ЧеалкIуси наслулис бяркъ бедлугниличила гъай ишхIелицун ахIен ахъдурцути. Халати адамтани мурталра чула замана декIарсири, гьаннала жагьилти бяркъ агарти саби или зигарбикIули бирар. Юх, биэсра асубирар. Амма замана барсбирули саби. Иличил барх адамтира. ДакIубирули саби сагаси хIякьикьат, гьалабяхI аркьули саби жамигIятла кабиз, дарсдирули сари пикруми. ХIябилра гIяхIси бииши, нушала хала бегIтани дузахъути гIяхIти гIядатуни калунти диалри. Даргазиб халатала хIурматбирусири, гIяхIли бигахъутири, бедибси гъайлис къянахIебирутири.
Дила пикрили, жамигIятли, хIукуматли чула пикрила дураб гIямрула чидил-биалра шали баталли, ил вайнукьабани пайдалабирули саби. 90 ибти дусмазиб нушала гIямрула дахъал шалуби хIеруди агарли калун. ИлхIели сарри дакIудиубти вайнукьабала кьукьни, хъямчиби, шилтахъчиби ва цархIилти низам-кьяйда хIисаблизи кахIейсути адамти. Илди дусмазир лебталалра ца пикри сабри — давла бучес. ИлхIели сабри цIакь цаибси мерличи дурабулхъес бехIбихьибси. ХIезиб цIакь лебли биалли, хIу вархьси сайри или пикрибикIуси манзил. Ил заманализиб сабри динна шайчирти чула усалти пикруми жагьилти-ургар тIинтIдарес бузути вайнукьаби дакIубухъунтира. ХIушани балкIли бузахъулра дин или илдани адамти бачабирхахъулри. Се балусирив динна шайчиб нушала илдани? 70 дус Аллагь левси ахIен ибси политика дурабуркIуси пачалихълис гIергъи. Халаси улка тIутIубарили гIергъи, багьудиличи, динна шайчибси бяркъличи камли пикри бяхIчиулри. Гьанна нушани илдала «цIедеш» сархулра.
Спорт нушала пачалихълизиб арц сархуси журали бетарули саби. Дигулрив спортла шайчир ахъанайти сархес, хIядурли вии дахъал харжани дарес. Илгъуна агилизиб чедибдешличи гьунар лебти ахIен биутину, дахъал арц лебти, давлачебтала дурхIни саби. ИлхIелира чулира илаб давла сархес. Нушала республика спортла шайчиб мурталра гьалабси сабри, хаслира мушулбашнила шайчиб. Дунъяличир ахъли зайдикIули сари дагъистанлантала уми. Абз дубурлантала хIилизиб лебси саби.
Нушала республикализир гьачамлис дузули лерал дурхIнала ва жагьилтала спортла школаби. Илаб дурхIни матъал чус дигуси журализиб тренировкабачи башес бирули саби. Дигалли волейбол, дигалли азадли мушулбашни, кункси атлетика ва дахъал цархIилти жураби. АкIахъубли сари шуртIрира. ЧIянкIли тренировкабачи башес саби калунси. ДурхIнала спортличи иштяхI алкIни тренерлизибад дигахъуси саби. Тренер дурхIнас тянишси адамли ветарули сай. ЦацабехIти анцIбукьуназив юлдашли ва узили. ДурхIни иличи бегIтачи кьяйда, цацахIели имцIалира, лехIирхъули бирар. Бахъал дурхIнас ил гIибратлира ветарули сай. Бахъал леб илдигъунти тренерти МикIхIила шила спортла школализибра, чусра дурхIни спортлизиб вяшбикIахъес дигути.
Нушала шила дурхIнани гIергъити дусмазир някъ бирхIяхънила (някъ кархьнила) спортлизир гIяхIти гьунарти чедиахъули сари. Дагъистан Республикала, Россияла чемпионатуназир чуйнара цаибти мерани сархибти сари. Илдигъунти сархибдешуни тренер МяхIяммад Гугуевич ГIябдуллагIялиев вакIибхIели диубтири. Илала бажардиличибли МикIхIила шила дурхIни някъ бирхIяхънила (армрестлинг) журализиб Дагъистайзиб машгьурбиуб. Гьалабван МикIхIила шила спортла КIялгIялизир школализиб бучIути дурхIни-ургар някъ кабирхънила шайчирти абзани детерхур. Илди дурадеркIахъес халаси кумекбариб Ази Кьадиевли, МухIяммадгIяли ХIясановли, Мажид Мажидовли, Рустам Кьурбановли ва цархIилтани.
Тренерла гъай хIясибли, илди абзани дурадеркIибти сари дурхIназир спортла ил жураличи диги акIахъес, илди гьаладяхI дашахъес ибси пикриличил. «ЧIянкIли абзлизиб саби гьарли-марти чемпионти алкIути. Удивикнилизиб урехи лебси ахIен, чIянкIли тIашхIейзес ва гьалавяхI вашес ибси мурад вегIла гьала тIашбалтуси саби. ХIейрулрив хIела хIечибад чедибдеш сархес, хIед дебали къиянни бирар спортлизиб чедибдеш сархес. ТIашагарли узни, бехIбуцибсиличивад гIелумхIелзни ва тIашхIелзни — илди сари чемпионна лишанти», — бурули сай МяхIяммадли.
Чедибикибтас медальти, грамотаби ва цархIилти савгъатуни дедибтири. «БахъхIи агарли Лавашала районна чемпионат бируси саби ил журализиб. Илис хIядурдеш саби ишди абзани дурадеркIнира, — викIули сай тренер. — Нуни чебаира селизир дузес хIяжатлил нушаб. Вирхулра дила кьукьяли илди абзаназиб чIянкIли цаибси мер сархниличи. Илкьяйда халаси умут леб командали республикализибра цаибси мер сархниличи».
Руслан Ражабов
