ГIяммаев Тимур МяхIяммадсягIидович акIубси сай Дахадаевла районна Урхьнишала шилизив. ВиштIахIейчивадли серхурси, сунела хъалибарглис ва жамигIятлис кумекбирес къайгъилизивси урши сайри ил. Тимур школализиб белчIуди хъараахъурли гIергъи, ВатIа гьалабси чебла ахъес арякьунсири. Гьала-гьала Оренбургла областьлизир илини дявила баркьудиличи вегIирнила шайчирти багьудлуми касибтири.
Курс таманаили гIергъи, Тимур разведчикунала ротализив Чечентала Республикализи вархьибсири. Ил регионнизир илини дявила анцIбукьуназир бутIакьяндеш дарибтири ва гъабзадеш, санигIятлашал гIяхIил хIядуриънила баркьуди чедаахъибтири. Илала гIибратчебси къуллукъбирнила бетуц пикрила дураб калунси ахIенри, ва Тимур дявила майдайчир игитти баркьудлуми дурадеркIни багьандан «Гъабзадеш багьандан» ибси медальличил шабагъатлаварибсири. ГIярмиялизиб къуллукъбирнила манзил ахирличи бикибхIели, ил регионнизиб илини вягIда къулбасбариб 2003-ибил дусличи бикайчи илав калес багьандан.
2003-ибил дуслизиб вягIда таманбиубли гIергъи Тимур Дубуртар Улкализи чарухъун ва сунела гIямрула бетуцуни гьунчидикахъиб. 2022 ибил дусла сентябрьличив Украинализир детурхути дявила анцIбукьуназир бутIакьяндеш дарахъес багьандан Тимур МяхIяммадсягIидович живарибсири.
Чечняла Республикализиб санигIятлашалси хIядурдеш барили гIергъи, 71 ибил полкла къяяназив дявила анцIбукьуназир бутIакьяндеш дарахъес багьандан Украинализи вархьибсири. «ШТОРМ» бикIуси отрядла къяяназив ил душмантачи къаршили, урехиагардешличил, санигIятлашал ахъти устадеш чедиахъули ургъусири.
Душмайчи къаршиси ца дергълизир бутIакьяндеш дирухIели, Тимур декIли вяхъибсири. Ил някълизивадли ва кьяшлизивадли вяхъили виалра, хъарбаркь таманбирули, гъабзадешличил ургъусири. Арадешлизир нукьсандешуни дакIудиубхIели, ил Севастопольлизибси госпитальлизи арукибсири. Илаб сирхIян уршилис медициналашалси кумек гIеббаахъибсири ва илала арадеш гьалабяхIбикиб.
Тимур ГIяммаев жагьилтас патриотизмала ва гъабзадешла мисалли ветаурли сай. Илини ахIерси ВатIайс къуллукъбирнила, улкала хъархIерагардеш багьандан сунела гIязиз жан кьурбандаресра хIядурли виънила баркьудлумани бахъал цархIилти бургъантира уркIичеббирахъутири.
Тимургъунти ВатIан балтахъанти къияндикибхIели вегIла дурхъаси ванза батахъес багьандан къаркъала къалаван тIашкабилзути багьадурти биъни якьинси саби. Илдигъунти адамти ишхIелла манзилла гьарли-марти игитуни саби ва илдачила хабар даимлис наслубала уркIбазиб ва тарихлизиб даимлис кавлуси саби.
ВатIа гьаларти игитти баркьудлуми ахъли кьиматладирули, Тимур ГIяммаев «Дагъиста хIурмат ва асилдеш» ибси медальличил шабагъатлаварибси сай.
Тимур ГIяммаев ва Россияла лебилра бургъанти чедибдешра сархили, ара-сагъли чула гъамтачи чарбухъаб.
Дахадаевла районна администрацияла пресс-служба
