Хайдакьла районна Мажалисла шилизир 1976 ибил дусла майла 23-личир акIубси Индира ГIямаровна БяхIяммаева гьанна 25 дусличирра имцIали багьудила бетуцлизир рузули сари. Ил Дахадаевла районна ХудуцIла шилизирадси сари. 5 дус гьалав илала мурул вебкIибсири ва авал дурхIя гьанна илини дудешла агри хIебагьахъурли абилкьули сари.
1998 ибил дусличирад ил Дербентлизир дурхIнала анхълизир ва 12 ибил школализир урус мезла учительли рузескариибсири. Илкьяйдали «Педагогика ва психология» ибси санигIят хIясибли хIунтIена дипломра касиб.
Индира ГIямаровна илкьяйдали рузусири ДГУ-лизир цахIнабси педагогикала кафедрализир халалгъуна лаборанткали. ИлхIели ил аспирантурализира карерхур. 2003-ибил дуслизир ил педагогикала гIилмуртала кандидат ретаур ва ил дусличирад ДГУ-ла цахIнабси ва социальная кафедрализир преподавательли рузули сари.
Илала гIяхIдешличибли кафедрала педагогуни гьар дуслизиб чула санигIятлашалти конкурсуначиб призерти бетарули саби.
Индира ГIямаровна конкурсунала бетуцлизир жигарчерси бутIакьянчира сари. Иличирли ил санигIятлашал гьаларяхI рашес имкантира алкIули сари. 2021 ибил дуслизир педагог «Науки юношей питают» ибси республикала конкурслизир призер ретаур. 2022 ибил дуслизиб илала методикала хIянчи регионна конкурсличиб гIяхIсигъунализи халбарибсири. ГIурра чуйнара ил конкурсуначир ва цархIилти бетуцуназир чедирикибсири ва барх бузути-ургар хIурматличил пайдаларикIусири. Ишдуслизирра ил «Нравственный подвиг учителя» ибси конкурсла регионна конкурсличир чедирикиб.
Индира ГIямаровна творческий адам сари. Ил мурталра сагати пикруми гьаладирхьули, умутличил гьаларяхI рашуси сари. Илини пикридарибти сагадешуни багьудила учреждениебазир пайдаладирулицунра ахIи, Дахадаевла районна педагогунас методикалашалси кумеклира детарули сари. И.БяхIяммаева багьудила бетуцлизир дирахъути сархибдешуни багьандан шабагъатларарибси сари ДР-ла багьудила Министерствола ХIурматла Грамоталичилра. Творчестволашал бузериличи гъамрирни ва конкурсуначир гьаларти мерани сархни багьандан ил ДГУ-ла ректорла шайзибад ХIурматла Грамоталичира лайикьрикибси сари.
Индира БяхIяммаевас музыкара дигахъу, акьуси замана тIабигIятла жагати мер-мусаличир бамсриихъесра рашар.
Къияндикибсилис кумек гIеббаахъесра къайгъилизир рирар. Илини бучIахъутас ил илкьяйдали гIяхIси мисалли ретаурли сари.
Мурад Алжанбеков
