МухIела шилизивадси Ражабов МяхIяммад Гъазиевичли сунела гIямру ВатIайс къуллукъбирнилис хасдарибтири. МяхIяммад Ражабов ургъули калун Афганистайзибси дергълизив, Сириялизир кадикибти анцIбукьуназив, гьанна биалли СВО-лизирра бутIакьяндеш дирули гъабзадешличил ургъулри. 2022 ибил дусла мартла 9-личив 53 дусла гIямруличив ил Луганскла областьлизиб кабикибси дявилизив алхун.
МяхIяммад Ражабов гъамтани, сунела дурхIнани малхIямси, сунечи сай тIалабкарси адам ва барх бургъантани гъабзадешчевси командир сайливан валусири. Сириялизив ургъухIели ил декIли вяхъилира калунсири, ГРУ-ла хассм отрядлизив къуллукъбирули калун, гIергъити авал дус танкабачи къаршиси артиллерияла батальоннизив ургъиб. МяхIяммад Гъазиевич сунечил барх бургъутас гIибратли ветаур, цIакьси, хIялалси, гIяхIгъабза адам сайливан.
ВатIайс гъабзадешличил къуллукъбирни багьандан 9 медальличил, грамотабачил, кIиибил даражала Гъабзадешла орденничил шабагъатлавариб.
Гьанна биалли, сунела дудеш кьяйдали ВатIайс къуллукъбирули гъабзадешличил СВО-лизив ургъули лев, МяхIяммадла урши Ражабов Артур МяхIяммадовичра. Сунела дудеш гIямрулизивад арякьи гIергъи, бунагь-хатIа урдуцаб сунела, Артурли РФ-ла оборонала Министерстволичил вягIда бигьи, СВО-лизи ургъес арякьун. Артурра кIина декIли вяхъили сай, амма операция барили гIергъи, арадеш къулайбарибхIели, СВО-лизи, сай ургъуси мерличи аркьуси сай. Артурра чумал медальличил ва орденничил шабагъатлаварили сай, асилдешличил, гъабзадеш дакIудирули ургъни багьандан.
МухIела шилизибад леб гIурра бахъал гIяхIгъабза бургъанти. Рашидов ГIялиада Загьирбекович гъабзадешличил ургъули, РФ-ла оборонала Министерствола шайзивад Жуковла орденничи ва цархIилти медальтачи лайикьвикили сай, ВатIанра дурхIнала челябкьлара мяхIкамдарес багьандан дергъла майдайчив гъазализив сай.
Илкьяйдали, СВО-лизир бутIакьяндеш дирули сай МухIела шилизивадси жагьил ургъан Икакаев ГIялиасхIяб ГIязизовичли. ГIялиасхIябла дудеш жявли гIямрулизивад шалгIевухъунсири, илала неш Гулбарият Чупановани биалли урши жагали айкьур, бяркъчевсили, гъабзадешчевсили халаваахъиб. Гьанна СВО-лизив, гьунарти чедиахъули, гъабзадешличил ургъули сай. ГIялиасхIябра чумал шабагъатличи лайикьвикили сай.
Ахъушала районна лерилра шимазибадти гIяхIгъубзнани СВО-лизир бутIакьяндеш дирули сари.
Аллагьли илдас ара-сагъли, чула бегIтачи, дигутачи чарбухъахъес кьадарбиахъаб!
С.ГIябдуллаева
