Пагьмучебти адамтани сарра нуша гIямрулизирра черяхIти баркьудлумачи гьуцIдирути. Илдала хIянчурбани биалли, уркIичердирулра. Жагадеш алкIахъути хIянчурбани уркIила гьав ахъбурцули бирар.
ХIера, илдигъунтазивад ца сай Ахъушала районна Усишала шилизивадси КьанайхIяжиев Шамил МяхIяммадовичра.
АкIубси сай ил 1977 ибил дусла июньна 5-личив. Сунела шилизиб урга даражала 1-ибил школара таманаили, Ш.КьанайхIяжиев 1994 ибил дуслизив Избербашла педагогикала училищелизи художественно-графический отделениелизи керхур. 1998 ибил дуслизиб горельеф журализиб хIядурбарибси «АхIульгола гьалаб дяви» бикIуси дипломла хIянчи бетерхахъур. Багьудлумачи гъаргъси Шамил ил дуслизивад Дагъиста педагогикала университетлизи баягъи илгъуна санигIятла факультетлизи керхур. Россияла халкьла художник Г.Гейбатовла бекIдешлиуб бузуси скульптурала устаханализир Шамиллис сунела пагьмурти гьаргдарес имканбакIиб. 2004-ибил дуслизиб «Имам Шамил» бикIуси дипломла хIянчи бетерхахъур. Изобразительное искусствола мугIяллимла даражаличи айкиб, «скульптура» бикIуси бетуц хIясибли.
Гьар секIайчи чекайзурси, бируси баркьуди чедибдешличил бетурхахъуси устас, гьайгьайрагу, гIямрулизибра гьарбилзуси саби. БикIаргу: «Къайгъибара, Кьудратла ВегIлира хIела баркьудлуми чедиу». Илкьяйда бетарули саби Шамиллисра. Багьла-багьлали илисра имканбикIули саби сунени чеббикIибси санигIятлизив гьалавяхI вашес.
Илала бузерила цаибти гунзри дехIдирхьули сари ДГУП-ла художественно-графический факультетла живописьла кафедрализир.
1999 ибил дусличивад илини лебил Россияла, регионна, республикала декIар-декIарти выставкабачир жигарла бутIакьяндеш дирес вехIирхьиб. Гьайгьайрагу, Шамилла пагьму лебтанилра хIясиббариб ва чихъли кьиматлабариб. 2001-ибил дуслизив ил, «Дагъиста жагьилти художникуни» бикIуси республикала выставкализир бутIакьяндеш дарни багьандан, Грамоталичил шабагъатлаварибсири. Илдигъунти анцIбукьуни илизи гьатIиралра декIар-декIарти далдуцуназир бутIакьяндеш дирахънилис гьаликIли детарар. 2003-ибил дуслизиб биалли, илини Дагъиста халкьла поэт Расул ХIямзатовлис хасбарибси халаси памятник (монумент) конкурсличи гьалабихьиб. 2006-ибил дуслизир Ш.КьанайхIяжиевли бутIакьяндеш дариб педагогикала вузанала художественно-графический факультетла преподавательтала ва студентунала пагьмула хIянчурбала «Школа. Учитель. Искусство» бикIуси лебил Россияла выставкаличир. Ил «скульптура» номинациялизив лауреат ветаур. 2009-ибил дусла июньна 1-личиб дурхIни мяхIкамбирнила БархIилис хасбарибси «Дунъяла лагьни» бикIуси халаси памятник ибхьнила балбуц бетерхурсири. МяхIячкъала шагьарла куц-кабиз жагадирнила ва халати памятникуни алкIахънила искусство гьалабяхI башахънилизи халаси пай кабихьни багьандан, Шамил шагьарла Администрацияла шайзивад ХIурматла Грамоталичил шабагъатлаварибсири.
Буралли, Шамил МяхIяммадовичли сархибдешличил дурадуркIули сари республикала чумра машгьурти адамтас хасдарибти халати памятникуни далкьарахънила хIянчи. Илди халкьлира халаси дигиличил кьабулдирули сари.
Бузерилизир диахъубти илала сархибдешуни хIукуматлира чихъли кьиматладариб. 2013 ибил дуслизив ил Дагъиста урибси художникла хIурматла уличи лайикьикиб.
Дигеси саби, Шамилли даргала классик ГIямарла Батирайлис хасбарибси памятник хIядурбирнила бузерира къелгIеббикни. Илала хIянчи даргантасцунра ахIи, арагIебли Дайгъистайсра улкалисра мягIничебси бетарниличи дирхулра.
Кьади ГIялисултIанов
