ГIядатлибиубливан, бегIтани бехIбуцибси педагогла гьуни дурхIнанира илдала баркьибтанира даимбирули бирар.
Дунъяла къакъличир гIяхIцад санигIятуни лер, гьариллизиб – чула наслуби. МугIяллимтала наслуби хъалибаргла ва арагIебли улкалара пахру саби викIалра къяна бетхIерар. МугIяллим уркIи малхIямси, дурхIначи дигили вицIибси ва сунела баркьудилис марси адам сай.
Гьаннала заманализив педагогли узес багьандан, сегъунти яхI-сабур диэс гIягIнити?
Хъалибаргла Дусла дазурбазир мугIяллим Агъамирза Маммаевла хъалибаргличил тянишдирулра.
Агъамирза Маммаев акIубси сай 1935 ибил дусла июльла 15-личив Хайдакьла районна Жинабила шилизив, хъубзарла хъалибарглизив. Ил 7 дус виубхIели, шила бехIбихьудла 2 дусла школализив учIес вехIихьибсири. Ил таманбарили, ГъярацIанила 7 дусла школализиб белчIуди даимбарибсири. Ил виштIахIейчивадал мугIяллим ветаэс хьуликIусири. 1954 ибил дуслизив Сергокъалала педучилищелизи керхурсири. Ил хъараахъурли гIергъи, 1958 ибил дуслизив Шилагьила школализив узахъес вархьибсири. Педучилище таманбарили гIергъи, А.Маммаевли ДГУ-лизиб чебяхIси даражала багьудира касиб. Вузлизиб бузути халати устадешчебти преподавательтани жагьил адам чебяхIси даражала багьудлумачил вегIвариб. Илкьяйдали илди А.Маммаевлис гIяхIти насихIятчибира бетауртири.
1960 ибил дуслизиб Агъамирза Маммаев сай акIубси шилизи мугIяллимли узахъес вархьибсири. Шила школализиб илини сай мурхьти багьудлумачилси, чеветаибси, низам-кьяйда дузахъуси адам виъни чебаахъиб.
Илини бучIахъули калунти дурхIни-ургаб педагогикала гIилмуртала кандидатуни, педагогикала бузерила отличникуни бетауртира леб.
А.Маммаевли школала анхъ акIахъуб, дурхIначил дарх ца гектарла ванзаличи 10 азирличирра имцIали хивла ва цIедешла галга удатур. Шанти ишбархIира ил баркьудилис педагоглис баркалла бикIули саби.
А.Маммаев чуйнара шила депутатли викIибсири. ХIяйвантас дуки-гьунила мер декIарбарахъиб, шилизи ва школализи шиннара газлара линияби кадизахъур, илкьяйдали шила мер-муса къулайдирнилизира халаси пай кабихьибси саби, цазаманализиб школализибси сунела хIянчира бузахъули.
Педагогла Агъамирза Маммаевла бузери пачалихълира ахъли кьиматлабариб. Ил «Бузерилизив декIарухъни багьандан» медальличил шабагъатлавариб, «ДАССР-ла урибси мугIяллим», «Бузерила ветеран» ибти умачи, багьудлумала Министерствола ва обкомла ХIурматла Грамотабачира лишантачира лайикьикиб.
Чебетаибси бузериличивли декIарулхъуси, халаси культураличилси, жигарчевси ва пасихIкар Агъамирза Маммаев школа техникалашал гIеббуцахъес бажардиикиб, дурхIни ва педагогуни къайгъначил алавбуциб, илдас къулайти шуртIри акIахъуб.
Гьанна илала дякькадли башули саби сунела дурхIни ва илдала баркьибти – урши МяхIяммад, рурси Раисат ва уршила (рурсила) рурси Замира. Илди химияла, математикала ва бехIбихьудла классунала мугIяллимтили бузули саби.
Педагогунала насабти даимдирни, дигила, санигIятлис мардешла, гражданинна чеблала къиликъуни наслубачи диахъни, бегIлара черяхIти мурадуни гIямрулизир детурхахъни дигеси анцIбукь саби.
ДР-ла бузерила ва социальный бяхIчибизлизиб гьалабяхI башахънила шайчибси Министерствола пресс-служба
