Гьалабван республикала хIулбазиб нукьсандеш лебтас хасбарибси хасси журала библиотекализиб регионна СМИ-бачил гьунибаъни бетерхур.
ГIяхIлас гьунивиули, библиотекала директор ХIяжи Малучиевли балбуцла бекIлибиубси мурадличила буриб — СМИ-бала кумекличил селра чехIебиути ва вайтIа чебиути адамтас, сабира республикала районтазиб хIербирути, пайдаличил замана беркIахъести шуртIри лерниличила багьахъни.
«Республикализир, хаслира муниципальный районтазир, хIулбазиб нукьсандеш лебти адамтас жагали замана беркIести шуртIри агара. Илдас хасбарибси библиотекала ишбархIи хъули жузи дурхьести, бучIанти «аудио» журала жузачилси онлайн-библиотекализи абицIахъести имканти лер».
Дагъиста багьахънибала ва печатьла шайчибси Агентствола руководительла заместитель Наида МяхIяммадовани баркаллала дугьби дуриб, библиотекали зягIиптас илцадра пайдаласи баркьуди дурабуркIнилис, ва Агентстволира илдала далдуцуни гIердурцниличила ва, илала дурабад, библиотекала телевидениела студиялизиб хIулбазиб нукьсандеш лебти бучIантас шадибгьуни дураберкIахъес бирниличила буриб.
ИшбархIи бекIлибиубси масъалали кавлули саби арадешлизиб нукьсандеш лебти дурхIнази ва халатази МяхIячкъалализибси «Республиканская специальная библиотека для слепых» ГБУ-лизиб разили ва пайдаличил замана беркIести имканти лерниличила багьахъни. Библиотекализир, тамашалати жузи дучIнила дурарад, жура-журала далдуцуназирра жигарчерли бутIакьяндеш дирес вирар.
Журналистунас библиотекакад экскурсия дураберкIиб ва дахъал жура-журала хIязанас хасдарибти ваяхI чедаахъиб: шахматуни, шашкаби, картаби, теннисла стол ва цархIилтира.
АхIерти гьалмагъуни, эгер хIушала гъамти-ургав хIулбазиб нукьсандеш лебси левли виалли, илис республикала сукъуртас хасбарибси хасси журала библиотекаличил бархбас кабизахъес кумекбарая. Илаб матъал сунес дигуливан замана беркIес вирниличила бурес гIягIнибиркур. Библиотекализи дакIес дирудая гIергъиси адрес хIясибли:
МяхIячкъала, М.ХIяжиевла уличилси кьакьа, 160А юрт; тел.: +7(8722)69-36-68.
ПатIимат Казимова
