Абакаров МяхIяммад Кьурбанович акIубси сай 1999 ибил дуслизив Ахъушала районна УбяхI Хъаршлила бахъал дурхIнала бегI, хIурматла хъалибарглизив.

Школа таманбарили гIергъи, МяхIяммад МяхIячкъала шагьарлизибси правовая академияла колледжла юридический факультетлизи керхур. Юристла санигIятра касили, ВатIайс къуллукъбарес арякьун.

ВатIайс къуллукъбирни ахирличи бикибхIели, МяхIяммадли вягIда бигьи, цаэсти бурхIназивал СВО-лизив ВатIа хъархIерагардеш багьандан ургъес вехIихьиб. Сай ургъуси отрядла командирра барх бургъантира берцахъес бажардивикни багьандан, МяхIяммад Жуковла медальличи лайикьвикиб.

ГIурра ил шабагъатлаварили сай «Дявилизив декIарухъни багьандан», «Дявила хасси балбуцла бутIакьянчи» бикIути медальтачил ва сунечи хъарси къуллукъ ахъси даражаличиб бетурхахънилис Россияла Федерацияла Президент В.В.Путинна шайзивад, илала къулбасличилти Баркаллала кагъуртачил. МяхIяммад офицерла уличира лайикьвикили сай.

МяхIяммадла дудеш Кьурбан Абакаровли ва неш, школализир учительницали рузуси Оксана Рабазановани жагали шел урши-рурси абилкьули саби. Илди гIяхIси бяркъра бедили, халкьличи ва ВатIайчи дигичебтили, жавабкартили халабиахъули  саби. МяхIяммадра ВатIайчи дигичевси, гIяхIгъабза урши ветаур. МяхIяммадла виштIасигъуна узи Изерра Пермь шагьарлизибси финансунала колледж таманбарили, Ростов шагьарлизиб Росгвардиялизиб ВатIайс къуллукъбирули сай.

Илди уршбани саби акIубси ва халабаибси УбяхI Хъаршлила шила халкь-ургаб халаси хIурмат сархили саби. Ара-сагъли, чедибдешра сархили, хъули чарбухъаб чула бегIтачи или булгули саби ил шила  адамти.

С.ГIябдуллаева