МяхIяммадшапигI ГIялиханович ГIисаев 1944 ибил дуслизив Лавашала районна МикIхIила шилизив акIубсири. Илдала хъалибарглизиб урегал урши лебтири, МяхIяммадшапигI виштIасигъуна сайри. Халалгъуна узи Хизри мегьла уста сайри, гIурилти авалра – Ильяс, ГIялихан, Киров, Шамил мицIираг адилкьанти бетаур.
МяхIяммадшапигI ГIялихановичли 1970ибил дуслизиб ДГУ-ла филологияла факультетла урусла ва Дагъиста мезанала отделенилизиб чебяхIси даражала багьуди касиб. 1978 ибил дуслизиб ХI.ЦIадасала уличилси ИЯЛИ-ла аспирантурализиб белчIуди хъараахъур, цазаманализив ДГПУ-ла Дагъиста мезанала кафедрализив преподавательли узулри. Илини даргала мезлизир глаголтачилти дугьбала цалабяхъуни ва илдала бархбас руркъусири.
«Дарган мезлизир глаголличил дархдасунти дугьбала цалабяхъунала каргьурдеш» бикIуси, сунезир 22 бяхI лерси гIилмуртала кандидатла хIянчи белкIун ва 1982 ибил дуслизиб ИЯЛИ-ла аспирантурализиб бетерхахъур, филологияла гIилмуртала кандидат ветаур.
«Дарган мезлизир дугьбала делхъхIеделхъути бутIни каргьнила тяхIяр-кьяйда ва илдала мягIна» (Структурная организация и семантика фразеологических единиц даргинского языка) бикIуси, гIилмуртала докторла, 53 бяхI сунезир лерси, хIянчи белкIун, 1996 ибил дуслизиб ил кабизахъур ва гIилмуртала доктор ветаур. 1988 ибил дусличивад ХI.ЦIадасала уличилси ИЯЛИ-ла литературала бутIализив грамматикала хIялумцIуси отделлис гьуни чебиахъули узусири.
Илини сунела бекIдешлиуб мезла гIилмуртала 6 кандидат хIядурбариб ва сай профессор ветаур, 100-личирра имцIали гIилмула хIянчи делкIун ва печатьлизир дуракаиб.
Илала чердикIибти хIянчурбази кадурхули сари «Дарган мезла дугьбала цалабяхъуни ва школализир илди руркъни» бикIуси жуз. Жузлизир 100 бяхI лер, Дагучпедгизлизиб 1000 тиражличил 1982 ибил дуслизиб дурабухъунсири. Жузли школала учительтас дурхIнази дарган мез дяркъяхъес халаси кумек бирусири.
160 бяхI сунезир лерси, шуибил класслис хасбарибси «Дарган мез»-ла жуз Дагучпедгизлизиб 1991 ибил дуслизиб дурабухъун. Жуз М.М.Мусаевли ва М.ГI.ГIисаевли барх хIядурбарибсири.
11 азир дев сунези кадерхахъурси «Урусла ва дарган мезла словарь», 8 азирла тиражличил 1988 ибил дуслизиб дурабухъунсири.
МяхIяммадшапигI ГIисаевли дарган мезли назмурти, поэмаби, хабурти лукIутири. «Алкан дила зубари» бикIуси назмуртала жузра дуракаибсири.
МяхIяммадшапигI ГIисаев Дагъистан Республикала гIилмула урибси хIяракатчи сайри.
Ил бегIлара гIямру вавалидяхъибси замана, 2006-ибил дусла сентябрьличив, 62 дусла гIямруличив итил дунъялизи арякьунсири, детхIедерхурти кьасанира пикрумира гIелар датурли. Калунси виалри, ишдуслизив ил 80 дус вирусири, нушаб ухахъули, сунела пагьмула ва кьасанала чумал зубари калахъесра вирусири.
МяхIяммадшапигI ГIялихановичлис спорт дебали дигахъусири ва сай-алавти спортлизи ахъахъес жибирутири. Дебали дигеси саби даргантани, микIхIентани, МяхIяммадшапигI ГIисаев хъумхIертурли, машгьурси гIялим-филолог, поэт, писатель, публицист, тилмаж гьаниркахъули, гьар дус МикIхIила шилизибси спортла школализир районти-ургарти волейболла абзани дурадуркIни. МяхIяммадшапигI ГIялихановичла уршби Камил ва Запир ГIисаевхъалани абзаназир мурталра бутIукьяндеш диру, абзани харжаначил гIердурцулира бирар.
МяхIяммадшапигI ГIялиханович ГIисаевгъунти черяхIти кьасанала ва пикрумала бегIти даргантани дунъя жявли бархьбалтули, даргала культура, искусство, литература мискиндирули сари. Гьанна хIербирули лебалтани ва чеалкIуси наслули илди хъумхIертурли, юбилейла дусмазиб илди гьанбиркахъули, илдани алкунти пагьмуртала зубарти шаладикIахъахъули, илданиван миллатла багьа ахъбурцули гIямрула лерил бурхIни деркIес гIягIнили саби.
Пагьмула, гIяхIти кьасанала зубарти дилшути ахIен, илди чеалкIути наслубас гьуни чебиахъули, ухули кавлути сари.
Муъминат Хаттаева
