КIилизанти чатIнани
ЦахIнабяхъялли макьам,
Вавнадирхъур галгуби
АтхIеблизир цIедешла.
МицIирагла гьалмагъдешличила ва илдала мардешличила баянти иргъухIели, адам пикриулхъули сай, сен гьатIи инсанти цаличи ца гьимбуркIути, сен илдани дявти адилкьути, сен цали итиллис ламартдеш дирути… или. Гъай хIедалути ва дагьри агартази халдирути мицIираглизибцадалра гIякьлу агарсив адамтазиб? Амма, гьалмагъбикалли, адамтани черяхIти баркьудлуми дурадуркIесра имканти дургнили чисалра дигIяндеш ахIен. Хаслира, дубурланти бикIуливан, дахъхIила гьалмагъдеш чIумати ва марти дирути сари. Творчестволизиб бузути адамти-ургабра камли ахIи къаршибиркули бирар цаличи ца хIясратти ва цала хIурмат имцIабиалли, иличила вайти пикруми дурути. Илди творчествола кьадри хIебалути ва илала мягIна хIергъути, дацIти пикрумала бегIти адамти саби. Гьарли-марти чула делкIунтачил машгьурбиубти ва уркIи-хIял хIялалти бархьдешгIебти адамти чула кьаламла узби-рузбачил гьалмагъбикес, илдала вайра гIяхIра лертиван чедиэс, цали ца гIеббурцес ва биубсигъуна кумек гIеббиахъес къайгъилизиб бирар. ЦIедешла галга вавалибяхъибхIели, илала мякьлаб сабигъуна хIебиалли, илини цIедеш камти луга яра бекIлил хIелуга. СенахIенну тIабигIятли илдала ургала вавназирти сихIрула бетуцунани бархбалсахъуси саби. Ил багьандан анхъчини ца галга хIейсуну, кIел яра имцIали ису. Творчествола «анхъчибанира» балуси саби лукIути адамтала ургарра гъамти, марти ва хIялалти бархбасуни диэс хIяжатли биъниличила. Бархьаначи буралли, творчестволизив узусира гьарли-марли «анхъчи» сай. СенахIенну цархIилтас кумеквикIулицунра ахIи, сунела творчествола анхъра убатес хIяжатси саби илини. Даргала лукIантала авидлизиб-анхълизибра леб дебали пагьмучебти ва хIял-тIабигIят умути лукIанти. Илдигъунтазирадли нуни иштяхIличил у гьанбуршули рирус дила гъамси ва нуни сунела халаси хIурмат бируси дила зилан ва кьаламла рузи ГIяйша Кьурбановалара.
ГIяйша Ханаевна Кьурбанова нуша студентуни дирухIейчирадли ралуси сари. КIелра ДГУ-ла филологияла факультетлизир дучIули калунтири. Ил цаибил курслизирхIели, ну — кIиибиллизирри. Амма цакурслантиван гъамли дирутири. Белики, нуша нушала шими хIясибли унруби сархIели бурги илцадра нушала ургалара гъамсили бетаурси. Дахадаевла районна бегIлара ахъти дубуртачирти КьярбачIимахьилизирадси сари ил, ну ДугIахъарлизирадсира. Нушала фамилияби цагъунтихIели, нуша цацабехIтани рузбази дуйгIули бирар. Нуша цаличил ца дирхахъутира камхIебирар. ВегIла уркIилис дигуси адам цархIилти инсантанира илкьяйдали гьатIира гъамвирахъалли, нуша-ургар гьарли-марли тухумдеш лертиван билзули бирар. КьисматликIун нуша кьаламла рузби детаахъурлира. Илкьяйдали нушани цаличила цали хIебалусира агара.
ГIяйша Кьурбанова сунечила сари гапхIерикIуси, хамдеш-халадеш агарси, дубурланна гьарли-марси умудеш лерилра гIямрулизиб нясхIебирахъули калунси сирхIян сари.
Илала бегIтира адаб-хIяяли жагабарибти ва бузерили някъби делкахъунти адамти бирутири. Илдала рурсира цархIил риэс хIериригу. Илала дудеш ЧебяхIси ВатIа дергъла бутIакьянчи ва бузерила ветеран сайри. Нешра, цархIилти хьунул адамтиван, сунела хъалибарглис къиянхIедикахъес ва дурхIни гIибратчебси бяркъличи бикахъес къайгъилизирси бузерила ветеран рири.
Сунела шиличи ва шантачи дигили рицIибси дубурлан рурсили гьанналаур кахIедяхъили калунти кьярбачIимахьиланти-бургъантачила баянти цаладяхъиб ва «ВатIан багьандан» ибси жузлизи кадерхахъур. Илкьяйдали «Дявила асилдешла музей» ибти экспонатунала лугIи чебицIахъиб.
ГIяйша Ханаевна республикала «Замана» газетализи мурталра макьалаби дурхьуси корреспондентра сари. Илар I980 ибил дусличирадли илала аргъбаибти ва мурхьси мягIнала макьалаби дурадулхъути сари. «Жайран» бикIуси илабси дурхIнас хасбарибси бяхIлизирра 2009 ибил дусличирадли ГIяйшала макьалаби дурадулхъниличибли ил белчIес иштяхIдухъесили бетаурли саби.
ГIяйша Кьурбанова сунела макьалаби дурайъниличирли паргъаткарирули ахIен, илини нешла мезла ва литературала мугIяллим сарливан, Къаякентла районна Сагаси Къаякентла школала дурхIнира ил баркьудилизи битIикIули сари. 2011 ибил дусличирадли нушала газетализир илди дурхIнани цаладяхъибти къантIти фольклорла макьалаби дурадулхъули сари.
ГI.Кьурбановани даргалацунра ахIи, Дагъиста литературализи ва культурализи белгиси пай кабирхьули сари. Иличила бурули саби илини биштIатас къугъали делкIунти назмуртани, фольклорла материалтани, багьирабани, буралабани, хабуртани, айтубани.
ГIяйша Кьурбановалаа давлачебси педагогла опытличила газетабазир мурталра макьалаби дурадулхъули дирар. «Замана» газетализиб дурабухъунси «Нешла мез нешличил цугти сари» ибси дарган мез мяхIкамдирниличила ва гьаладяхI дашахъниличила илала макьалализир наслубала бархбас кабилзахъути, ва чеалкIуси наслулис илцадра хIяжатти нешла мез хIедебкIахъес дяхIчиаибти, челукьути масъулти ахъдуцили сари.
Амма ГIяйша Ханаевнала пагьмурти имцIаливан художественная литературализир гьаргдирни якьинси саби. Ил секIайчи халаси пикри бяхIчиаэсра лайикьли саби. Ил пикри марбирули сари илала пагьмула лямцI ургиван пархбулхъути «Дубурла урунжуни» бикIуси жузлизирти назмуртани ва поэмабани. Ил жузла «БиштIати гIякьлукарти» ибти белкIаназиб дурхIнала рухIласи дунъя гьаргбирули саби. Илди масхарала назмурти делкIунси педагог гьанна 45 дус дурхIнас мурхьти багьудлумира гIибратчебси бяркъра дедлугули, сабухъчерли рузули сари. Илкьяйдали илини дурхIнала пикруми, хьулани, уркIбала хIялани гIяхIил далулира сари. Илала белкIанала игитуни уркIи-хIял умути, коллективлизиб балбикибти, кадиркути анцIбукьунас бархьси кьимат бедес балути саби. Илала гьарил дев кагибси ва бархьдешличилси саби викIес вирар илди дучIухIели. БиштIатала шикьатала сипатдирули, илдала гъай дархли чули дурутиван гьаладирхьули сари:
– «Унлала лулси кьяйда
Ну валкIхIейкIули гIелгъи,
ХIусаб се декIалдеса,
Сен диалла цегьулти?»
Илала игитунала баркьудлуми малхIямдешли ламдикIути сари, цацахIели илдани тамашавирахъули сай, дирар баркьудлуми дукелцIидухъестира. Масала, гежба хIенкьла гьабкьяначи мяштIбирули саби ва бикIули саби:
— Агь, сен дирхIулил мукукурарти гIежни! Сен вайсил, акIубхIейчибадли нура илдиван мукукурар хIебиъни…
ГIяйша Кьурбановала къантIти, амма мурхьси мягIналичилти белкIани дирар. Илдани бархьдеш чебиахъниличи вирхаэсра гьамадли саби.
Италияла полководец ва политикала хIяракатчи Джузеппе Гарибальдини белкIунсири: «Ризкьила багьа кабилзахъа илала сабухъли, адамлис кьимат луга илини сунела гъамтас бируси пайда хIясибли». ГIяйша Кьурбановара къайгъилизир сари жамигIятлис, биштIати ва халати бучIантас дигести макьалаби лукIес. Илкьяйдали илини пергерти произведениеби бучIантас гьаладирхьули, иличибли Дагъиста литература давлачеббирахъули сари.
Илала давлачебси творчестволичила «Замана» газетализир гIяхIцад макьалаби дурадухъи сари. Нунира иличила «СирхIян саламти диаб» ибси макьала белкIунсири. Илала творчестволичила ХIяжимурад Ражабовла, Аминат ГIябдулманаповала, Наида Гъуруевала, Аминат ХIяпизовала, Муъминат Хаттаевала ва бахъал цархIилтала статьяби дурадухъунтири.
Сен лукIули иличила? Сен дучIули илала произведениеби? СенахIенну илала пагьму ахъси даражала саби.
Илини белкIунси алхунти жагьилтачила назму хIулбазир нургъби дакIухIедухъи, белчIес хIейрар:
«Жагьли лебай алхунтас
ДягIли бячун жярлаван
Жагь гIямру къябдердибти,
Жагьти хъабирухIели,
ХIябри кьадардиубти.
Дигайли хIедагьурти,
КарцIайли хIеделкъунти,
БиштIати кабалтули,
Кьукьуби хIеделкунти.
ГIяхIра вайра буртIули,
ХIяндиэс хIебикибти,
Жагьтала къушум-ургар
Шинна кIантIван дегъубти».
ГIяйша Ханаевнала лирикала назмуртира уркIи-рухIличи асарбарести сари. Илала «ХIу багьандан», «ВатIа къакъбяхъ», «Нешла умут» ва дахъал цархIилти назмурти бучIантас дигутили детаурли сари. Илди поэмаби ГI.Кьурбановала «ЧердикIибти» бикIуси сагаси жузлизи кадерхахъурли сари. Ила илкьяйдали кадерхахъурли сари СВО-лизир бутIакьяндеш дирути бургъантачила назмуртира.
ГIяйша Кьурбановала лерилра произведениебани учIанна уркIилизир мурхьти къел далтули сари.
«Замана» газетала редакцияла агьлу бирхули саби гьаннала гIергъира ГIяйша Ханаевнани нушала газетала марти гьалмагъуни, сунела жагали каргьурти, кагибти макьалабачил разибарахъниличи.
ГIяйша Кьурбановала гIямрулизир мурталра гьарбизуни дирули, илала арадеш къулайбикIули, пагьму давлачеббикIули, хъалибаргла талихI гьарзабикIули, бузерилизир чедибдешуни дахъдикIули дигулра. Дерхъаб хIела гIямру, рузи ГIяйша!
ПатIимат Кьурбанова
