Россияла Федерацияла Федеральное Собраниела Пачалихъла Думала депутат НурбяхIянд НурбяхIяндов советский ва россияла филолог-классик Тахо-Годи Аза ГIялибековначи гьаввакIиб.

Аза ГIялибековна ДР-ла Миллатла музейлис хьулчи кабихьибси, Дагъиста машгьурси революционер ГIялибек Тахо-Годила  рурси сари. Гьести гIямрула адам риалра, Аза ГIялибековнани филологиялизир ва лебил дунъяличир кадиркути сагадешуни руркъули сари.

Депутатличилси ихтилатлизир илини дудешличила, сунела хъалибаргличила, чевяхIси философличил сари тянишриънила ва Совет хIукуматла заманала философияла цахIнабиклизи филологли кьяйда сунени кабикибси пайличила масъулти гьандикахъиб.

Гьунибаънилизиб ГIялибек Тахо-Годила мемориалла зал абхьахъес ДР-ла БекI Сергей Меликовличи Аза ГIялибековна дугьаризниличилара гьанбушиб. Ил сипта Н.НурбяхIяндовлира гIеббуцибсири.  Миллатла музей абхьнилис кумекладиубтири Аза Тахо-Години музейлизи дедибти 150-цад хъалибаргла дурхъати ваяхI ва Кавказлизибси дергъличила белкIунти жузи.

Аза Тахо-Години Н.НурбяхIяндовлис сунечи гьаввакIнилис халаси баркалла багьахъур ва сунела къулбасличилси жуз савгъатбариб.