НурбяхIяндов ГIяли МяхIяммадович 1924 ибил дусла октябрьла 25-личив, Сергокъалала районна ХIурхъила администрациялизи кабурхуси Сугурбимахьилизив акIубсири.
Сергокъалала райкомпартияла цаибил секретарьли, ДАССР-ла шила хозяйствола ва вацIала хозяйствола министрли узули калунси ЧебяхIси ВатIа дергъла ветеранни духъянти ва тамашала гIямру деркIибти сари. Илини сунела район гьалабяхI аркнилизи халаси пай кабихьибсири ва бахълис гIяхIдеш чебетаахъибсири.
ГI.М.НурбяхIяндов школализив учIули левай, ВатIа ЧебяхIси дергъ бехIбихьибсири. 17 дусла гIямруличив ГIяли НурбяхIяндов сай гIяхIъулали ХIунтIена ГIярмиялизиб къуллукъбарес арякьунсири.
ХIера, се лукIулил ГIяли НурбяхIяндовли дергъличила дурути сунела гьанбикуназиб: «Кутаисилизи вархьбхIели, ну альпинистунала 1-ибил отделла дубурла мер-мусаличиб къяйкбикIутала отрядлизи викира, сабира Клухорла ва Нахарала мер-мусаличибси. Отрядлизив старший сержантла уличилси ну взводла командирла кумекчи сайри. Илкьяйдали нуни 1943 ибил дусла февральличи бикайчи дявила анцIбукьуназир бутIакьяндеш дирули калунсири.
Ил дусла январь-февральличив душман Северный Кавказлизивадли гIела хихиубсири. Теберда бикIуси курортла мер-муса азаддатахъурли гIергъи, нушала отряд цархIил мерличи гечбарибсири».
Сентябрьла бехIбихьудличив ГI.М.НурбяхIяндов Буйнакъскла дявила пехотное училищелизи вархьибсири.
1944 ибил дусла январьла бехIбихьудличив ГIяли НурбяхIяндов Украинала 4-ибил фронтла 986 ибил стрелковый полкла 230 ибил стрелковая дивизиялизи ваиб. Дугила манзил сабри. Полкла штаблизиб илизи багьахъур авлахъла телефонна кабель някъбази касахъес ва кабель хIясибли ватихьахъес. Ил кабельли взводлизи ваахъиб. Илар иличи взводла командирла къуллукъуни хъардарибтири.
Автоматчикунала взводла командир сайливан, ГI.М.НурбяхIяндовлизи полкла командирли ва мегьла гьунила станция буцахъес хъарбарибсири, Одессализи аркьуси гьуни гIекIес багьандан. Душмайчила баянти агарли хьалли, илини взвод гьужумличи ахъбуцибсири. Фашистунани илдачи хIябал шайчирадли цIа чекьур. ИлхIели сеннира станция буцес кьасбарибси ГIяли НурбяхIяндовли солдатунази буйрухъбарибсири: «Душмайчи гьужум!» или. Лебилра взвод ахъбиубли, гьалабяхI гьайбиубсири. ИлхIели ГI.НурбяхIяндов хъяблизивадли ва хъуцIарлизивадли вяхъибсири. Дебали гIядабси агилизив ил медсестрани арукили, неглизи каркьили уили сай.
Взводлизибти 23 адамлизибадли чIянкIли 9 калири. ЦархIилти кабушилри ва бяхъилри.
Одессализизибад декIли бяхъибти бургъантачил варх ГIяли НурбяхIяндовра Днепродзержинсклизи кибсири. Илабадли Тбилисилизи. Дяхъилизирад дашути хIи тIашхIедилзули, ГI.М.НурбяхIяндов МяхIячкъалализи ваахъибсири.
1943 ибил дусла январьличибадли хъалибаргличил бархбас агарси ГIяли НурбяхIяндовли ХIурхъила шила советлизи кагъар бархьиб ва сай МяхIячкъалализибси госпитальлизив кайхьили левли виъниличила багьахъур. ТалихIлисван, илала кагъар шила советлизи баибхIели, дудешра Гулбариятра ХIурхъила базарличиб къаршибикили буилри. МяхIячкъалализибси госпитальлизив чула урши левниличила багьурхIели, илала нешра дудешра иличи бакIибтири.
1944 ибил дусла сентябрьла 20-личи бикайчи ил госпитальлизив калунсири. ГIур илди 3 офицер, госпитальлизибад дурабухъунмад, дергълизи бархьибтири. Дергъ таманбиайчи ГIяли НурбяхIяндов ВатIайс марси гъабзаван, сунела улкала хъархIерагардеш далтахъули калун. Прагаличивадли гьарахъли ахIи, дергъла майдайчивхIели, илини чебяхIси чедибдешличила гIяхIла хабар аргъибсири.
1946 ибил дусла июньничи бикайчи илди гIурра бандеровцыбачи къаршили бургъули калунтири. Июньна 20-личив ГI.М.НурбяхIяндов хъули чарухъунсири.
Ил дуслизив ГIяли НурбяхIяндов Дагпединститутлизи керхурсири. 3-ибил курс таманаибхIели, ВЛКСМ-ла обкомла буйрухъ хIясибли, ДАССР-ла пачалихъла урехи хIебирахънила органтазив узахъес хъарбарибсири. Оперуполномоченныйли ва комсомолла комитетла секретарьли узули калунсири.
1951 ибил дуслизив ил Шурагъатла районна пачалихъла урехи хIебирахънила отделла начальникли узескайибсири. Илаб чумал дус хIянчи барили гIергъи ГIяли МяхIяммадовичличи КПСС-ла обкомла орготделла инструкторла къуллукъуни хъардарибтири.
1954-1958-ибти дусмазив Сергокъалала районна райкомпартияла кIиибил секретарьли узусири. КIел дус Москвализив КПСС-ла ЦК-лизибси ЧебяхIси партшколализив учIули калунсири.
1960-1973-ибти дусмазив Сергокъалала районна райкомпартияла цаибил секретарьли узули калунсири. Илини илди дусмазиб район гьалабяхI арбукьяхъес багьандан халаси хIянчира барибсири.
КIел дус республикала шила хозяйствола министрли ва 10 дус вацIала хозяйствола министрли калунсири. ИлхIелира хIурхъан гIяхIгъабзали дубурлантала гIямру къулайдирахънилис хьулчили диубти дахъал хIянчи дарибти сари.
1961 ибил дусличивадли 1985 ибил дусличи бикайчи ДАССР-ла Верховный Советла депутатли, партияла обкомла членни виркIусири.
1985 ибил дуслизив ил пенсияличи арякьи виалра, паргъатли кахIейиб. ГI.НурбяхIяндов ДАССР-ла министртала Советла баркьудлумала Управлениела заведующийли узескайбсири ва администрациябала органтачи хIеруди бирусири. Чумал дус миллатунала баркьудлумала шайчибси Министерствола бекI специалистли узули калунсири.
ГIяли МяхIяммадовичла багалати баркьудлуми улкалира ахъли кьиматладарибтири ва илис ХIунтIена Зубарила орден, ЧебяхIси ВатIа дергъла 1-ибил даражала орден, Октябрьла революцияла орден, Бузерила ХIунтIена Байрахъла орден ва 16 медаль дедибтири. Ил ДАССР-ла Верховный Советла Президиумла ва Дагъистан Республикала Пачалихъла советла 4 грамоталичил, РСФСР-ла шила хозяйствола ва берк-бержла продуктунала ва вацIала хозяйствола министерствобала Грамотабачил шабагъатлаварибсири.
ЧеалкIуси наслулис патриот бяркъ бедлугнила шайчив мисалли ветаурси, хамдеш-халадеш агарси, сунечи хъарси хIянчи ахъси даражаличиб бетурхахъуси ва адамтачи дигили вицIибси ил гIяхIгъабза нунира ункъли валусири. Ухънадешла пасихIдешли вяхъибси илала чеветаибдешличи, кагибдешличил буруси гьарил девличи, адуцалачевдешличи ну тамашариубсири. ДеркIибти дусмачи хIерхIеили, илала серхурдеш, челябкьлаличи умутуни, бекIла гIякьлу, секIал хъумхIертни хIясибхIедарес хIейри. Бархьаначи буралли, илала къугъати къиликъуназирадли нунира гIямрулизир пайдаладарести гIяхIцад гIерасес кьасбарибсири.
Ишдус НурбяхIяндов ГIяли МяхIяммадович акIубхIейчирад 100 дус дикили сари. Ил 2018 ибил дуслизив итил дунъялизи арякьунсири ва илгъуна мягIничебси юбилей дураберкIес имканхIебакIиб. Амма, илдигъунти къаркъала шуригъунти гIяхIгъубзни адамтала уркIбазиб даимлис кавлути саби.
Тамара ГIябдусалимова
