Ишди бурхIназиб нушала библиотекализиб даргала машгьурси поэт, прозаик ва тилмаж Амир Гъази акIубхIейчирад 85 дус дикнилис багъишлабарибси жузала выставка гьалабихьира.
Амир Гъази лукIусири адамти философияла лирикала журализир гIямруличила пикрибухъес хIяжатдеш акIубси замана. Поэзиялизир биалли гIямру сунела лерилра шалубира сарира, лерти хасдешуначил чедетаахъили гьаргдарес гьамадли ахIенри. Ил багьандан бииши итхIелла манзилла бахъалгъунти поэтуни, илдала лугIилизив – Амир Гъазира, прозаличи шурбухъунти, авторли чедаахъибти хIял-хIякьикьат гIеркъаси къяйлизир сипатдарес къайгъи дакIубируси.
Амир Ражабович ГъазимяхIяммадов акIубси сай 1940 ибил дуслизив Дахадаевла районна Зубанчила шилизив. Илис кьадарбиуб Сергокъалала педучилище хъараахъес, кIинайс М.Горькийла уличилси литературала институтра. АхIерси шилизив мугIяллимли узули калун, гIур – республикала «Ленинна байрахъ» газетала редакциялизив литературала хIянчизарли, дарган мезли дурабулхъуси, дурхIнас хасбарибси «Лачин» журналла редакторли.
Амир Гъази 1976 ибил дусличивад СССР-ла писательтала Союзла член сайри. Илала цаибти белкIани дагьардиуб 1958 ибил дуслизир «Ленинна байрахъ» газетала бяхIяназир, кьанниван – дарган мезла «Гьалмагъдеш» альманахлизир.
Илала творчестволис хасбарибси жузала выставкаличир гьаладихьилра декIар-декIарти дусмазир дурадухъунти поэт-писательла жузи, назмуртала сборникуни. 1966 ибил дуслизиб Дагъиста жузала издательстволизиб поэтла назмуртала «Бириз» («Тополь») бикIуси цаибси сборник дурабухъунсири. КIинайс дурадухъун илала цархIилти жузира: «Дила урхьу», «Дубуртас марти уршби», «Кьисматла кьяркьдеш», «УркIилизиб дунъя», «Дигайла арцан» ва цархIилтира.
Амир Гъазила дебали мурхьти хIялани алкIахъули сари дурхIядешла гьанбикунани. Поэтла гьарил къяйлизир илди ункъли чедаэс вирар.
Поэтла творчестволашалси гьуни цIацIали бархбасунси саби илала гIямрула гьуйчил. Илала лирикала произведениебазир алавчарли кадиркути анцIбукьунани, сай бикьрили ветаурти аги-кьяйдали гьаргдирути хIял-тIабигIят иргъулра нушани. Илкьяйдали поэтли творчествола халасигъуна бутIа гIядатла адамтала кьисматунас, халкьла рухIла давлумас багъишлабарили саби. Дебали уркIилизи атIести назмурти сари ВатIайчила, нешличи дигиличила.
Амир Гъазила бузерилизиб белгиси мер бурцули саби тилмажла хIяракатлира. Илини дарган мезличи шурдатур урусла ва Дагъиста поэтунала назмурти: М.Лермонтовла, Н.Некрасовла, Е.Эминна, С.Стальскийла, ХI.ЦIадасала ва гIуррара бахъал цархIилтала.
Салимат ХIяжиева, Р.ХIямзатовла уличилси Миллатла библиотекала краеведческий отделла хIянчизар
