Лавашала районнизиб 1,5 азир тоннала овощуни дихIес имканбикIуси сагаси объектли сунела хIянчи гIягIниси тяхIярли детурхахъули сари.

Гьалавван бузерила архIяличил вякьунси Дагъистан Республикала Правительствола Председатель ГIябдулмуслим ГIябдулмуслимовра илала бузериличил тянишиуб. Ил Лавашала районнизиб акIахъубси, овощуни дихIнила температура кабизахъес вируси цаибси, сагаси объект саби. Ил тIашбалтнила хIянчи 2024 ибил дусла ахирлис хъарарахъуртири. Проект гIямрулизиб дурабуркIнилис сиптакарсили бетаур «Махьи» СПОК. Объект бузесаъниличирли бузерила 19 мер акIахъесра имканбакIиб. БусягIятла замана Россияла регионтази овощуни дихнила хIекьлизир вачарла халати сетаначил вягIдалабиубли саби.

Сагаси объект проект хIясибли бузес гIягIниси бетуцличи бикахънили, бузерила шел дусла баянти халдаралли, 240 миллион къурушла кьадарлизир продукция бурхахъес вирар. Иличибли биалли, дусла духIнар, чеимцIали налогла сурсатуни сарливан, бюджетлизи 17 миллион къуруш дашар.

Проектла цахIнабси кьадар 99 миллион къурушличибра имцIали саби, ил лугIилизир, кооперативла саби-бегIти сурсатуни – 42 миллион къуруш.

Пачалихъла икьала сабливан, «Шила хозяйство гьалабяхI башахъни ва шила хозяйствола продуктуни, берк-бержла масани базуртачир дурхахъни» бикIуси регионна программа хIясибли, кооперативлис 57 миллион къурушла кьадарлизиб Грантла сурсатуначил кумек гIеббаахъибси саби.

Лавашала районна администрацияла пресс-служба