«Дагъиста театрла челябкьла», — илди дугьби ГI.Батирайла уличилси даргала театрла гIяртист ГIябдусамад ГIялиевличила дурибти сари ва илди марти диънилис бикьридеш дирули сари Дагъиста культурала Министерстволи ва Дагъиста театртала хIяракатчибала Союзли илис бедибси, конкурслизив чедиикниличила буруси дипломли.
«Дагъиста театрла челябкьла» бикIуси конкурсли, миллатла театртала жагьилти гIяртистуни-ургаб, чули диахъубти сархибдешуназиб, бегIлара гIяхIтигъунти белгибирули бирар.
Сархибдешуни биалли ГIябдусамадла лер. Илди, дурхIнас хасдарибти драмабазир гьаладирхьути, чумал бекIлибиубти игитунала сипатуни сари ва Даргала театрла дукелцIила премьерала спектакльлизиб бекIливиубси игитла роль бузахъули, умсхIемсули дурадуркIути репетицияби сари.
Ишар гъай, сагали кабирхьуси, «Тамашала биргIябиргунала бархIи» бикIуси Ричард Бринсли Шериданна «Дуэнья» бикIуси пьесаличила сари. Илизир жагьил гIяртистли бекIливиубси игитла – Дон Антоньола роль бузахъули сай.
Испаниялантачи мешули спектакль кабирхьули сай Адыгея Республикала халкьла гIяртист Аслан Мугудинович Хакуйли.
«Цаси Россия» ВПП-ла, «БиштIаси ВатIа Культура» бикIуси сипта бетурхахъули, культурала Министерстволи жибарибти режиссёртани, илкьяйдали Даргала театрла режиссёртанира ГIябдусамадлизиб халаси пагьму хIясиббарили саби, ил багьандан спектакльтазир бекIлибиубти игитунала сипатуни акIахъес иличи хъардирули сари.
ХIякьикьатлизив театрлизив узес ГIябдусамад 2009-ибил дуслизив вехIихьибсири. Илала дудеш МяхIяммад ГIялиев жагьхIейчивад театрлизив узусири, илини урши мурталра сунечил варх викусири. ВиштIахIейчивад театр дигахъуси урши ДГУ-ла гIяртистунала факультетлизи учIес керхур. 2010-ибил дуслизив белчIуди хъараахъурли, ил цахIнавли театрла гIямрулизи ухIнавхъун.
15 дусла духIнар, декIар-декIарти спектакльтазир, 30 игитла роль устадешличил дузахъули сай. Илини, «Сагид», «Кахаберла тур», «Чаракла масхарала баркьудлуми», «Аршин мал алан», «Дигай дихьибти» бикIути спектакльтазир бекIлибиубти игитунала ролани дузахъутири. ХIербикIутани хъумхIертур: «Нешла уркIи», «Гулжанат», «Ханума», «Чонайла мекъ», «Синкала дурхIя», «КIел хужаимла къуллукъчи», «Магьар кабушни», «Адвокат Пьер Патлен», «Къагъси муэр», «ХIядурдикIухIели ит дуги дебкIес», «Зулму», «Дила Дагъистан», «Вайбаркьла гье» ва цархIилтира спектакльтазир дузахъути ролани.
Илала дебали жагаси тIама ва далайикIес пагьму леб, дебали саркъибси тIамаличил назмуртира дучIули сай, гьачамцун ахIи, илди пагьмурти Даргала театрла сценаличир, республикализир ва илала дурар дурадуркIути далдуцуназир чедаахъиб.
Арбякьунси дусла ноябрьличив, ГIябдусамад ГIялиев Даргала театрли сунела вакилван, Москвализиб ибхьуси, «Россия» бикIуси халкьани-ургабси мажлис-выставкаличи вархьибсири. ГIябдусамадли илар Дагъиста халкьла поэт Фазу ГIялиевала «ВатIан» бикIуси назму дарган мезли белчIунсири. Назму МяхIяммад ХIямидовли дарган мезличи шурбатурсири.
Гьалабван, илини халаси къиян кабихьиб «Сагид» бикIуси спектакльлизиб Сагид ГIябдуллаевла роль бузахъес. Спектакль Избербашлизиб ва МяхIячкъалализиб чебаахъибсири ва халкьли ахъли кьиматлабарибсири. Избербашлизиб спектакль чебаибси театрла критик Наталья Гъазиевани Москвализиб дурабулхъуси «Страстной бульвар, 10» бикIуси журналлизиб, «Нешла мез бегIлара халаси дурхъадешван» бикIуси белкIлизиб ГIябдусамад ГIялиевличила гIергъиси пикри белкIун: «Даргала хабарла гIялим Сагид ГIябдуллаевла, лебил даргантас дурхъаси адамла сипат сценаличиб акIахъни халаси сархибдеш саби, цазаманализиб халаси жавабкардешра саби… Илизиб гIялимла урхIмешуахIенси пагьмура, гIякьлурацун чехIедаахъили, илини чекасибти гIязабтира, паргъатагардешра, пикрумира, дардра чедаахъес гIягIнитири. ГIябдусамад ГIялиевли сунела гьала кабатурси масъала чедибдешличил таманбариб».
Чис-биалра гьанмабикаб нуни гьандушибти спектакльтала уми, гIядатла сияхI саби или. Илди сценаличир хIербикIутас гьаладирхьути бахъал игитунала ролани сари, бузрадли узути бурхIни сари, уркIиличир дагьес гIягIнити дугьби сари, дугьбира халкьли кьабулдаресли дурес гIягIнити сари. ГIяртистли сценаличи дуравхъи, сунечи хIербикIутала рухIлизир сагати хIялани акIахъес гIягIнити сари. Илгъуна масъала ГIябдусамадли гьамадли ирзули сай, хIербикIутала гьалаб, сценаличиб, ряхIятли сунела пагьму гьаргбирули сай.
Дагъиста театртала челябкьла жагьти, пагьмучебти ГIябдусамад ГIялиевгъунти гIяртистуназиб саби. Ил дилацун пикри ахIен, илкьяйда пикрибикIули саби театр чула санигIятли бетаахъурти, Культурала Министерстволизиб бузути, Дагъиста культурала хIяракатчиби. Гьамадли ахIенси бузерилис кадатурти ахъти кьиматунани, гIяртистунала бузери гIуррара гьалабяхI арку.
Маргарита Арсланбекова, ГI.Батирайла уличилси Даргала театрла жамигIятличил бархбас бузахъуси хIянчизар
