахъубти спортсментас, жавабла къуллукъуначиб бузули, халаси бузерила пай кабихьибтас хасдарибти белкIани.
Гьалабла заманала, нушала хала бегIтани дузахъули калунти ваяхI, кIунби, миллатла палтар ва дахъал гIурра гIяхIцад секIал лер музейлизир. Ила бухIнабухъунти адамтани, ваяхIли бицIибси музейличи тамашабиубли, халаси иштяхIличил илди хIердирули дирар. Чуйна музейлизи укьяллира, иларти ваяхI чедаэс иштяхIдулхъан.
Зубалжат Мирзаевани ва сунела хIянчизартани халаси жавабкардешличил лерилра тарихличил дархдасунти байрумтас, машгьурти адамтас, поэтунас, писательтас багъишладарибти далдуцуни дурадуркIули сари.
Районна дурар детурхути республикала кьадрила выставкабачир, пагьмуртала байрумтачир, фестивальтачир жигарла бутIакьяндеш дирули саби. Зубалжат ХIусейновнала бузериличила дахъал делкIес вирар, ил сегъуна черетаибси, духуси, гIяхIгъабза хьунул адам сарил.
Зубалжат Мирзаевала ДР-ла культурала Министерствола, «Ахъушала район» МО-ла администрацияла шайзирад ХIурматла Грамотаби, Дипломти, Баркаллала кагъурти лер. Ил илдачи лайикьрикибсира сари.
Гьаннала гIергъира Зубалжат Мирзаевас ва сунес дигутас арадеш, гIямрулизир ва бузерилизир сархибдешуни диубли дигулра!
С.ГIябдуллаева
