Сагаси Дусла байрам гъамбикIухIели, нуша шакдиркулра нушала гIямрула цагьатIи дус каберхниличила. ХIера, илцадра жявли аркьули сари гIямрула бурхIнира, бузрира, дусмира.
ИлхIели пикридулхъулра сегъунали бетаурал нушаб шалгIеббулхъуси дус, сегъуна хIянчи барес бажардидикира нуша ил заманала духIнар, диубрара сархибдешуни диахъес яра, гьатIира ургIебли, башрила бетуцлизир, азгъиндеш дакIударили, хIярхIдиубрал. Илди ва цархIилти дахъал пикруми бекIлизир жургъдикIули, лукьули дирар дусла ахир гъамбикIухIели.
Газетала хIяракатличила гъайдикIахIелли, дус нушаб сабухъчебсили бетаур или гьанбиркули саби. Дусла духIнар сецад диуба даргала культурала, литературала шайчир дурадеркIибти пергер далдуцуни. Илдазирад дахъалгъунти нушала ахIерти нешла мезличилра детерхур: лебталалра бутIакьяндешличилси дарган мезла диктант; шягIир акIубси ХIурхъила шилизиб Сарат ГIялиева акIубхIейчирад 100 дус дикнила балбуц, Сергокъалала районна администрацияла заллизиб УмуряхIил Шапиева акIубхIейчирад 100 дус дикнила юбилей (гьар мурталраван, илди ахъси даражаличир дурадеркIесра имканбакIиб) ва цархIилти. Ишдус даргала гIяхIцад поэтуни-писательтала юбилейти сарли урдухъун. Илди нуша-ургаб мицIирли агарли биалра, жагьилтала наслулизи хъумхIертахъес, илдала хIурматлис далдуцуни дурадеркIни гIяхIсилизи халбирулра. Буралли, илдигъунти гьунибаъниби детерхур ГIиса ГIямаровлис, Ильяс ХIясановлис, Айдимир Каймаразовлис хасдарибти. Дарган мезла диктант биалли, Рабадан Нуров акIубхIейчирад 135 дус дикнилис хасбарибсири. Гьайгьайрагу, нушанира илдазир жигарла бутIакьяндеш дарира ва газетала бяхIяназиб, социальный сетаназиб бучIантази илдачила багьахъурра. Газета бучIантас дебали гIяхIдилзули сари илдигъунти далдуцуначир касибти жагати видеоби гьаладирхьухIелира. Илдазибад бахъалгъунтани, редакцияла хIянчизартачил ихтилатра бузахъули, чула аслу-минала шимачила суратуни дурхьули сари, газетала Телеграм-каналлизибси бяхIлизир чедаахъес кьасли.
ГIе, нуша хIердирулра лугIурбала бетуц (цифровизация) гьалабяхI башуси манзиллизир. ИшхIелла жагьилтани имцIаливан дузахъули сари телефонти ва компьютерти. Ил багьандан, заманаличил дарх дашес кьасли, нушанира газетала сайт ва социальный сетани жигарчерли пайдаладирулра, илар даргантас дигести макьалаби гьалардирхьули. Илала дурарад, лебтасалра дигестили детаурли сари даргала халкьла буралаби. Илди шуртдалтнила хIяракатлизирра бучIантани бутIакьяндеш дирули бирар. Дила пикрили, дарган мез хIедалусилара иштяхIдулхъан буралализиб сегъуна мягIна бухIнабуцилил аргъес. Бахъал бирар ихтилатлизи ихъути, чули бархьли шурбатес бирулил-ахIенал ахтардибирули.
Амма, сецад Интернетла имканти дахъал диалра ва илди зумали дузахъули диахIелра, социальный сетанани газетала мер хIебурцу. Типографиялизибад бара дурабухъунси ил касили, хIурпри кадяхъибси ширла ва букIулси кагъарла тIем сунтIбарили, газета белчIес — хIера, сегъуна тIягIям сабил. Ил багьандан дигахъаси нушала жагьилтанира илала мягIна аргъили ва газета бучIес иштяхI имцIабикIули. Нушани биалли, къайгъибирехIе дируцад газета жагасили бетаахъес. Гьайгьайрагу, хIушазивад гьарилли нушала къайгънира гIердуцили дигахъира, сенахIенну миллатла культурала рухIла давла мяхIкамли бихIуси газета лебилра даргантала дархти ва уржибти баркьудлумала хIясил саби. Нушала дурхъати гIядатуначи хъарахъили, сагали лябкьуси дуслизирра газета бучIантачилти бархбасуни гьатIиралра дебадиахъес чебиркур.
ХIурматла газета бучIанти, ахIерти дарганти, дигулра хIуша лерилра Сагаси Дусла байрамличил уркIи-уркIиларад мубаракдирули, дунъяла лерилра гIяхIдешуни далгес. Гьарилла хъулир разидешра, талихIра, баракатра каммадиаб! Гьайгьайрагу, илдачил барх хIушачи мурталра гIяхIти хабуртачилцун гIяхIладли абицIули дигулра нушала газетара! Сагаси дуслизирра хIуша нушачил дарх калниличи халаси бирхаудира леб.
Дигахъеная нушаб хала бегIтани букьурли датурти нешла мез, къулбасдиреная ва дучIеная дарган мезли дурадулхъути газетаби-журналти!
Салимат ГIялиева
