ГIергъиси замана нешла мез гьаладяхI дашахъниличила ва мяхIкамдирниличила дахъал гъай лер, амма дурхIнани илди руркънила бетуц илцад-декIар гапли саби викIес хIейрар. Миллатунала мезанас хасдарибти сягIятуни камдарниличирли школабазир илди руркъесра къиянбулхъниличила балахъули саби мугIяллимтани. Ил багьандан декIар-декIарти далдуцуни дурадуркIес къайгъилизиб саби илди, дурхIнази нешла мез дагьахъес багьандан. Илкьяйдали ишди бурхIназиб Дахадаевла районна Морскоела урга даражала школализиб нешла мезла БархIилис хасбарибси балбуц дураберкIиб.
ЧеалкIуси наслулизи нушала хала бегIтала культура ва нешла мез руркъяхънила шайчиб ил балбуц мягIничебсилира бетаур. Даргала миллатла мез дурхIнази гIяхIил далахънила шайчиб кумекбиэсил программа ункъли хIядурбарилри школализиб бузути нешла мезла ва литературала мугIяллимтани.
Гьаларла гIядатуначила далилтачил гIяхIил балкьаахъурлири зал ва иличибли цалабикибти нушала хала бегIти хIербирути гьарахъти дусмазиб багьарбиубтиванри. БухIнабулхъуси мерличиб гьариллизи миллатла берклумала тIем багьахъес имканти акIахъублири. Даргала миллатла жагати далуйти зайдикIулри, буралаби ва багьираби дурулри. Заллизибти разибирахъулри декIар-декIарти хIязанани.
«Дарган мез ва гIядатуни мяхIкамдирниличибли нушала тамашала культурала дурхъаси давла гьалабяхI башахъес вирар. Илгъуна дурхъаси чеблаличила нушазивадли гьарилли хъумартесра асухIебирар. Илдигъунти далдуцунала кумекличил дурхIнала нешла мезличи ва культураличи диги имцIадирниличи вирхес вирар. Илдигъунти культурала давлачерти гIядатуначи пахрубирули, мез ункъли руркъесра къайгъилизи биркур дурхIни. Нушала дурхъати гIядатуни ва нешла мез руркънила бетуцуни илкьяйдали наслубачирадли- наслубачи диахъни мягIничебсира саби. ИшхIелла манзиллизиб илгъуна баркьуди ахъси даражаличиб дурабуркIнила бетуцличи нуша чекадизесра хIяжатли саби», — буриб школала директорли.
Дахадаевла районна администрацияла перс-служба
