Дубуртала варачанти цадехI хъярхъли кIухдикIути дирар, цархIилти сабурличил чула шараб урхьнази даахъес багьлакадиубли дирар. Илгъуна аги мер-мусала кабизлизибадли дигахъуси биэсра асубирар. Амма ца хIеркI чумал жураличиб урхьнази биънира дигIяндеш ахIен. ГIе, хIеркI шурмала ургабад биркухIели чяхI-чяхIи бетарар, диркьси мерличи баибхIели ил ряхIятли батбирхьур. Дубурла сегъунти мер-мусаличиб акIубти биалра, адамтира декIар-декIарти хасиятунала бегIти бирар. Амма камли къаршииркур сабурличил хIерирули, хIяжатбикибхIели вацIала гъалбецIван чIумали кайзес вируси гъабза. СирхIяла дубуртазиб жагасигъуна мер буцибси Цугнила ши-алавра дигалли шурми лер, дигалли къугъати сани-ганцIила ва гьайбатти къадурбала мерани лер. Ил шила адамтачила чIянкIли гIяхIти баянтицун аргъес вирар. Хаслира гIяхIгъубзнала мягIдайзи халбируси саби хабарла СирхIя. Нушала белкIла игит Кьадира дубурланна гьалакти хIи сабурличил дузахъес вируси, адаб-яхIли вицIибси багьадур сай. Камти дусмачи хIерхIеили, илала пасихIдеш, адуцалачевдеш ва хIял-тIабигIятла кагибдеш бахълис мисалли детарули сари. Ил сегъуна-дигара агилизив гьалакхIейкIар, чебетаахъили сунечи хъарси бирес бажардииркур, хIяжатбикибхIели къияндешуназивадлира гIелумхIелзан. ВиштIахIейчивадли ил гIяхIгъабза чевхIелкIи, бархьси гьунчивадли вашахъес бурсиварибси сай дубурлан яхIли.
Ахъушала районна Цугнила шилизиб гIяхIти кьиматуначил урга даражала багьуди касили гIергъи, Кьади 1997 ибил дуслизив МяхIячкъалала строительный техникумлизи керхур. Школализив, отличникунала суратунала ургаб мурталра сунела сурат камхIебирахъули, чекайзурли учIуси урши илавра гIибратчевси студент ветаур. Илабра белчIуди ункъли хъараахъур. Нешла мезличирти дигили сеннира дубурлан урши Дагъиста пачалихъла педагогический университетлизи киб. Гьайгьай, филологияла факультет чеббикIиб. ИлхIелира университетла жамигIятла гIямрулизир жигарла бутIакьяндеш дирутири илини. Сунезибадли гIибрат касесли учIуси цуглан урши курсла старостала, факультетла профсоюзла председательла къуллукъунира ламусличил тамандирес бажардииркусири.
Илис университетра гIяхIти кьиматуначил таманбарес имканбакIиб.
Кьадини сунела бузерила цаибти гунзри Тарумовкала районна Ново-Георгиевкала урга даражала школализив мугIяллимли узули, дехIдихьиб. Илар илини урус мезла ва литературала, дарган мезла ва литературала дурсри кадирхьутири. Илкьяйдали Кьади Зияутдинович чебяхIси категорияла мугIяллимла уличи лайикьикиб. Школализиб илини 11 дус хIялалси хIянчи бариб. Бархкьябала ва бучIантала ургаб халаси хIурмат сархиб.
КIинайс илини ДГУ-ла хозяйствола отделлизибра хIянчи бариб.
Кьади ГIялисултIановла бекIдешлиуб ишхIелла манзиллизиб бузули саби «Даргала анкъи» бикIуси жамигIятла организацияра. Ила кабурхули саби даргала районтала декIар-декIарти шимазибадти ва шагьуртазиб хIербирути мугIяллимти, поэтуни, писательти, журналистуни, культурала ва администрациябала хIянчизарти. Цабалгунси ва цалис ца узи-рузиван гъамтили бетаурти даргала миллатла вакилтани нушала хала бегIтала хIурмат-хатирла, гIяхIялдешла ва уржибдешла мисалти чеалкIути наслулизира гIерисахъули сари. Нешла мез гьаладяхI дашахъес ва мяхIкамдирахъес ибси чула бекIлибиубси мурад гIямрулизиб бетурхахъули, организацияла бутIакьянчибани республикализир детурхути лерилра далдуцуназирра жигарла бутIакьяндеш диру. Ил кьукья бархIиличи-бархIи бягIубикIули, гьалабяхI башули ва чIумабикIули саби. «Анкъиланти» сяхIбатличиб батбухъи чебаибти илдала жагати ва хIялалти баркь-бацличи мяштIбикIар ва сабира ила кьабулбарахъес тиладибикIули бирар. Гьайгьай, Кьадини илдалара мурад бартарахъули вирар. Кьукьяла узби-рузбачил илини сагали вакIибси адам тянишварили гIергъи, пагьмучевси поэт БяхIмудли илис назму багъишлабиру ва ил назмуличил барх суратра кабихьили, къугъаси багьахъни «Даргала анкъила» сайтличи бурхьу. Ил кьукьяла пергерти баркьудлумачила сягIятунадли гъайвикIес вирар, амма иш гьакIлис нушала белкI Кьадила бузерила ва поэзияла бетуцуначила саби.
2021 ибил дусличивадли дарган мезличил дурабулхъуси «Гьалмагъдеш» журналла редакторли узули сай Кьади Зияутдинович. Илини халаси къайгъи биру журналла тираж имцIабиахъес ва илизи жагьилти лукIантала белкIани кадерхахъес.
Литератураличи диги илала школализив учIули левай лертири, суненира урга-ургади назмурти лукIутири. Илди дигили гьаннара сунела бузери гIягIниси тяхIярли тIашбатахъес кумекбирули саби. Илала назмурти, макьалаби Ахъушала районна, республикала газетабазир ва журналтазир мурталра дурадулхъули сари.
Кьади Зияутдиновичла назмуртира адамла уркIилизи атIести пикрумачилти сари. Илини ахъдурцути темабира декIар-декIарти сари. Гьарил поэтли бегI гьалабси яргализиб сунела ахIерси нешлис багъишла лукIули вирар. МажахIят левли виэс нешла дурхъадешличила ва иличирти сунела кахIедурхути диги назмула тугъазир гьалахIедихьибси шягIир. ХIера, сейкIулил Кьади сунела «Нешлис» ибси назмулизив:
«Нешла хIянчи хIясибли,
Сари някъби къаркъала,
Халдаралли, мар-марли,
Сари илди бамбала.
Нешла сабур хIясибли,
Бургар уркIи шанданна,
Мурхьли пикриухъалли,
Сабигу ил чакарла.
Нешла дугьби хIясибли,
Бургар лезми гIяшулла,
ДурхIначил гъайрикIалли,
Сари ил берхIидяхIла.
Нешла хIерлизир сари
Азир рангла зурхIябти,
Набчи илдани сари
МалхIямли нур дурхьути.
Секьяйда, неш, ахIерси
Ахъиша хIела чебла,
ГIязиз жан мяштIхIедирис
Мурад барес абала».
ХIера, секьяйда нешличирти диги чедиахъулил илини. Нешла хIурмат хIебируси ва иличи дигила цIали уркIи ламхIебикIахъуси адамли цархIиллара я хIурмат хIебиру, я адамличирти дигилис кьимат бедес хIебала. ЧеалкIуси наслулизира нешла хIурматбирахъес ва илала черяхIдешличила аргъахъес багьандан поэтли сунела уркIи гьаргбарили, иларти малхIямти хIялани назмулизи каргьахъурли сай.
«Удалтена галгуби» бикIуси назмулизир авторли тIабигIятличирти сунела диги чедиахъули сай:
«ХIяж барибси хIяжисцад
Лебси саб бикIар кири,
Мурил цIедешла галга
Убаталли анхълизи.
ЦIикурла палтарличил,
БегIбирар гьала хIеб анхъ,
ГIяхIбулхъахъа сабухъли
Халкьла яшав ва бекIахъ…
Галгала вавназибад
Варъа бурчу мирхъили,
Дикьур цIедешлизибад
ТIягIям кайсу дурхIнани…»
Кь.ГIялисултIановли галга убатахъес хIязлис ахIенгу маслигIятбируси. ИшхIелла манзиллизир бекIлил арадешлис багалахIедирути чинарад-сарил хибти берклумани адамти зягIипбиркахъули саби или балахъули саби тухтуртани. ЦIедешли биалли, арадеш къулайбирахъули саби. Мирхъили цIедешла галгала вавназибадли барибси варъа сегъунти-дигара дармунтачибра пайдаласи саби. ЦацадехIти цIедешла галгубала кIари дархли чяй дарес пайдаладирули дирар.
Поэтли чеалкIуси наслулис пайдаладиэсти ва чула пасихIдешличирли адамтани хъумхIертести пикруми гьаладирхьули вирар. «КьацI» бикIуси назмулизиб авторли маслигIятбирули сай хъубзарли халаси къиян кабихьили сархибси кьацIла хIурматбирахъес ва ил сархнила дурхъаси баркьуди даимбарахъес. ИшхIелла манзиллизир пайтдухъунти ва гIяргIябержли дуцибти хъуми чедиухIели, поэтла уркIи цIумбулхъули саби:
«… Дерхъили дашаб ризкьи,
Мадиаб хъуми пайтли,
Мабагьаб кьацIла агри
Гьачамалра адамли!…»
Кьади ГIялисултIановлис ишхIелла хIякимтала дархьагарти баркь-бац гIяхIдилзули ахIен ва «Ца гIяхIдеш хIяким хIейъни» бикIуси назмулизив ишкьяйда викIули сай:
«Ца гIяхIдеш хIяким хIейъни
Халкьлис хIянчи лугуси,
НясхIебирис рушбатли,
Адамла чебяхIси у…
…Халбирис игъбарлизи
Назмурта лукIан виъни,
Марти дигайла далай
УркIилизиб зайбикIни…»
Бурули бираргу, сегъуна ахъси къуллукъличивси виалра хIяким, ил итил дунъяличи арякьи гIергъи, камси манзилла бухIнаб иличила хъумурту, амма поэтли иш дунъя бархьбаталра, адамтала уркIбазив ил мицIирли кавлан или. Авторлира илгъуна хIекьдеш марбирули сай сунела умути пикрумачил. ГIергъити дусмазиб СВО-лизир бутIакьяндеш дирули, гъабзадешличил бургъути гIяхIгъубзначи жамигIятли халаси пикри бяхIчииули саби ва илди чула хъалибаргуначи арали чарбухъахъес багьандан ЧевяхIсилизи балгначил тиладибикIули саби. Поэтлира ил пикри гIеббурцули сай сунела «Игит» бикIуси назмулизиб:
«Гьужумла авлахъличив
Яра бузерилизив
БегI гьалав вирар игит,
Сархути гьунартазив…
Медальтани михъири
БицIахъибил багьадур,
Азирлизи улхъуси
Сайри ВатIан балтахъан…»
ИшхIелла манзиллизиб творчестволизи ахъибти жагьилти камли саби. Бахъалгъунти гьамадси тяхIярли арц дикахъес къайгъилизиб саби ва камси алапалис газетаби-журналтазиб бузес дигули ахIен. Дигеси саби, Кьади ГIялисултIанов дигиличил сайра творчествола гьунчи кайзурли, илгъуна хIурматла баркьудилизи цархIилти жагьилтира битIакIес имканти дургни. Илкьяйдали бирар дубурлантани шурмазибадли дякь кавдуси.
ХIурматла дубурлан урши, гьардизаб хIела лерилра гIяхIти пикруми, гьамадбираб хIела гьамадли ахIенси, амма адамтала уркIбази пасихIдешра малхIямдешра хьурадирахъуси журналистла ва поэтла чебяхIси гьуни.
Тамара ГIябдусалимова
