ГIергъити чумал дусла духIнар халкьла гIямрулизир кадиркути разити анцIбукьуни илцад-декIар дахъал ахIенри. Или биалра, уркIи разибарестира камхIедиуб. 2024 ибил дусла ахирличиб дурабухъунси «Дарган мезла синонимтала словарь» лебил даргантас сагаси дуслис пешкешбарибси дебали гIяхIси савгъатли бетаур. Илала автор сай даргантас тянишси гIялим-лексикограф, лингвист филологияла гIилмуртала кандидат Хизри ГIябдулмажидович Юсупов. Дусла ахирличиб ДФИЦ РАН-ла мезла, литературала ва искусствола шайчибси институтлизиб баягъи словарьла презентация бетерхур. Илизир бутIакьяндеш дариб даргала интеллигенцияла вакилтани, дарган мез руркъути гIялимтани, университетунала преподавательтани, Халкьла Собраниела депутат ХIябиб МяхIяммадовли, «Тарихла-культурала букьур» жамигIятла организацияла руководитель П.Кь. БяхIяндовани ва цархIилтани.
ДГУ-ла урус-дагъиста мезанала факультет таманаибхIели, Х.ГI.Юсупов Киевлизибси М.Ф.Рыльскийла уличилси искусствоведениела, фольклористикала, этнологияла институтла гьалабси аспирантурализи керхур ва «Обрядовая поэзия даргинцев: общее и локально особенное»» бикIуси даргантала гIядатунала поэзияличила кандидатдешла диссертация защититьбариб. 2006-ибил дусличивад ил гьанна ДФИЦ РАН-ла мезла ва литературала институтлизив узули сай. Хизри Юсупов 150-йчирра имцIали гIилмула хIянчурбала, 5 монографияла ва 5 словарьла автор сай.
Илала дуравад Хизри Юсупов назмурти лукIуси поэт ва РФ-ла писательтала Союзла член сай. Гьанналис гьалар илала назмуртала 12 жуз дурадухъи сари.
Дарган мезла синонимтала словарь хIядурбирули, дарган гIялим 3 дусцадхIи узули калун (2021-2024). Илгъуна халаси словарьла чебкад барибси мекелли халаси хIянчи саби ил. Словарьли дарган мезла дугьбала 12 500-цад синоним духIнадурцули сари, чузира хIябал азирличирра имцIали синонимтала къяй кадурхути.
Бурес чебиркур, гьачамлис Дагъиста цалра мезлизиб синонимтала словарь дурабухъунси ахIенри. Ил багьандан дарган мезла синонимтала словарь Дагъиста цархIилти мезани-ургабра цаибил хIянчи саби. Словарьлизир дарган мезла синонимти урус мезличи шурдатурли, илдала мягIналашалти хасдешуначила цацадехIти баянти гьаладирхьули сари. Синонимтала словарь филологунала бягIуси авидлис, писательтас, поэтунас, журналистунас, тилмажунас, преподавательтас ва студентунас, учительтас, бучIантас ва илкьяйдали дарган мез руркъути лебтасалра хасбарибси саби.
Даргала литературный мез гьаладяхI дашахънилизи ва илди мяхIкамдирнилизи мягIничебси пай кабихьни багьандан, Хизри ГIябдулмажидовичлизи баркалла балахъулра ва челябкьлализибра илини дарганти филологияла гIилмулизир диахъубти пагьмучерти сархибдешуначил гьатIира разибирахъниличи дирхулра.
П.Сулайбанова
