«Наша служба и опасна и трудна» ибси милиционертачила машгьурси далай хIебакьибси мажахIят левли виэс. ДухIнарти къуллукъунала органтазиб бузутала хIянчи буресагарли къиянси ва урехиласи саби. Гьайгьайрагу, илдас гьарли-марти гъабзадеш дакIудирес хIяжатбиркули бирар. ИшбархIи полицияла хIянчизартазибад санигIятлашалти халати устадеш тIалабдирули сари.
ДухIнарти къуллукъунала Министерствола бекIлидиубти масъулти сари улкала халкьла ихтиюрти, арадеш, гIямру мяхIкамдарни, такьсирдешлис къаршидеш дирни, низам-кьяйда датахъни. ГIядлу-зегъа далтахъути органтала гьарил бутIали нушала гIямрула лерилра кьялубази белгиси пай кабирхьуси саби, паргъатдеш ва халкьла азадси бузери гIеббурцули.
ВатIайс къуллукъбирни полицияла хIянчизартала бегIлара бекIлибиубсигъуна мурад саби. Илдани сари жамигIятла низам-кьяйда далтахъути, такьсирти дурахIедеркIахъес хIеруди бируси ва дурадеркIибти белгибирути, пачалихъла, коммерцияла ва вегIдешла объектуни мяхIкамдирути. МВД-ла подразделениебани гьундурачиб урехи хIебирахънила тяхIяр-кьяйда гIердурцу, ибкьти тяхIяр-кьяйдализиб кумек гIеббиахъу. ЦацабехIтани полицияла хIянчизартала гъабзадешличи пахрубирули саби, цацабехIтала илдачила вайти пикруми алкIули сари. Гьарил адамлис аргъес чебиркур полицияла хIянчизарти агарли гIергъи, бархибдешла, низамагардешла аги кабилзни. ЖамигIятла бухIнабси аги халкьла культураличицун ахIен кьалли хъарахъибси, бахъалгъунти адамти такьсир дураберкIалли, танбихIлабирнила урехили саби тIашиути. Чула гIямрулис урехи алкIниличи хIерхIеили, полицияла хIянчизартани гьар бархIи такьсирдешла анцIбукьуни дурадуркIутас къаршидеш дирули сари. Илдигъунтазивадли ца сай хIурхъан багьадур Заур ГIямаров.
Заур ХIяжиевич 2003-ибил дусличивад МВД-лизив узули сай. Илини органтазиб къуллукъбирнила сунела цаибти гунзри МяхIячкъалала Советский РОВД-лизир дехIдихьибти сари. Ил сунечи хъарти хIянчи ункъли тамандирули ва дявила чебла хIурматличил ихъули, гьалавяхI вашули сай ва полковникла уличи айкили сай. Гьанна ДР-ла шайчибси Росгвардияла Управлениела МяхIячкъалала шайчибси ведомствола дурарти объектуни далтахъутала Управлениела начальникла къуллукъуни дузахъули сай.
ДухIнарти къуллукъунала органтала цархIилти хIянчизартаниван, полковник Заур ГIямаровлира МяхIячкъала ва Каспийск шагьуртазиб къачагъуни агарбирнила шайчирти далдуцуназир жигарла бутIакьяндеш дарибти сари. Ил дявила анцIбукьунала ветеранра сай.
МВД-лизиб къуллукъбирути дусмазив З.ГIямаров «Чеблалис марси виъни багьандан», «МВД-лис 200 дус», «Георгиевла къанчлис 200 дус» бикIути михъирличи диршути лишантачи, «1994-2004-ибти дусмазир Северный Кавказлизир кадикибти дявила анцIбукьунала бутIакьянчи», «Дявила асилдеш багьандан», «Къачагъунас къаршидеш дируси балбуцла бутIакьянчи», «Къуллукълизив декIарухъни багьандан» 2-ибил ва 3-ибил даражлумала медальтачил, «Къачагъунала ярагъладиубти кьукьни тIутIукьякьядарибхIейчирад 20 дус» медальтачил шабагъатлавариб. Пачалихъла хъархIерагардеш балтахънила хIекьлизирти гьар бархIилати масъулти ункъли гьунчидиркахъни багьандан ил «ДР-ла низам-кьяйда далтахъути органтала хIурматла хIянчизар» ибси уличира лайикьикили сай.
Полицияла БархIиличил бархбасахъи, Заур ХIяжиевич, илкьяйдали МВД-ла лебилра хIянчизартира чула санигIятлашалси байрамличил мубаракбирулра! Лебтасалра бузерилизир сархибдешуни диаб. Такьсирти камдикIули, погонтачирти урми дахъдикIули, арали гIямру деркIабая!
П.Мирзаева
