Избербаш шагьарлизиб «Горячка»-ла мер-муса къулайдирнила хIянчи ахирличи дикиб. Иличила балахъули саби ДР-ла туризмала Министерствола пресс-службали.
Избербашлизибси «Горячка» дарма шинничибли машгьурси саби. Ил бахъал адамти башуси мер саби – ила дагъистанлантицунра ахIи, республикала гIяхIли буланра башар. Бурес чебиркур, Россияла декIар-декIарти мер-мусаличибад нушала республикализи башути туристунас Дубуртар Улкаличи хIяйранбирули саби. Гьайгьайрагу, илала тамашала дубуртани, хIуркIбани, шарубани, урхьули, хьанцIа закли, БерхIи абулхънили ва гIелабиркнили, бизити берклумани, къугъати гIяхIялдешли чила-дигара уркIила тимхъ къалабабирахъу. Дурабад бакIибти гIяхIлани нушала республикала жагадеш ахъли кьиматлабирули саби, гIямрула гIямру ишаб хIербирути дагъистанлантаниванра ахIи. Нушани биалли, гIядатла хIянчилизи, мягIнаагарти дуцIлизи дархили, нушала республикала пергердешличи, тIабигIятла жагадешличи, илала давлумачи пикри бяхIчииули ахIенра. Дила пикрили, илдачи пикрира бяхIчииули, илди мяхIкамдирнилизи, биштIаси биалра, пайра кабирхьес чебиркур гьарил дубурланнис.
Шагьарлизибти адамтани «Горячка» дурхъаси мерлизи халбирули бирар, чула излумас илала шин сабабли дирухIели. Гьанна дарма шинна мер-мусаличир адамтас гIяхIти шуртIри акIахъубли сари: машинаби тIашиуси мер къулайбариб, дурар шалми кадизахъур, гьунила дублар хIямам ва хIяжатхана тIашдатур, вавнала кьадуби удатур. Илала дурарад зярга-зекъ лайдикIути тIакьнира беседкабира кадизахъур.
Республикализиб туризм гьалабяхI башахъниличи бяхIчиаибси конкурсла дазурбазир сари «Горячка»-ла мер-муса къулайдарес имканбакIибси. Ил баркьудилис ДР-ла туризмала Министерстволи 3 миллионничирра имцIали арц декIардариб.
Бассейннизи ванзала духIнарад дуцIарти шин сари дашути, ил багьандан саби «Горячка» бикIутира. Ила мяхIкамли ухIнаулхъуси сай ва 10-15 минутла чеди калес асубируси ахIен. УркIи-тумала, демдрила излумазибти, хIила гъяж ахъ-гIяшбикIутас бассейннизи бухIнабулхъес урехиласи саби, сенахIенну илдигъунти адамтас дуцIарти шиннизи кабирэс асухIебирар. Бассейн кIел бутIаличи бутIибси саби: мурул адамтала ва хьунул адамтала. Илар массаж дирути, палтар дарсдирути хъулрира лер.
Халкьла гъай хIясибли, ила башути адамтазибад багьа кайсесли пикрибарибхIели, бассейн итмаданал берубсири. Илгъуна пикри уббатурмад, сагадан дуцIарти шин дашес дехIдихьибтири. Ил тамашала анцIбукь ахIену гьатIи! ЧевяхIсини халкь матъал пайдалабикIахъес дакIубиахъубси мер ахIенара? ТIабигIятли акIахъубси урунж адамтани мар-марли мяхIкамли бихIес гIягIниси саби. Илала мер-муса къулайдарни, халкьлизи басмриихъахъести шуртIри акIахъни мягIничебси баркьуди саби.
ПатIимат Мирзаева
