Адамти бахъал саби. Илдазивад гьарил сунеласун декIарси вирар. Гьарилла рухIласи дунъяра сунеласун давлачебси ва тамашаласи саби. Нушаб ил дунъя гьаргбарес имкан­би­кIули ахIен. Эгер гьарилла пикруми, кьасани нушани дала­хIеллири, сецад кункли биишара нушаб хIердиэс.

Арбашули саби гIямру­ли­зибад адамти. Амма адам кавлули сай цар­хIилти адамтала пикрумазив, дагь­рилизив, хъалибаргла, узи-уршила, юлдаш-тянишла уркI­базив. Илдани гьандиркахъу адамла бузери, адамдеш, сархибдешуни, пагьму, гьунарти.

Иш белкIла игит нуни илцад-декIар валуси ахIен­ри. Амма чумал «сурат» гьан­диркахъехIе, чулира илала шаласи ва умуси сипат, ил гьарли-марли кайзурси дубурлан виъни баянбируси.

Ил пагьмучевси педагог, кабизалачевси дубурлан, гIяхIси адам сайливан наб гьаргиуб. Ца-кIел баркьудиличивлира адам гьаргирули вирар.

ХIунтIена дипломличил ДГУ-ла филологияла факультетла урусла-дагъиста отделение белчIунхIели, 1984 ибил дуслизив ну узахъес Дахадаевла районна Меусишала урга даражала школализи вар­хьибсири. Гьайгьайрагу, жагьил адамла дахъал кьасани, пикруми лерри. Дарес дигутира сецад-дигара лерри. Илди гIерхIедурцути анцIбукьунира диуб, сецад наб гIяхIдилзулихьар.

1987 ибил дус бииши. ИлхIейс нуни школализиб дарган мезла учительла хIянчи чумал дус барилри. Школа ахтардибарахъес районнизибадли халаси комиссия бакIибсири. Лебилра учительтала дурсрачи комиссияла членти башутири, лайикьси кьимат бедлугусири. Буриб филологунала хIянчи ахтардибарес дебали тIалабчевси, халаси устадешла вегI педагог, районна ца школала директор лявкьули сай или. Наб ил тянишси ахIенри.

ЦархIилтачил варх вакIиб ил адамра — куц-кабизлизив валкайкибси, ряхIятси.

Дарган мезла дарс сабри. Дарсличи кайиб. Дарс таманбиубхIели, илини набзи маслигIятбариб, бучIанти бархьаили, класслизив калахъес. Тянишдиубра. ГIур илини набчила, дила пикруми-кьасаначила, бузериличила хьархъардяхъиб. Дарсла ва темалашалти планти ахтардидариб. Суалти гиб. Лерилра нуни дурутачи жагали лехIизур, урга-ургади суалтира хьардии. Буруси секIайчи илкьяйда жагали лехIирхъути, гъайикIусила гьарил пикри, дев иргъути, аргъес къайгъичебти наб илцад –декIар бахъал къаршихIебикиб.

Наб дигулри дила бузериличила, баягъи дарсличила пикруми дурили, насихIятуни гили. Амма нуни илди хIергъира. Ихтилатла гIергъи, ил айзес вализур. — Наб — жагьил учительлис насихIятуни дурили дигулра, — ибхIели бараван пишвяхъили, дила хъуцIарличи някъра кьутI-кьутIбарили, викIар: «Муса, узуси тяхIярли, хIемсурли узен. Ил саби дила хIед насихIят».

Комиссия чумал бархIи бузес гIягIнисири. ГIергъила бархIи дила гъамси адам вебкIили, ну алхIямла агьлу сайни багьандан наб илав виэс гIягIнилири. Илкьяйда биалра, школализибад хабар бакIиб ну школализи вакIахъес, комиссия бузули лебай хIу ишав гIягIнисири бикIули. ВакIира. Ну ХIясанхан МяхIяммадовичличи гъамиубра. Дурсрачи вакIахъес бурира: «Муса, даг нуни чебаибси дарсра, ахтардидарибти дурсрала ва тематикалашалти плантира, хIечил барибси ихтилатра наб даибти сари хIела — педагогла бузерилис кьимат кабатес. Укьен, хIела узи-уршиличил варх кайэс. Нуни бурис школала руководстволизира», — викIи ил. АлхIям белчIес сайра вакIибсири.

Кьанниван багьурра, совещаниеличиб баягъи комиссияли лебилра школалис кьимат кабалтухIели, гьарилли бурулри сунени барибси хIянчиличила. ХIясанхан МяхIяммадовли бурибсири: «Меусишала школализибти филологуни бузес балути ва бузес дигути саби. Дурсрира вайти ахIен. Жагьил учитель Муса декIарвирис. Набра нугъунти цархIилти учительтасра гIибратли диэсти секIал чедаира нуни илала бузерилизир. Ил учительлис диргалахIедухъи, узуси тяхIярли узахъес ватахъес тиладибираси школала администрациялизира».

2013 ибил дус. Донничибси Ростов шагьар. БархIехъла за­мана. Алавчарли дунъя хапли цIяббиуб. Къукъу-рямкьяр дехI­дихьиб. ЛямцIла урги маркали бемхIехъурти адамтала бур­гала чедиб гьаман багьарбирулри. Автобусуни камли да­шулри, да­кIибтира гарчли ди­цIилри. УркIи кьакьабакIеси тя­хIяр сабри.

Ил замана зянкъ:

— Ассаламу гIялайкум, Муса!

— ВягIялайкум салам!

— ХIу чинаври?

— Ростовлизивра.

— Ил балулра. ХIу бусягIят левси мер бура.

— Южный федеральный уни­верситетла гьалабси автобусунала остановкаличив левра.

— ХIу левси мерличив уэн.

ГъайикIуси вагьхIегьурра. Гьести гIямрула адамри. Ил багьандан адаббизур чи сайрил хьарбаэсра. ТIама наб тянишсиванра бизур. Муиран лугъат­ли гъайикIулри. ВяхI! Чи вируси? Ростовлизив ну виънира бахъ­ли балуси ахIенри (ну ила судличи тилмажли вархьибсири).

БекIлизир лукьулри жура-журала пикруми. Яра баягъи судличи бакIибтазивад ургар, заллизи кабиили гьарилра-сера заседаниеличиб бахъал адамти бири.

Гьанбикиб гьалабси бархIи гостиницализиб бетаурси гьуни­баъ­нира. Судличи арукьес хIя­ду­ри­ублири. Гостиницала 5-ибил дерхIличив лифтличи кайира. 4-ибил дерхIличив ухIнавхъун гьалав Дахадаевла районна бекIли калунси МяхIяммад ГIябдуллаевич ГIялиев. Адамти дигахъуси, илдала хIял-тIабигIят гIяхIил далуси, пагьмуличил мас­хара писбалтес дигахъуси ил набзи викIар: «Ца гIяхIси къуллукъличивси ну 4-ибил дерхI­личи ка­турли, сен хIу 5-ибил  дерхI­личи катурсири?»

Дила жавабра масхарала сабри: «Ишабтанира балули саби Уркухъла шиличибра Меусишала ши ахъли биъни. Ил багьандан меусишан ахъси дерхIличи мерлаварили сай».

ВягIдаладиубра бархIехъ къаршидикес… Нуша ихти­латдикIуси замана «Ассаламу гIялайкум!» или жагати куц-кабизла вегI жагьси адам ацIиб. МяхIяммад ГIябдуллаевичли нуша тянишдарира. Ил Цура­гIила шилизивадси уилри. Школала учитель ХIясанха урши МяхIяммадхIябиб Мя­хIям­мадов. БусягIят ил Донничибси Ростов шагьарлизибси ца университетла проректорли узуси сай. Нуша дарган дурхIнала ургаб жагаси  ихтилат бетаур.

ЧяхI-заблиубад дигIян­би­кибти адамти-ургав ну тIашлири. Байхъала сягIятла бухIнаб илаб машина тIаш­бизур, унза гьаргбиуб: «Муса, ваши», — или тIамадариб. Кай­рулра машиналичи — илав цургIлан ХIясанхан, Руслан бикIуси уршиличил варх.

ГIур багьурра сунела урши МяхIяммадхIябибли гостиницализиб бетаурси гьунибаъниличила дудешлизи бурниличила. Илкьяйда Ростовлизи уршбачи вакIибси ХIясанхай ну варгира. Уршила мер-мусаличи арукира, сунела уршбачил тянишварира. Гьарли-марти ду­бурлантала гIяхIялдеш дариб. Чуйнара илала гIергъира ХIя­сан­ха урши Руслан гостиницализи музаухъун.

 

Муса БяхIяммадов,

ДГУ-ла филологияла факультетла Дагъиста мезанала кафедрала заведующий, профессор, филологияла гIилмуртала доктор