Хайдакьла районна Мажалисла культурала Центрлизиб отпускличи хъули вакIибси СВО-ла бутIакьянчи ГIябдуряхIман МяхIяммадовличил гьунибаъни бетерхур. Балбуцличи районна культурала учреждениебала хIянчизарти, бузерила ветеранти, волонтёрти, блогерти ва жагьилти жибарилри.
Балбуцла сиптакарчи, культурала Центрла организационно-методический отделла хIурматла хIянчизар Зоя Чупановани цалабикибти ГIябдуряхIман МяхIяммадовла гIямруличил тянишбариб, хIурмат-кьиматличил дявила чебла ихънилис илисра лебилра бургъантасра баркалла багьахъур ва, ара-сагъли, чедибдешличил чула хъалибаргуначи чарбухъи дигниличила аргъахъиб.
«АхIерси ГIябдуряхIман, нуша хIечи ва дявила хасси балбуцлизир бутIакьяндеш дирути лебилра нушала цаванзалантачи пахрули дицIилра, хIушала халаси хIурмат бирулра. Дявила къуллукълизир хIушани гьарли-марси мурул адамла къиликъуни дакIудирулра», — буриб илини ва, ВатIа хъархIерагардеш балтахънилизир гъабзадеш дакIударни багьандан, ГI.МяхIяммадов РФ-ла гвардияла гIяскуртала тактикала кьукьяла командирла шайзивад Баркаллаличи лайикьикниличила багьахъур.
«Хайдакьла ванзали ВатIайчи дигичебти уршби абикьур. Нушала цаванзалантани дявила чебла хIурматличил ихъули саби, чула гьала тIашдатурти масъулти ункъли гьунчидиркахъули. Гьарилличи пахрубирулра!» — буриб культурала Центрла хIянчизар СултIанат Шахвалиевани.
ГIябдуряхIман МяхIяммадовли СВО-лизир бутIакьяндеш дарес хьулухъниличила буриб.
«Дявила хасси балбуц бехIбихьибти цаибти бурхIназибал дила гьалмагъуни улкала хъархIерагардеш батахъес арбякьунтири. Илдас илаб къиянни биъниличила иргъули, шайчив калес хIейубра ва илди гIеббурцис, илкьяйдали дявила чеблара ихъис или пикрибарира. Миллатчибас къаршидеш дирнилизи, нушала улкализи ил изала тIинтIхIебирахънилизи СВО-ли мекелли халаси пай кабирхьули саби. Нушала дурхIни урехиагарти ва чIумати бургъанти саби, цархIилван биэсра хIебирар улкаличи ва халкьличи уркIи изути, чула ванза, гъамти мяхIкамбарес кьаслизибти адамтала. ГIямрула декIси имтихIян ахъахъес цаванзалантани, улкала лебилра халкьли цIакьли халаси кумек бирули саби», — буриб ургъанни.
Районна хьунул адамтала Советла председатель ГIяйшат ГIябдургIязизовани ВатIан мяхIкамбарни гьарилла чебла саби или буриб.
«Дагъистан чула уми улкала тарихлизи мургьила хатIли делкIунти, Россияла Игитла уличи лайикьбикибти дубурлантачи пахрули бицIили саби. Илдала гьунарти гъабзадешла ва дявила хъялис мардешла гIибратли детаур. Асилти уршби абикьурти нешанас уркIи-уркIилабадли баркалла балахъулра! Нушала лебилра бургъанти чедибдешличил хъули чарбухъунси бархIи сабаили дигулра», — буриб ГI.ГIябдургIязизовани.
Гьунибаънила дазурбазир культурала Центрла хIянчизартани СВО-ла бутIакьянчиби пачалихъли гIеббурцнила шайчирти ва цархIилти масъулти хIердариб. КIинайс, районна культурала Центрла гIяртистунани концертла программа гьалабихьиб.
Балбуцла ахирличиб районна культурала Центрла директор ГIяхIмад Сулайбановли ГIябдуряхIман МяхIяммадовлис чIумаси арадеш ва баракатла гIямру далгун, илкьяйдали душмайчибад чедибдеш сархили, ара-сагъли хъули чарухъи дигнира багьахъур.
Хайдакьла районна администрацияла пресс-служба
