ЦархIилти мераначирван Дагъиста ванзаличирра гIяхIцад туннельти лерти сари дубурти ва шурми дайдяхъили, адамтас гьуни гьамадбирахъули, кьавкьавтира лаг-катругунира хIейхъахъули, гьалабяхI башахъес багьандан кумекли детарути. Илди гьундурала устнани халаси къиян кабихьили, далкьарахъухIеливан, поэтлира сунела бугаси пагьмура пайдалабарили, ручкала кумекличил манзилла дубура байбяхъили, шигIрула туннельти дирули сай. Илди ихъусини гIячихъли балуси саби поэзияла чебяхIдешличила ва караматдешличила. Гьарли-марси поэзияли илкьяйдали адамлис дигалли дубурти дайдяхъили, дигалли урхьнала лутIилизибадли  гьуни кабихьили, дигалли гьаваличивадли вашахъес ахъурцули, гьалавяхI вашахъес кумекбируси саби. Даргала литературализибра илдигъунти шягIирти камли ахIен. Батирайличибадли бехIбихьили, Рашид Рашидовличи, Газим-Бегличи, МяхIяммад ХIямидовличи, Амир Гъазичи, … баайчи илдани бархьдешла дякь кабихьиб ва чеалкIуси наслу илабадли башахъес икьалабирули саби. Илкьяйдали лерилра манзилтазиб  халкьлис гIямрула гьуни шалабирахъули, зубрала малаикуниван даим барх башули, дунъя ласлизиб лебай шигIрула лами абулкахъути поэтуназивадли сайси Амир Гъазичила саби иш белкIра.

Амир Гъази (ГъазимяхIяммадов Амир Ражабович) акIубси сай 1940 ибил дуслизив Дахадаевла районна Зубанчила шилизив. Илини Сергокъалала педучилище ва кIинайс М.Горькийла уличилси литературала институт таманаибтири. Сай акIубси шилизив мугIяллимли узули калун. ГIур узусири республикала «Ленинна байрахъ» газетала редакциялизив литсотрудникли, дарган мезличил дурабулхъуси республикала литературала «Лачин» бикIуси дурхIнас хасбарибси журналла редакторли.

1976 ибил дусличивадли СССР-ла писательтала Союзла член сай. Амир Гъазила цаибти белкIани дурадухъунтири 1958 ибил дуслизир «Ленинна байрахъ» газетализир, кIинайс «Гьалмагъдеш» журналлизир.

1965 ибил дуслизиб Дагъиста жузала издательстволизиб дарган мезличил илала «Бириз» бикIуси назмуртала цаибси жуз дурабухъунсири. ГIергъити дусмазир Амир Гъазила назмуртала «Дила урхьу», «Дубуртас марти уршби», «Кьисматла кьяркьдеш», «ХIяя», «УркIилизиб дунъя», «Дигайла арцан», «АвкIапIи», «ГIямрула пал» бикIути жузи дурадухъунтири.

Даргала машгьурси поэтла «Адам, тIашизи» бикIуси хабар ва «Чебла» бикIуси повестьра дурадухъунтири.

Москвала «Современник» ва «Советская Россия» бикIути издательствобазир Амир Гъазила назмуртала «Дубурла бекIличиб галга» ва «Умудеш» бикIути сборникуни дурадухъун.

Илала произведениела тематика саби нушала паргъатагарси манзил гIячихъли сипатбирули, чузив лирикала игит къайгънавиркьуси ванзаличиб даршудеш калахъес ва халкьла рухIласи давла бетхIехъахъес.

Амир Гъазини дарган мезличи шурдатур М.Ю.Лермонтовла, Н.А.Некрасовла, М.Жалилла Г.Эминна, П.Нерудила, Н.Хикметла, Э.Ромерола ва Дагъиста поэтуни Е.Эминна, С.Стальскийла, ХI.ЦIадасала ва цархIилтала назмурти.

Амир Гъазини гIямрула гьарил шали устадешличил сипатдирули сари ва улкализир кадиркути анцIбукьунас бархьси кьимат бедес къайгъибирули сай.

Илала назмуртани уркIи-рухIличи халаси асар бирули саби. ХIера, сейкIулил ил «Нешличи» ибси назмулизив:

«Дунъяличив наб, хIуван,

ХIейуб адам ахIерси,

Дугурбазир – гунзрачи,

ХIерели – гьунчи хIерси.

 

Гунзри камли дикьади,

Гьунчив камли чейира.

Чуйнара, чехусайван,

Чурхли хIези гъайира.

 

ГIур дигIянни ва гIянцIли

ГIянцIикIира ну бецIван,

Вебшили шагьарлизи,

МицIирси, цунси децIван.

 

Илисгу гьанна набчи

Бунагьуни акибти,

Дила лишанти, иза

Шявси рангли дакибти.

 

Ну хIед дурхIяхIелицун

Шаддеш-талихIла хIебри…

Мабагьаб хIела агри –

Улгулра дуги-хIери.

 

… ЧапIлира, чиллализиб

Чякаван чарх руржули,

БекI ва уркIи дурцули,

ДецI держличил бужули».

 

ГIязизси нешла сунес дигусиван хIурматбарес хIейъниличи вахъ пашманиубли авторли викесил мер балули ахIен. Ил ахиратла хъули аррякьи гIергъира цIумикIули сай ил агрила кьутIкьудеш чIямбирули ва улкализир кадиркути анцIбукьунани кьакьавакIахъили сай:

«Неш, хIу харираресил

Хабар дила агара,

Хумарти, кахти дурес

Вирус сецад-дигара.

 

Деза-хабарла улка

Хасмушуназиб саби,

Дарула гавра гягIра –

Гьаннала гьава сари.

 

Кабуршути, бирхъути –

Чили, чинаб буйгIути…

Жанивар гIямру сари,

Кьясдеш, гьими делгIути.

 

Тухри, давлуми дутIес,

Дергъгъуна гъаза саби,

Душмандешли, гашили

Шагьурти дегIи сари…

 

Шилизир, шанти-ургар

Цундешличил рурибси,

Неш, хIякьикьат хIебагьес,

ГьанкI башаб хIед муриси.

 

Чили бала, белики,

Балагьла аргъ барсбиэс…

Хариси хабар хили,

Дигиб наб хIечи ваэс».

Поэт караматчигъуна виънилис бикьридеш дирули сари илала «Дарула гавра гягIра – гьаннала гьава сари» ибти гъайли. Илкьяйда улкализиб ибкьси аги бетаахъурхIели хасмуш хIякимтани, илини балули урги гъамси манзиллизир дявила анцIбукьуни кадиркниличила. Сецад децIикIишира ил шягIир ишхIелла манзиллизир кадиркути чедаадли? Бархьси саби, цархIилти хIебалас, поэт варх убкIули сай гьарил жагьилли дявила авлахъличир ВатIан багьандан жан кьурбандирухIели. ГIе, илкьяйдали кахти анцIбукьунани катра каршули, дунъяличиб даршудеш багьандан перола кумекличил ургъес багьандан сагадан алкIуси ургар ил. Якьиннигу, ил сунела назмуртазив мицIиртачивра мицIирли сай ва гьаннара балкIдеш бялчIули, бархьдешгIевли къаркъала къалаван чIумали кайзурли сай.

Бархьдеш агарси манзил балтIули, чучиб сегъуналра гIяйибагарти адамтала гIямру къябиъни убяхIси баркьуди биъни иргъахъули, ил нешличи дугьавилзули сай илдигъунти харабдешуни чехIедиули, паргъатли русахъес. Амма поэт сеннира баришвирули ахIен улкализибси агиличил. Ил хьуликIули сай гьарил секIал гьунчидиркниличи, адамтала гIямрула ва яшавла шуртIри къулайдирниличи. Илкьяйдали нешличи гIяхIла хабарличил ваэс ибси умут бетихъахъули ахIен. Амир Гъази децIикIули ахIен сунени шалал дунъя балтниличила, ил сунела гIямруличила ахIи, улкала ва илаб хIербирути адамтала кьисматличила имцIали пикриикIули сай.

Поэтуни имцIаливан марти дигайла хIялани иргъахъули, чула уркIили чеббикIибтас назмурти лукIес бехIбирхьули бирар. Амир Гъази селичивадли вехIихьибал белгили ахIен, амма дигайла темара илини лебгIеб жагали гьаргбирули сай. Сунела хIялалти дигай цIуба кIапIиличи гIярбукIай арцла гажинничи мургьила някьишван шигIрула хатIличил варакьдирули сай. Тамашала цугбуцуначил илини сунела марти дигай учIаннис гьаладирхьули сай:

«…ХIу хIулбаряхъес ахIи

Агара пикри цархIил.

ГIур авара хIебирис

ВебкIаслира ил бархIил.

 

…Раши, дигалли хIела

Кьукьмусиркус ну гьала.

Гьачам-гьатIи загьрула

Гьабуца наб пигьала».

Адамла уркIилизир сецад цIакьти хIялани диэс дирулил балахъули сай авторли ва сунес дигуси рурси чераэс бикили гIергъи, вебкIалра селизилра бирули ахIен. ЧIянкIли ил сунечи ракIалли, илини загьрула пигьала гьабуцалра бержес хIядурли сай.

«Агь, хIела нана хIулби,

Алмазуни ухути,

Масхараван харити,

ПасихIдешван, духути.

 

Агь, гIянтIикIадеш! ГIинтIла

Вава гьанбиркахъути,

Занзба назикси тIулван,

Дила уркIи бирхъути.

 

Райхъала ванзаличир,

Райхъала гьаваличир,

ХIеррирулри хIу хIебла

Гьавличил, гьаваличил.

 

Амма, минариубли,

МехIеван лигализир,

ХIязтазирри хIу дила

УркIила улгализир».

ХIера, сегъунти устадешличил жагали сипатдирулил илини уркIилизир бамбализир мургьиван дигIяй дихIути дигай. Поэтла марти дигайли исбагьи мехIела мерличир лигубази мерларарили сари. ХIебиалли, илала дигай гьачамлис дилшути ахIен. Сай мицIирли левай сунечил сари, вебкIибхIелира лигубала духIнар кавлули сари. Чархла диъби каргьаллира даимлис лигубани мяхIкамдирули сари.

Амир Гъазини пайдаладирути мешубуцунани поэт ахIенсилара дигайла хIяланас ахъси кьимат бедахъести пикруми алкIахъули сари. Илкьяйдали дургар черяхIти шигIрули дицIибти пагьмуртала нуранала асарлиур зубартира алкIути. Сецад цIакьти дигай дихьалра адамли, илди секьяйда иргъахъусил хIебалалли, илди сунела уркIили чеввикIибсиличи даахъес вирули ахIен. Илкьяйдали ванзаличи лайбакIили, берэс хIядурбиубси ризкьила кьякьличи поэтли шарабла кIунтIри чахьдирули сари ва назмурти алкIули сари. ХIера, сегъуна асар леба назмула дигай дихьибсиличи. Бурули бираргу, дигай дихьибси гьарил адам поэт сай или. ЧIянкIли уркIила макьам назмула тугъачил гIеббуцаллицун дигай илди хасдарибсиличи диур.

Амир Гъазила поэзия бахъли ахъли кьиматлабирули бирар. Илизи зубартани бицIибси заклизи космонавтван учIан ухIнаахъалли, гьамадли гIелавяхI чарухъесра хIейрар. Зубартала дигIяндеш гьаргбирули, сагати зубарти белгидирули, илав вахъхIилис кавлан. Илкьяйдали поэзиялизи шигIрула зубарти диршули, дугила гьанкI батурли ва хIерила паргъатдеш хIебалули, узусири зубанкан поэт.

ПатIимат Кьурбанова