Хайдакьла районна Мажалисла шилизибси биштIатала искусствола школализиб РФ-ла Ярагъладарибти ЦIакьанала къяяназиб къуллукъбарахъес жибарибти уршби гьуниббалтнила балбуц бетерхур. Илар бутIакьяндешдариб: бузерила архIяличил муниципалитетлизи вакIибси ДР-ла дявила комиссарла заместитель, подполковник Замирбек Курабековли, Хайдакьла ва Дахадаевла районтала администрациябала бургала заместительти — Заур Нагьбаровли ва МяхIяммад Сулайбановли, кIелра районтала дявила комиссар ГIумар СягIидовли, призывла отделла начальник МяхIяммад Пашаевли, районна администрацияла хIянчизартани, уршбала бегIтани ва юлдашунани. Шадлихъ Россияла Гимн белчIниличил бехIбихьиб. КIинайс биалли, гIярмицуначи саламтачил ГIумар СягIидов дугьаизур. Илини бурили кьяйда, гIярмия — адамдешла бегIлара гIяхIти къиликъуни кадирхьуси, ВатIайчи диги имцIадируси, низам-кьяйда дузахъниличи ва жура-журала аги-хIяйзиб бархьси гьуни бургниличи бурсиируси гIямрула школа саби. «Гьамадси ахIенси дявила школа хасси тяхIярли ахъахъес сабур, цIакь ва арадеш дулгулра. ГIягIнибикибхIели ВатIайс къарайучи дурадухъес хIядурти гIяхIгъубзнили хъули чардухъабая. ЧIумаси арадеш ва баракатла гIямру дулгулра хIушаб!» — буриб илини. «Дагъиста дурхIни мурталра чебетаибтази, чучи бихьибси игьдибар марбирутази халбирути саби. Вирхулра, хIушанира илкьяйда жавабкардешличил къуллукъ таманбирниличи. ГIярмиялизирад чардиубхIели, хIял-тIабигIятла хIекьлизибси гIяхIси белкI биалли (характеристика), хIукуматла хIянчиличи кайэсра гьамадли бирар» — викIи Замирбек Курабеков. СВО-ла мер-мусаличи гIярмицуни бурхьути ахIен илира гьанбушиб илини. ГьунбигIяхIла дугьби дуриб Заур Нагьбаровлира: «Районна бекI Темирбулатов ГIялим МяхIяммадовичла ва администрацияла лебилра хIянчизартала шайзирад хIушаб гIяхIгьунби дулгулра. Дудешунала ва хала дудешунала къуллукъуни гъабзадешличил даимдарес имканбакIаб. ХIушала гIямрулизиб дебали мягIничебси ва жавабкардешличилси бутIа саби ил. Гьунби гIяхIдираб!» Илаб илкьяйдали гъайбухъун МяхIяммад Сулайбанов ва районна хьунул адамтала Советла председатель ГIяйшат ГIябдуразизова. Балбуцла ахирличив лебилра призывникунала шайзивад МяхIяммад МяхIяммадов гъайухъун ва халатала насихIятуни чули хъумхIертниличила буриб. Ахъси даражаличир къуллукъуни тамандарес къайгъибирехIе или викIи ил. КIинайс биалли, культурала Центрла гIяртистунани далуйти зайдухъахъун.
Хайдакьла районна администрацияла пресс-служба
