Дахадаевла районнизибадли гIяхIцад багьадурти саби гIяхIъулали ВатIайс къуллукъбарес арбашули саби. Командиртала хъарбаркьуни ламусличил тамандирули, илдани дакIудирути игитдешла баркьудлумачила районнизи дашути хабуртира камли ахIен. Отпускличи чула шимази бакIибхIели, илди школала дурхIначил, жагьилтачил гьунибиули бирар ва илдас патриот бяркъ бедлугнила шайчиб белгиси хIянчи дурабуркIу.
Ишди бурхIназив муниципалитетла руководитель МяхIяммад ГIябдулкьадиров КIишала шилизивадли сай гIяхIъулали улкала хъархIерагардеш батахъес арякьунси жагьил ургъан МяхIяммад МяхIяммадовличил гьуниваиб. Гьунибаъни хасбарибсири М.МяхIяммадовлис «Гъабзадеш багьандан» кIиибил даражала медаль беднилис. Ил шабагъатличи кIишан урши лайикьикибси сай, къуллукъбирухIели чедаахъибти гъабзадешла баркьудлуми багьандан.
МяхIяммад МяхIяммадов 23 дус сай виубси. Россияла Федерацияла оборонала Министерстволичил бигьунси вягIда (контракт) арбякьунси дуслизиб таманбиубсири. ИлхIейчивадли сай гIяхIъулали ВатIайс къуллукъбируси дубурлан уршили СВО-лизир жигарла бутIакьяндеш дирули сай ва ургъанна ахъси даражала бетуцуни чедиахъули, улкалис мардешличил къуллукъбирнила игитти баркьудлуми дурадуркIули сай.
МяхIяммад МяхIяммадов шабагъатлавирухIели МяхIяммад ГIябдулкьадировли багьахъур:
«МяхIяммад, нушала районна жагьилтас хIу гъабзадешла ва кабизалачевдешла мисалли ветаурлири. Нушала улкала хъархIерагардеш батахъес багьандан хIуни дакIудирути игитти баркьудлумани нуша лерилра уркIичердирахъулра. Нушала улкализиб даршудеш ва паргъатдеш диахъес багьандан бургъути хIугъунти жагьилти лебниличи нуни пахрубирулра. ХIела гIямрулизир арадеш ва къуллукъбирнилизир гьарбизуни диубли дигулра. Сархили чедибдешра жяв-жявли ара-сагъли хIела бегIтачи чарухъаби!»
Илала дурабадли, районна бекIли илис муниципалитетла администрацияла шайзибадли хъумхIертесил савгъатра бедиб.
Муниципалитетлис гьуни чебиахъусила гъай хIясибли, илдигъунти гьунибаънибани адамтачилти ВатIан балтахъантала бархбасуни чIумадирахъули сари. МяхIяммад МяхIяммадов шабагъатлаварнили дявила майдайчир нушала бургъантани гьар бархIи чедиахъути игитдешла баркьудлумас лайикьси кьимат бедлугнилис бикьридеш дирули сари.
Дахадаевла районна администрацияла пресс-служба
