2024 ибил дусла январьла 27-личир гъармука-фашисту­на­зи­бад Ленинград тамай азадбатахъурхIейчирад 80 дус диркули сари. Илаб, дунъяла халкь уркIаибси, бахъал бургъантани гъабзадеш ва игитдеш чедаахъибси дергъ кабикибсири.

1941 ибил дусла сентябрьла 8-личиб, ЧебяхIси ВатIа дергъ бехI­бихьибхIейчирад 79 ибил бархIи, СССР-ла северла шайчибси тах шагьар Ленинград фашистунала гIярмияли дергъла цIаличил алав­буцибсири.

Душмантани алавбуцибси шагьарлизиб кIел миллион 800 азир адам калунтири. Илдазибад авдарш азир дурхIни сабри. Шагьарлизир калунти берк-берж дебали камтири.

Аги илкьяйда биъни фашистунани балулри, ленинградланти гашазибад бебкIахъес пикрибарили, илдани «Бадаевские» бикIути берк-бержла складуни бомбабаладарибтири ва цIали дигубтири. Ленинградлизир улкаличил бархбас, хутI, цIабикьала кали ахIенри. Шагьарлис, душмантала някълизи букьес сабри калунси.

ИлхIели СССР-ла урхьула дергъла бургъантани, Ладога шарала лу­тIи­лиурад лебилра улкаличил телефонна ва хутIла барх­­басуни кадизахъур, ва набт башахъеси турба ­к­а­бихьиб. Иличибли шагьар мицIирли калахъес имканти акIуб.

Нушала бургъантас, чус берцуди баргес сегъуналра имканти агарси, миъбяргIибси шара ахъили, фашистунала хIярхIубала заблиуб, ахъси мерличир дарибти душмантала хандакьуни дурцес чевкъусири. Фашистуни биалли, ванзала удир дарибти дебати, ванати хандакьуназиб хIербирулри, илди шагьарланти гаши-дягIязибад бебкIайчи хIерликабирутири.

Германияла гъармукабани Ленинград­ла халкьличил иргъахънила хIянчи дура­буркIулри. Илдани халкь хIукуматличи ва нушала бургъантачи къаршили дурабухъахъес жибирулри ва чули илдас дарес бирути гIяхIдешуначила гапбикIулри. Амма илдала гьархIебизур. Шагьарлизир даршани репродукторти даршиб. Илдазибад, бебкIесли гушти дикторти, дуги-хIери шагьарла халкьличил ихтилатбикIулри. Илди ихтилатунани шагьарлантала уркIбазибси кахдеш, цундеш, гашазибад бебкIа гьарахъдирулри. Лебилра халаси улка Ленинградла халкьличил барх сабри. 1942 ибил дусла январьличиб Ленинградлизиб 107 азирлим 477 адам алхунтири, гьарил 10-лизибад 9 адам гашазибад беб­кIиб­ти­ри.

Алавбуцибси Ленинградлизив калунси академик Д.Лихачёвли белкIи сай: «Гашазивад убкIуси адамцун гьарли-марли хIерирули сай, илизирад дунъяличиб лебси убяхIдешра ва черяхIти адамдешра дурадулхъули сари». Ленинградлантазир черяхIти адамдеш чедидикибтири.

Някълизиб суратуни дируси щёткаличил (кисточкаличил) гашали вебкIибсири Моисей Ваксер. Илини немецуначи къаршили халкь жибирути плакатуни суратдирутири. ВебкIес гьалав, 1941 ибил дусла декабрьличиб, илини, сархибси чедибдешла хIурматлис, челябкьлализиб, шагьарлизиб бируси паркла суратбарибсири. Архитектор Александр Никольскийра чедибдеш сархниличи ташмишикIули ахIенри. Алав­буцибси шагьарла цаибти, кахти яни­лизир илини шагьар азадбатахъурти бургъантала хIурматлис тIашдалтути арсавартала (триумфальные арки) суратуни дарибтири. Ит янилизиб, репродукторлизибад халкьличи биуси Дмитрий Шостаковичла 7-ибил симфония ленинградлантала рухIла чедибдешла лишанни бетаур. Шагьар алавбуцибси цаибси бархIиличирад, ил азадбатайчи халкьличил рарх сарри поэтесса Ольга Бергольц. «Чилра ва селра хъумартурли ахIен», — рикIулри ил сунела назмуртазир. Халкьла уркIбачи гьуни баргибти илала дугьбани ленинградлантани чекасибти мусибатуни, игитдешличи шурдалтулри.

Нушала гIярмияли гьачамцун ахIенри кьасбарибси Ленинград алавбуцибси немецунала дергъла мява гьарасес. Амма илдала гьархIебизур, фашистунала цIакь бячIес имканбикIули ахIенри.

1943 ибил дусла январьла 18-личиб ну­шала гIярмияли «Искра» бикIуси гьужум дураберкIибсири. ИлхIели 8-11 ки­ло­метрла бягIудешличилси ванза гъар­му­ка­-фашистуназибад азадбатахъур. Или­чиб­­ли 872 бархIи-дуги бухъянбитIунси Ле­­­нинград-алавси дергъла мява гьаббердибсири.

Ладога шарала югла шайчирти дубаникад, 18 бархIила бухIнаб 33 километрла бухъяндешличилси мегьла гьунира, Нева хIеркIла чедиб гумира дариб. ИлхIели Ленинградлизи берк-бержли дицIибти поездуни гьайдиуб.

«Искра» бикIуси гьужум хIядурбарибси ва бетерхахъурси маршал Г.Жуковлис генералисимусла у бедиб.

Ил гьужумлизиб 34 азир нушала гIярмияла бургъанти алхунтири, 88 азир бяхъибти ва къел-хIерзи агарли бетахъибтири. Иличибли багьесли саби сецад цIакь лебрил фашистунала.

1944 ибил дусла январьла 14-личиб ленинградланти адам гIянцIвирахъути, къу­къуличирра ахъти гурла тIамали чебаргъахъиб. Гьарахълар даргудути тупала хIяр­хIубани мерсдакьунхIеливан шагьар гар­дарбирулри. Илдигъунти тIама-гьа­ма­личил душмантазибад Ленинград тамай азадбатахъурси «Январьла къукъу-рямкьяр» (Январьский гром) бикIуси дергъла балбуц бехIбихьибсири.

29 баз Ленинград алавбуцили тIашка­би­зурти немецунани цацадехIти мераначир 260 километрличи мурхьли, нушала гIярмия гьалабяхI хIебукьяхъес кьасличил, гьалабизуни дарилри. Гьалар-гьаларти немецунала хандакьуначи бетаэс багьандан, нушала бургъантас итхIелила дергълизир дузахъути, бегIлара чердикIибти гьалабизуначилти, минабани буцибси, 400 метр ахъес гIягIнилири. Дергълизи каберхес гьалаб нушала гIярмияли халаси хIядурдеш барилри. Лерилра секIал гьаланачи пикридарибтири ва къукъулагъуна тIамаличил немецуни уркIиули, бургъанти гьалабяхI арбякьунтири. Ил дергълизир, 6 бархIила духIнар, нушала гIярмияли немецунала 2 дивизия къирдариб, калунти гIурра шел дивизиялизирра гIяхIцад детахълуми детаахъур. Ил балбуцлизир, Ленинградличи гьар бархIи тупала хIярхIуби иргьути, 200 кункти ва 85 декIти, тупи дуциб. Илала гIергъи немецунани Ленинградличи цалра тупла хIярхIя чехIекьур. УркIецIиагарси, кьяркьси дергълизир Пушкин, Слуцк, Гатчина шагьурти ва алавчарти гIяхIцад ши­ми азаддатахъур. Иличибли Германияла гIяр­мияла гьалабиз пашкабехъуб. Нушала гIяр­миялис гьалабяхI башес гьуни гьаргбиуб.

1944 ибил дусла январьла 27-личиб  Ленинград фашистуназибад тамай азадбатурли биъниличила радиолизибад халкьлизи багьахъурсири. Сархибси чедибдешла хIурматлис 24-йна 324 туп къяйкдарили, Ленинградлизиб салют дураберкIиб.

1945-1946-ибти дусмазиб Нюрнберглизиб дураберкIибси фашистунала такьсирти белгидируси диванничиб 630 азир ленинградлан гашазибад ва бомбабалабарили алхниличила бурибсири.

Ленинград азадбалтахъуси дергълизир 1200 дагъистанлай бутIакьяндеш дарибтири. Илдала ургав левсири Лакла районна Куци шилизивадси Мигьраб Ибрагьимовра. Лейтенант М.Ибрагьимовли хIялумцIантала (разведчики) ротала командир сайри. 1942 ибил дусла янвнарьла 13-личив сунела бургъантачил варх душмантала хандакьлизи ухIнаухъи, ца суненицун 12 фашист кабушибтири, лебилра бургъантани 40 фашист къирбарибтири, кIел пулемет ва ДЗОТ дуцибтири. Дергълизир чедаахъибти гъабзадеш багьандан, Мигьраб Ибрагьимов ХIунтIена Зубарила орденничил шабагъатлаварибсири.

Ил Ленинград азадбалтахъути дургъбазив, кIелра шайчирад дашути хIярхIубала заблиу викили, бургъантира сайра къел-хIерзи агарли ветахъибсири. Дергъ каберхурли 65 дус дикибхIели, къел дурцантала кьукьяли илала орден баргибсири ва илизибси номер хIясибли чи саял белгибарибсири. Илала лига-кьякья МяхIячкъалализи хили, бургъантала хIябрази хIяридихьибтири. ХIунтIена Зубарила орден илала уршила уршилизи бедибсири.

Ленинград ва лебилра улка азадбалтахъухIели, нушала бургъантани дакIударибти игитдешличила хъумартурли ахIен, илдала гьунартачиб бяркъ касибти бургъантани гьаннара дявила хасси балбуцлизир бутIакьяндеш дирули сари, дунъяличир миллатчидеш тIинтIхIедиахъес, улкала гьала тIашдизурти мурадуни сархес жан ахIерахIедирули бургъули саби, лебилра улкала халкьли бургъанти гIеббурцули саби.

Муъминат Хаттаева