ГIялиханова Аминат ГIябдулмажидовна акIубси сари 1936 ибил дусла августла 27-личир ДАССР-ла Лавашала районна МикIхIила шилизир. Илини 1953 ибил дуслизиб «шула» кьиматуначил шила школа таманбариб. Школализир ручIухIелил урус мезла ва литературала дурсрачи илала диги акIуб. Шила школализиб белчIуди хъараахъурли гIергъи, ил С.Стальскийла уличилси пединститутла (гьанна ДГУ) урус мезла отделениелизи карерхур.
Институтлизирра ил белчIудила гьабкьябала къяяназир рири, гIилмула далдуцуназир бутIакьяндеш дири. БелчIудила авалра дуслизир урус мезла ва литературала предметуни мурхьли дяркъур.
Аминатли, институт хъараахъурхIели, Министерствола комиссияли ил сари акIубси шила школализир рузахъес рархьиб. Илини дурсри дурхIнани аргъес гьамадси тяхIярли кадирхьи. Дурсрачир устадешличил чебаъла ваяхI пайдаладири, имцIаливан сунени далкьаахъурти.
МикIхIила школализиб хIябал дус хIянчи барили, Аминат ГIялиханова МяхIячкъалализи гечриуб ва «Дагъиста хьунул адам» журналла литературала хIянчизарли рузес рехIрихьиб. ИлхIели журналистикала санигIятличил тянишриуб. Аминатла белкIани 1961 ибил дусличирад дехIдихьили «Колхозла байрахъ», «Замана» газетабазир, «Гьалмагъдеш» «Литературала Дагъистан», «Халкьанала гьалмагъдеш», «Советский Дагъистан», «Кавказла гIеб-гIебагьни» ибти журналтазир дурадулхъутири. Илини прозализира халаси пай кабихьиб.
1995 ибил дусличирадли ил Россияла писательтала Союзла член сарри.
«Дагъиста хьунул адам» журналлизир рузули хьалли, А.ГIялихановала пикри сабри гIилмула хIянчизар ретаэс. Сунени чеббикIибси гIилмула кьяли мурхьбарес, тIинтIбарес ва чебицIахъес или ил М.Ломоносовла уличилси Москвала университетла аспирантурализи карерхур.
ЯхIчерси А.ГIялихановани 1966 ибил дуслизиб «Даргала лирикала жураби детаъни ва гьаладяхI дашни» бикIуси гIилмула хIянчи бетерхахъур. Аспирантура таманбарили, А.ГIялиханова 1966 ибил дусла сентябрьла 29-личир ХI.ЦIадасала уличилси мезла, литературала ва искусствола институтлизир гIилмула хIянчизарли рузес рехIрихьиб. 1976 ибил дусличирад рехIрихьили авал дус институтла гIилмула секретарьла къуллукъуни дузахъули калун. КIинайс ил Дагъиста литературала отделлизи шуррухъун. Пенсияличи аррукьяйчи ил отделлизир рузусири. Халати жавабкардешличил, сабурличил, черетаибдешличил баягъи институтлизир 52 дус рузули калун. Дагъиста РАН-ла ДФИЦ-ла руководство даим разили бири.
Ил манзиллизир Аминатли 30 гIилмула ва художественный жузи, гIяхIцад гIилмула хIянчурби делкIун. Аминат ГIябдулмажидовани сунела талихI литературала гIилмулизиб баргиб илини учительтас, студентунас, гIилмула хIянчизартас рухIла давла хIядурбариб.
А.ГIялиханова гIилмула ахтардлуми дурадеркIили, даргала пагьмучебти писательтас багъишладарибти дебали мягIничерти монографияби делкIун. Илкьяйда, А.ГIялихановани даргала халкьла пагьму бучес халаси хIянчи бариб, хаслира МикIхIила халкьла. Ахирра ил бучиб, илала жураби якьиндариб. Илини Кавказла, Средняя Азияла фольклорличил МикIхIила фольклорла бархбас лебнира кабизахъур.
Аминат ГIябдулмажидовнала хIялалси гIилмула бузери хIукуматли ахъли кьиматлабарибси саби. Ил дипломтачил, хIурматла грамотабачил, баркаллала кагъуртачил ва кьиматчерти савгъатуначил шабагъатларарибси сари. 1992 ибил дуслизиб илис ГIямарла Батирайла уличилси литературала премия бедиб.
Аминат ГIябдулмажидовна ГIялиханова «Советская энциклопедия» ибси издательствола гIилмула-редакцияла (1975), СССР-ла АН-ла Президиумтала ва РАН-на, СССР-ла АН-на Дагъиста филиалла ХIурматла Грамотабачил шабагъатларарибси сари. Илала гIилмула хIянчи Россияла жузала палатала баркаллала кагъарличи лайикьбикиб. 2004-ибил дуслизир илис ДР-ла Госсоветла шайзирадли дурхъаси савгъат ва у белкIунси сягIят дедиб.
ГIялиханова Аминат ГIябдулмажидовна ишди бурхIназир нушачирад даимдешлизи аррякьун. Илгъуна декIси бетахъриличил бархбасахъи, Дагъиста писательтала Союзла даргала секцияла ва «Замана» газетала хIянчизартала шайзибад илала хъалибарглизи ва гъамтази халаси децI балахъулра.
«Замана»-ла агьлу
