Маллаев МяхIяммад ШяхIбановичли 1970 ибил дуслизиб Ахъушала цаибил урга даражала школа таманбариб ва ил дусла гIебшнилизив ВатIайс къуллукъбарес арякьун. КIел дус ГДР-лизив, Советский гIяскуртала частаназив калун.
— Нуни къуллукъбируси часть Потсдам шагьарлизиб сабри, — гьанбиркахъули сай МяхIяммадли. — ГДР-лизиб Советский бургъантала халаси хIурмат бирусири. Гьаман нуша Германияла мер-муса, шагьурти чедаахъес дикутири.
Ил сунела чеблара ахъили, баркаллаличил хъули чарухъун ва Дагъиста Пачалихъла пединститутлизибси художественно-графический факультетлизи керхур. Ила керхнилис сабабли детаур сунела суратикIнила шайчибси пагьму ва някъла хIянчила устадеш. МяхIяммад Ахъушавад цаибси сайри худграфлизи керхурси.
— Художественно-графический факультетлизив учIес дебали хIяздухъеслири. Нуша, студентуни, дахъал мераначи дикутири. Чедаира нушала республикалацунра ахIи, Россияла декIар-декIарти мер-мусаличирти гьаларла памятникуни, къугъати музейти, дубуртала музурби ва мурхьти къадурби. Нушани чедаибтала суратуни дирутири, — бурули сай М.Маллаевли. — Дукира хабарла Эрмитажлизи, Москвализирти музейтази. Практикаличив калунра ЦIудара урхьула дубларти шагьуртазив, хабардерхурти «Артек» ва «Орлёнок» лагерьтазив.
Суздаль шагьарлизибси машгьурси музей чебаахъесра букибтири худграфла студентуни. Гьанна биалли ил музейлизир МяхIяммадли дарибти ваяхIра лер. Ил шагьарлизивад вакIибси ца режиссёрлис тамашадизурли, МяхIяммадли дарибти чумал урца гIягIниахъала музейлис ардухиб.
Ил шел дус учIули, чебяхIси даражала багьуди касиб ва Ахъушала кIиибил урга даражала школализив узес вехIихьиб.
— Дебали гIяхIси, уржибси коллектив бири ил школализиб, — бурули сай МяхIяммадли. — Директор сайри Насруллагь МяхIяммадов, (Будайчихъала), дила гIяхIси юлдаш ветаурсири ХIяжигIямар ГIябдуллаев, бунагь-хатIа урдуцаб чула! ИтхIели барх бузули калунти гьанна къаршибикалли, уркIи разибирули бирар.
КIел дус хIянчи барили гIергъи МяхIяммад МяхIячкъалализи гечиуб ва Дагъиста радиола даргала редакциялизив узес вехIихьиб. Ишаб барх бузули калунтира М.Маллаевли халаси хIурматличил гьанбуршули сай. Цакамси замана дикибхIели, МяхIяммадла къайгъни ва гъира хIисабдарили, музыкала редакциялис бекIдеш дарахъес хъарбариб. 27 дусла гIямруличив ил редактор ветаур.
— Ну даргала районтала дахъал шимази ваира, гьар шилизиб нушаб адамти разили гьунибиутири, хIядурдарибти программаби магнитофоннизи делкIахъес хIерли бирутири, — бурули сай М.Маллаевли. — Дахъал белкIани радиола фондлизи кадерхахъуртири, ил биалли хIянчизарлис гIяхIси кьимат сабри. ИшбархIиван гьанбиркур Усишавадси ГIисахIяжи МяхIяммадовли макьам бирхъули, Писки МяхIли далуйти дучIули, нуни магнитофоннизи лукIуси замана. Илди далуйти даргала радиоли бусягIятра дучIахъули лер.
1990 ибти дусмазиб, гьар-чинабалра кьяйдали, Дагъиста радиолизибра бархибдеш бетаур, — шимази вашес транспорт агарбиуб, гонорар убкасиб, алапа заманаличиб хIелуганбиуб. МяхIяммадли ижаралис мер сасили, унза-улкьай ва цархIилтира урцуйзирад гIягIниахълуми дируси цех абхьиб. Иличи бахъал заказчикуни башутири ва лебгIеб къугъаси хIянчиличи хIяйранкабирутири. Ил мерличиб МяхIяммадли вецIал дусличибра имцIали хIянчи бариб.
— Набчил варх худграфлизив учIули калунси дила ца юлдаш узули увухъун Дагъиста Пачалихъла къумукъла театрлизив ва илаб устаханала заведующийла хIянчи леб или буриб. Ну ила вякьунра ва хIянчиличи итмадан кьабулварира. ИлхIейчивад ишав узулра, байхъала ставка лебси саби начурбала театрлизибра. КIелра театрлизир спектакльтас хIяжатти декорацияби ва цархIилти гIягIниахълуми дирули узулра, кIелра театрлизив худсоветла членра сайра, дила пикриличи ишаб лехIирхъули саби.
Театрлизибси бузерилизиб МяхIяммадла кумекчи сай урши Шамил. КIелра рурсира илдала нешра школализиб бузули саби.
М.Маллаевла бузери хIукуматлира хIеруди агарли хIебатур, илала гIяхIцад ХIурматла Грамотаби ва Баркаллала кагъурти лер. Пагьмучевси адам, някъла хIянчила гIяхIси уста МяхIяммад ШяхIбановичлис халаси разидеш сабри ДР-ла культурала министрла шайзибад ХIурматла Грамота касни. БусягIят М.Маллаев кIелра театрлизир сагали кадирхьути спектакльтас хIяжатти декорацияби далкьарахъули узули сай. Арали ватаби, хIурматла МяхIяммад, гIурра дахъал къугъати секIал дарахъес, ЧевяхIсини арадеш габ хIед.
Нурислам Ванатов
