Хайдакьла районна ЧIибяхIнила шилизиб ихтиюрти далтахъути органтала хIянчизар, полицияла сержант СултIан Жаруллаев гьаниркахънила уркьули абхьиб. Республикализиб июньна 23-личиб биубси гьужумлизив ил алхунсири. Ил гьакIлизиб полицияла 16 хIянчизарла гIямру къябдердибтири. Сунени чедаахъибти гъабзадеш ва чIумадеш багьандан, Россияла Президент В.В.Путинна ХIукму хIясибли, С.Жаруллаев алхи гIергъи, Гъабзадешла орденничил шабагъатлаварибсири.
ГIяхIгъабза хIерируси юртла мякьлаб, ил гьаниркахъули, районна ва шила администрациябала хIянчизарти, ЧIибяхIнила школала мугIяллимти ва бучIанти, Хайдакьла районна шайчибси ОМВД-ла хIянчизарти, СултIаюлдашуни ва тухумти учибикиб. Илаб учибикибтачи саламтачил дугьаизур районна бекIла заместитель Халитбек Халитбеков. ГI.Темирбулатовла шайзибад илини С.Жаруллаевла бегIтази пашмандеш багьахъур ва гIяхIгъабза айкьнилис баркалла буриб.
«Дебали пашманси ва кьутIкьуси анцIбукь саби хасси балбуцлизир бутIакьяндеш дирути ва полициялизиб бузути нушала уршби къачагъунала някъбазибад итил дунъяличи арбашни.
ГIялим МяхIяммадовичли С.Жаруллаевла бегIтас цIакьли халаси баркалла балахъули саби, гIяхIгъабза урши айкьнилис. ЧIибяхIнилизибси ца кьакьали гьанна илала у бихули саби. ИшбархIи нушани СултIан гьаниркахънилис хасбарибси уркьули ибхьулра. Нушаб ва чеалкIуси наслулис сунела ВатIа гьарли-марси патриот сайливан, гъабзадешла гIибратли ветарар ил», — буриб илини.
С.Жаруллаев гьаниркахъули, малхIямти дугьби дуриб иличил варх узули калунси ГI.Ибрагьимовли, ЧIибяхIнила шила администрацияла бекI ХI.ХIусейхановли, илала узи М.Жаруллаевли , шила школала мугIяллим М.ХIясановли ва цархIилтани.
КIинайс биалли, школала бучIантани С.Жаруллаевла гъабзадешла баркьуди чебяхIбирули, илис хасдарибти назмурти делчIун. Уркьули абхьиб Халитбек Халитбековли ва дудеш Шамсудин Жаруллаевли. Илис гIергъи минутла лехIдеш багьахъур ва уркьули-алав вавни кадихьиб.
Хайдакьла районна администрацияла пресс-служба
