ВатIайчи дигичебти, саби акIубти мер-муса гьаладяхI ардукес къайгъилизибти жагьилти чебиухIели, уркIи пахрули бирцIур.

ХIера, илдигъунтала лугIилизивад бегI гьалав гьанушес рирусра МяхIячкъалала депутатунала Собраниела гьалабси жагьилтала Парламентла председатель ГIялигъалбицI ХIусейновра. Иш яргализиб илини газета къулбасбирнила хIяракат жигарчебли гIеббуциб. ГI.ХIусейновли сай акIубси шилизи «Замана» газета къулбасбариб. Гьанна илала икьалаличил ХIурхъила школали, шилизибси мижитли ва гIурра чумал адамли дарган мезли дурабулхъуси газета кайсу. Илдигъунти баркьудлумазир ахIену, гьатIи, гьарли-марси патриотла вегIла аслу-миналичи диги дагьардулхъутира?

ГIялигъалбицIли нешла мез мяхIкамдирнилизи белгиси пай кабирхьули, жагьилтани газетаби-журналти къулбасдирнила мягIничебдешличила аргъахъиб.

«Нунира газета къулбасбируси ва бучIуси саби. Ил вегIла халкьла гIядатунала хIурматбирни саби. ЦархIилтира газета гIеббуцахъес жибирулра. ИшхIелла манзил дебали мягIничебси саби даргантала гIямруличила, тарихличила ва культураличила буруси печатьла издания гьалабяхI башахъни. ХIушазивад гьарилли биалли, ил шайчиб кумекбарес вирар. Дигахъира иличила сеналра хъумхIертули», — бурули сай илини.

Нушаб биалли, баркалла эсцун саби кавлуси. Дарганти-ургаб ГIялигъалбицI ХIусейновгъунти сиптакарти, кьасчебти жагьилти бахъбааб!

П.Жалилова