Республикала районтала больницабазиб ва шимала амбулаториябазиб медицинала хIянчизарти хIебиънила масъулти тIашли сари. Жагьилти специалистуни шимазиб бузес букьес гьалакбикIули ахIен. Илди шимази битIакIес, ФАП-ани хIянчизартачил гIердуцес ибси мурадличил дузесаибти сари «Земский тухтур» ва «Земский фельдшер» бикIути программаби.
ХIера, «Земский тухтур» программа хIясибли, жагьси тухтур-терапевт Гулбарьят МяхIяммадовани Сергокъалала районна центральная больницаличил шел дуслис вягIда бигьи, ХIурхъила шилизир рузес рехIрихьибсири.
«Терапияла шайчибси интернатура таманбарили гIергъи, Сергокъалализи ракIибсири ва, хIянчила хIекьлизир, районна больницала бекI тухтур ГIяли БяхIяммадовличи дугьаризурсири. Илини ХIурхъила шилизибси амбулаториялизиб хIянчи гьалабихьиб. Гьаланачи ну пикрирухъунра, сенахIенну ил ши нуни бекIлил балуси ахIенри. БегIтази гъайрухъунхIели, илданира бекI тухтурла пикри гIеббуциб. ИлхIели, 2016 ибил дусла ноябрьла 6-личирад, ХIурхъила амбулаториялизир къатIла (участковый) терапевтли рузес рехIрихьибсири.
Бархьли бурасли, гьаланачи цакьадар къияннири: сагати мер-муса, хIебалути адамти. КIинайс гьар секIайчи бурсикариубра, шантира гъамти адамти кьяйда кабизур. Гьаннара цацабехIтачил бархбас бузахъулра.
ХIянчиличила гъайрикIасли, гIяхIцад анцIбукьуначил дяхIягира, халати устадеш касира. ХIурхъила шилизир рузес кьадарбиъниличи гьачамалра пашманхIериубра, бархьли бурасли. Шел дусра хъярхъли ардякьун. Ну кьалли 1-2 дус хIянчи бирис, гIур районнизи шуррулхъас ибси пикриличил рузес дурарухъунсиригу, коллектив уржибси биънили, адамти ва хIянчи гIяхIдилзули, 2023 ибил дусличи бикайчи илар рузули калунра», — рикIи тухтур.
Гулбарьят МяхIяммадова тухтур ретаэс риштIахIейчирад хьулрикIусири. 2009-ибил дуслизиб Сергокъалала 2-ибил школа мургьила медальличил таманбарили, Дагъиста пачалихъла медицинала университетлизи карерхурсири. Вузра Гулбарьятли ункъли хъараахъурсири. Илис гIергъи МяхIячкъалала 2-ибил больницализиб интернатурара таманбариб. Бузерила цаибти гунзри ХIурхъила амбулаториялизир сари илини кацIибти.
БусягIятла замана жагьси специалист Г.МяхIяммадова, адамла духIнарти биркIанти эндоскопличил ахтардидируси тухтурла санигIятличи регIриубли, Сергокъалала районна больницализир эндоскопистли рузули сари.
ПатIимат Мирзаева
