Сецад дусми ардукьялра, чум наслу дарсдиалра хьунул адамтани дергълизир дакIударибти игитлати гьунартачила хъумартес хIейрар. Илдачила гьанбикуни даимлис кавлути сари, сенахIенну хьунул адамла кумек агарли гIергъи, мурул адамтас чедибдеш сархес дебали къиянни бирар. Хьунул адамтани ВатIан батахъес ва чеалкIути наслубала челябкьла шаласили биахъес гIяхIцад къиян-жапа дяхIяуртири, гIямрула декIти имтихIянти хIурматличил ахъибтири. ХIера, ишбархIира гьаннала заманала игитуни – СВО-ла бутIакьянчиби, хала бегIтала гIядатуни хIурмат-кьиматличил даимдирули, ВатIа хъархIерагардеш батахъес гъазализи каберхурли саби. Дявила хасси балбуцлизир багьадуртачил барх пергер дубурлан хьунул адамтанира бутIакьяндеш дирули сари. Илдигъунтала лугIилизирадси сари иш белкIла игит Зайнаб МяхIяммадовара.
Зайнаб МяхIяммадова акIубси сари 1975 ибил дуслизир Сергокъалала районна Хьар МахIаргила шилизир. Шила школализир авал класс тамандарили, бегIтачил рарх Калмыкиялизи гечриубсири ва илаб белчIуди даимбарибсири. Мерличибси школа таманбарили, Элиста шагьарлизибси Т.Хахлыновала уличилси медучилищелизи карерхур ва ил ункъли хъараахъур. Зайнаб Россияла декIар-декIарти мер-мусаличи раиб: 8 дус Северлизир хIеррирули калун, илкьяйдали илини дусра байхъалара Сергокъалала центральная больницализиб хIянчи бариб, гIур Санкт-Петербурглизи гечриуб ва илабси дахъал шалубарси клиникализир рузес рехIрихьиб.
«Дила бархкьяби СВО-лизи бегIла гьалаб арбякьунтири. Камси заманалис отпускличи хъули бакIибти илдани устадешчебти специалистуни хIебиули, бургъанти улхули саби или бурибхIели, итмаданал военкоматлизи дугьаризурра ва, нушала бургъантас къуллукъбарес, вягIда бигьунра. 25 мурул адамла ургар ца ну сарри хьунул адам. Нуша Волгоградлизи дархьира, дявила ва медицинала устадеш касахъес ибси мурадличил. 3 базла духIнар гьар секIайчи бурсидарили, Херсонна шайчидяхI гьаркьятала къяянази ардукира».
Зайнаб МяхIяммадовани 2023 ибил дусла гIебшниличирад СВО-лизир бутIакьяндеш дирули сари. Фронтлизирти цаибти бурхIназибадал медсестра Зайнабли бяхъибти бургъантас цаибси кумек гIеббиахъули сари. Илини сунела гIямрулис халаси урехи лебниличи хIерхIеили, дявила майдайчибад бяхъибти бургъанти урехи агарси мерличи гечбирули сари (точка 300), алхунти биалли – хасси мерличи (точка 200).
«Дявила анцIбукьуназир бутIакьяндеш дарибси адамли ахIенси, ункъли хIергъу сецадла мягIничебсил вяхъибси ургъаннис итмаданал цаибси кумек гIеббахъни. Гьаланачи дебали къияннири, биалра вяхъибси ургъанна хIи тIашаъни, дяхъи бигьни ва ил урехиагарси мерличи ваахъни дила чебла сабри. Вяхъибсилис кумек гIебхIебаахъаслири ил убкIни балулри, ил багьандан бяхъибти дурхIнала жан дерцахъес лерилра цIакьани дяхIчииира», — рикIи ил.
Медротализиб тухтуртани белкIунси лечение хIясибли бургъанти сагъбарес дуги-хIерила рухIнар бамсриагарли рузули сари ил. «ГIяхIцадхIи чизилра багьахъурси ахIенри нуни СВО-лизир бутIакьяндеш дирниличила. Волгоградлизир вахта хIясибли рузулра рикIусири. БагьурхIели, лебилра уркIбухъунтири, хаслира дудеш ва уршби. Дила кIел урши леб, илди тиладибикIули калун ну хIянчиличирад ураризахъес. «Нуша аркьехIе дургъес, хIу хъулир руэн» бикIулри. Амма, медицинала хIянчизар сарливан, бургъантас рирусигъуна кумек гIеббиахъули, ну ишар риэс хIяжатли биъниличила гIячихъли иргъулра».
СВО-лизир Зайнабли гьаркьятала къяяназиб «Шторм» отрядлизиб къуллукъбирули сари.
«Полигонничир дила устадеш хIясибдарили, командирли бегIлара гIяхIтала сияхIлизи карерхахъурсири ва, «Шторм» бикIуси отрядлизи тухтурти биркIухIели, нура гIурра хIябал рурсира ила дархьира.
Дила лерилра шабагъатуни дудеш багьандан сари. Дила узи левси ахIен, урши хIейалра, илала мер бурцуси набчи дудешли пахрубирули дигулра. Ил набчи дебали кьакьаикIули сай».
Дявила чебла хIурмат-хатирличил ихъни, СВО-лизир гъабзадеш, игитдеш дакIудирни, цархIилти берцахъес сунела жан ахIерахIедирни багьандан Зайнаб МяхIяммадова «Дявила асилдеш багьандан», «Честь и слава Дагестана» ибти медальтачи ва «Дагъиста халкьла игит» бикIуси уличи лайикьрикили сари. Ил Сергокъалала районнацунра ахIи, арагIебли Дагъистан Республикала буланра пахрули ретаур.
Зайнаб МяхIяммадовани сари ВатIа марси рурси риъни чебиахъули, чедибдеш сархнилизи мекелли халаси пай кабирхьули сари. Илис ва нушала лебилра бургъантас цIакьли халаси баркалла балахъулра. Илдани саби нуша даршули хIердиахъес имкан лугуси. Лебилра ара-сагъли, чедибдешличил чула хъулрази чарбухъахъес нушара дулгулра!
ПатIимат Мирзаева
