Гьалабван Дахадаевла районна Сагаси Уркухъла урга даражала школаллизиб математикала, физикала, информатикала ва биологияла учительтала методикала цалабяхъла (ММО) заседание бетерхур. Балбуцличиб ахъбуцибси тема сабри «БелчIудила хIяракатлизи сагати тяхIяр-кьяйда духIнакайънила хьулчиличир педагогикала сурсатуни гьаладяхI дашахъни».
Иличи цалабикиб Сагаси Уркухъла, Шаласила, Иван-къутанна ва Морскоела школабала ункъли бузути ва декIарбулхъути мугIяллимти.
Балбуц ибхьули, цалабикибтачи саламтала гъайличил дугьаризур Сагаси Уркухъла школала урус мезла ва литературала учительница ХIулаймат Шайхова. Илини белчIудила бетуцличи сагаси тяхIярли гъамирнила мягIничебдешличила, ишхIелла манзилла багьудила технологияби дузахъниличила аргъахъиб.
Шаласи ва Морское школабала педагогуни гъайбухъи, ишхIелла манзилла технологияби пайдаладирнила гIяхIдешличибли багьудила даража къулайбирниличила гIячихъти мисалти гьандушиб. Илдани илкьяйдали белчIудила бетуцлизир интерактивный далилти пайдаладирниличирли чули дирахъути сархибдешуначила, бучIнила проектла хIянчурти ва мультимедийный жураби дузахъули, дурхIнази мурхьли материал руркъяхъниличила, чула бузери гьалабяхI башахъниличила баянти гьаладихьиб.
Заседаниеличиб илкьяйдали цалабикибтала пикри бяхIчиаахъиб ишхIелла манзилла дарс ил дурхIнас багьудлуми бедлугнила журацун ахIи, мугIяллимла гьарли-марси узнила искусство биъниличира. БелчIуди гьалабяхI башни дигахъуси саби бучIантала ургарти ихтилатунала ва бархси бузерила баркьуди гьалабяхI башахънилизиб педагогли пайдаладирути бетуцуназибадли ва устадешлизибадли.
БелчIудила бетуцлизир сагадешуни духIнакайъниличил дурсри дурхIнас иштяхIдухъестили ва тамашалатили детарниличила педагогунани чула пикруми дурулри.
Балбуцла дазурбазиб Сагаси Уркухъла школала директорла заместитель Насибат ХIясановала бузери ахъли кьиматлабариб. Багьудила бетуцлизир педагогикала сагати технологияби пайдаладирниличирли илини дирахъути сархибдешуни ункъли чедаиб бархкьябани ва балбуцла бутIакьянчибани. Илини илкьяйдали къайгъни дакIудирниличирли педагогунала бузери ункъбирахъули ва дурхIнала белчIуди гIяхIбулхъахъули саби.
Балбуцличиб школабала ункъли бузути мугIяллимти грамотабачил ва Баркаллала кагъунтачил шабагъатлабариб.
ДГУ-ла ректор МуртазагIяли Рабадановла шайзирадти Баркаллала кагъурти дедиб ДР-ла багьудила урибси хIянчизар, халкьла собраниела депутатла кумекчи Мурад Алжанбековли.
Илдигъунти дуалдуцунани школаба мугIяллимти-ургарти бархбасуни уржахъули сари, ва илдани барсур устадешра гIебисули саби.
Дахадаевла районна администрацияла пресс-служба
