Мурталраван, ишбархIира жамигIятла гIямрулизиб хьунул адамла кьадри дебали халаси саби. Илини, мурул адамличил къяйли, чидил-дигара бетуцлизир хIянчи дирули сари, илхIелира – чебетаахъили, жавабкардешличил ва гIяхIцад сархибдешуни диахъубли. Чула назикти хъуцIрумачи хIерхIеили, илдани кьисматла сегъунти-дигара кьяркьти къияндешуни чекайсули сари. Иличибли багьесли саби хьунул адамла рухIла дебадеш. Дербентла къалаван чIумали кабизурли, илди гIямрула бяхъянас мутIигIбикIули ахIен.
ЖявхIелла тарихла баянтазира халтIдухъахIелли, чумра мисал гьандушес вирар хьунул адамтала гъабзадешличила. Мурул адамти кьяйдали, някълизи ярагъра касили илди дургъбази бархли арбашутири. Дудешуни, узби бургъухIели, илдала-декIар уркIби паргъатли дуэс дирутирив. Дявтазир хьунул адамтани дакIударибти игитдешла анцIбукьуначила ишбархIира нушани чебиулра ЧебяхIси ВатIа дергъла дусмас хасдарибти гIяхIцад фильмабазиб. БусягIятла заманара улкализирти аги-кьяйдала бегIлара дайлаб багьарибирули саби хьунул адамти. Медицинала багьудлуми касибтани дявила хасси балбуц бетурхуси мерличир нушала бургъантала гIямру уцахъули сари. ЦархIилтани биалли, ишар нушала бургъути асил уршбала гIямру дерцахъес кумекладирути, илдас дигIяндеш алкIахъути (маскировочные) сетани далкьарахъули, дявила хасси балбуц бетурхуси мер-мусаличи дурхьули сари. Ил хIяракатлизи битIикIули саби саби-алавтира. Дебали мягIничебси ва багаласи баркьуди саби ил. Илизи ахъибти хьунул адамтани Чедибдеш сархнилизи белгиси пай кабирхьули саби. Бургъантас кумек бухили башути-ургабра камли ахIен хьунул адамти. Чула гIямрулис урехи лебли хьалли, илди нушала бургъантас камсилра кумекбарес бирнила пикрумани гIяхIбаркьла баркьудлумази ихъахъули саби. Илдигъунти хьунул адамтачи пахру хIебаресра хIейрар.
Лерилра илди диру-далтутала дурарад, хьунул адамличи хъардиркули сари хъали-цIала ва бекIахъудила къуллукъунира. Илди лерилрара бекIдарили, илини цIакьани дургули сари дурхIнас бяркъ бедесра. Халаси гьунар ахIену, гьатIи, ил? ИлхIелира ил бажардириркули сари гIядатунала хьулчиличиб, гIямрула лерилра бетуцуни дяркъурти исбагьи рурсби ва багьудлумани бегIбарибти, ВатIайчи дигичебти уршби абикьес. ХIера, илдигъунти жагьил уршбани саби гьаннара нушаб паргъатдеш ва даршудеш калахъес дявила майдайчир гьунарти чедиахъути, душманти гIелабяхI дянгаэс къайгъибируси. Даршнара-азирнара баркалларикIес хIерумсус нушала игитуни абикьурти нешанас. Къаркъала къалаван дебати хIуша лерхIели саби илдира улкала хъархIерагардеш батахъес, миллатчиби агарбарес гьуцIлизибти. Дигулра, жяв-жявли дургъбира тамандиубли, хIушала уршбира ара-сагъли хъули чарбухъи.
Нешани, рузби, рурсби – лерилра чесабиуси хIушала байрамличил – халкьани-ургабси хьунул адамтала БархIиличил мубаракдирули, хIушала гIямрулизиб цалра хумарси бархIи мабакIаб эс дигулра. ХIушала шалати дяхIличир мурталра пишбяхъни биаб, ил беткахъахъеси цалра анцIбукь камабикаб!
Дигулра хIушала ванаси анкъилар дигира, малхIямдешра, хIерудира мурталра диубли, ил анкъилабси цIа бархIиличи-бархIи гьатIиралра халаси цIакьдешличил ухули. ХIушаб чIумаси арадешра, ахирагарси талихIра, халаси шаддешра дулгулра!
Салимат ГIялиева
