«Азир дус – тарих хIела,
Дила Ахъуша – Дарга,
Миллатдешлис даргала
Хьулчи белшунси улка!
Берхъаби, ВатIан дила.
Дурхъал Ахъуша-Дарга!
Дагъиста, Россияла
Шанданван чIумал къала!
Дагъиста дубуртала
Минабиубси дайла,
Берхъаби, ахъбикIаби,
ГIязиз ванза нушала!
Шимикад Хъар Даргала
Пукьнигъунти чIакнала,
ТIинтIлири, ВатIан дила,
Пахру лебил даргала.
ХIела халкь мар-хIялалти
ЗяхIматчиби сакIубти,
Игитуни – бурибти,
ГIялимти – гIилму мурхьти.
ХIела Шайх-Устазуни,
Дурхъабарибти Дарга,
ГIиниз умуси динна,
Дила Ахъуша – Дарга.
Машгьурси Дагъистанна
Хабар ахъси ца бутIа,
Азадти даргантала
Мина -агьлула Дарга.
Берхъаби, ВатIан дила,
Дурхъал Ахъуша – Дарга,
Дагъиста, Россияла
Шанданван чIумал къала!»
Гимнла — дезала дугьби ва макьам делкIунти сари ХIямшимала шилизивадси МяхIяммад-Запир НурмяхIяммадович ГIябдуллаевли.
Ахъушала район акIубхIейчирад 90 дус дикибси манзиллизир гьандушес гIягIнили сари пагьмучебти адамтала уми, чулира районничила гIяхIси хабар тIинтIбирнилизи мягIничебси пай кабихьибти.
Илдигъунтала лугIилизивадси сай даргала гимн белкIунси МяхIяммад-Запир ГIябдуллаев, сайра ХIямшимала шилизивадси ЧебяхIси ВатIа дергъла бутIакьянчи НурмяхIяммад ГIябдуллаевла хъалибарглизив акIубси ва ишбархIи Дагъистан Республикала бегIлара машгьурти адамтала лугIилизи керхурси.
МяхIяммад-Запирла чумал жуз дурадухъи сари, чузира назмуртицун ахIи, далайлис хасдарили делкIунти ва илдачи далдикибти макьамтира кадерхахъур.
«Саламти» ибси уличил дурабухъунси М.-З.ГIябдуллаевла жузлис гьалагъайлизир даргала машгьурси гIялим, критик, филологияла гIилмуртала доктор ГIябдуллагь ВяхIидовли ишкьяйда белкIи сай: «Далай бетаахъес багьандан назму макьамличил балбикили, макьамличи балбикахъес багьандан назму каргьурсили биэс гIягIниси саби. Къиянси ил баркьуди хIякьикьатличи шурбухъахъес бажардииркули сай иш жузла автор — Дагъиста пачалихъла университетла юридический факультетла деканна заместитель, историяла гIилмуртала кандидат, доцент ГIябдуллаев МяхIяммад-Запир».
Марлира, МяхIяммад-Запирли назмула тугъира делкIи, илдачи макьамра балбикахъили цаладяхъибти далуйтани даргала чумилра жагьил далайчис машгьурдеш хиб, илдала пагьму ва устадеш гьаргдарили, адамтала уркIбазир гIяхIти пикруми акIнилис сабабли детаахъур.
Цаличир ца жагали зайдикIути дугьбира макьамтира дархдикибти дахъал далуйтала автор МяхIяммад-Запир ГIябдуллаевла белкIаназиб имцIасигъуна мер бурцуси, гьайгьай, хьунул адамли саби: нешлис, рурсилис, уркIили черрикIибсилис. МяхIяммад-Запирла поэзиялизиб бахъал цархIилти поэтуназиб агарси ца къиликъ леб.
Иличила бурес дигулра ишкьяйда: Расул ХIямзатовла белкIаназир ишдигъунти дугьби делчIунтири нуни: «Дила поэзияла узбани камли лукIули сари назмурти, сарира рузбас ба-гъишладарибти. Рузбала диги биалли, бегIлара умути хIяланазирад сари, – неш хIеррикIар уршили сегъуна къуллукъ гIеббиахъул, хьунуйс дигахъу муруй даим гIяхIси хIеруди гIеббурцули, рурси пикририкIар дудешли гьар секIал бекIдирес гIягIнити сари или. Рузи селичилра хIерхIерикIар, рузис узи дигахъу, чIянкIли узи виъни багьандан. Рузбас хасбарили назму белкIунси поэтла баркьуди нуни гъабзадешлизи буйгIули вирус».
ГIячихъси саби, рузбира биэс гIягIнили бургар узини назмулизиб гапбарести, ил сабабли дургар МяхIяммад-Запирли рузбас къугъати тугъи багъишладарибтира.
Илдазирад ца — Ахъушала районна больницала тухтур Раисат ГIябдуллаева нунира гIяхIил ралусири: дяхI шаласи, халаси багьудила регI тухтур гIямрулизирад аррякьун, ламартла изайзибад цархIилти берцахъес рургъули.
2017 ибил дуслизир узини сунес багъишладарили жагати дугьби делкIунхIели, чис гьанбиркусири хIябал дусла гIергъи дунъяличи кахси изала тIинтIбирар ва илини балцIунтиван гIяхIти адамтира, тухтуртира арху или!
«Адамлис къиянхIели,
Къараулван тIашрилзан,
Бархьси сабаб баргили,
Излумачил дяв биран.
Тухумтала анхълизир,
Дару – дарманна вава,
ГIямру дерхъаб, Раисат,
ДулекIла рузи дила!…»
МяхIяммад-Запирла адамдешличила бикьридеш дируси цагьатIи баркьуди гьанбушес дигулра. ГIячихъси саби, поэтунала саби-ургаб пагьмулашалси абз, жал агарли биэс бируси ахIен. ЦархIилла гьарбизурли, гьалавяхI арякьи хIейгутира лебти саби. М.-З.ГIябдуллаевли се барилив – даргала бахъал поэтунала назмуртас макьамти делкIи, машгьурти далуйти детаахъурлицунра ахIи, илди автортала белкIани сунела назмуртала жузлизи кадерхахъурли, иличирли машгьурдарили сай. Нуни илгъуна анцIбукь бегI гьалаб саби чебаибси. Иличи балбикибси кьимат дарган мезлизиб «адамдеш» ибси дев саби.
Гьаннала гIергъира пагьмучевси поэт, композитор, педагог МяхIяммад-Запир ГIябдуллаев адамдешличил гьалавяхI вашули, сунес дигутани разивирули, дакьибсини хъумхIертести дугьбира агурбира имцIадиубли дигулра!
П.Маллаева
