Гьалабван Дахадаевла районна бекI МяхIяммад ГIябдулкьадиров, Дахадаевлара Хайдакьлара районтала дявила комиссар ГIумар СягIидов, илди районтала дявила комиссариатла гIярмиялизи жибирнила (призывла) отделениела начальник МяхIяммад Пашаев ва Дахадаевла районна администрацияла хIянчизарти СВО-лизир бутIакьяндеш дирухIели вяхъибси Жамалудин Рабазановличи бякьун.

Кудагула шила советла бекI Жамалудин Рабазанов Россияла оборонала Министерстволичил сай гIяхIъулали вягIда бигьи, ахIерси ВатIа хъархIерагардеш датахъес арякьунсири. Дявила хъарбаркь таманбирухIели, кьяшлизивадли вяхъибси ургъан, гьанна реабилитацияличи хъули вархьили сай.

Нушала улкала халкьлис даршудеш ва паргъатдеш диахъес багьандан бургъес арбякьунти багьадурти гIеббурцнила баркьуди саби илкьяйдали районна администрацияла ва дявила комиссариатла вакилти ургъанничи гьаббакIни. Жамалудин Рабазановличилси гьунибаънила дазурбазиб МяхIяммад ГIябдулкьадировли илис гъабзадешла баркьуди дураберкIни багьандан уркIи-уркIилабадси баркалла багьахъур ва илдигъунти адамти нушала халкьла пахрули бетаурли саби или буриб.

ГIумар СягIидовли ва МяхIяммад Пашаевли бургъантас кумек гIеббиахъниличила ва арадеш къулайбарести баркьудлуми далдурцниличила, даршути гIямрулизиб бургъанти къулайти шуртIрачил гIеббуцес хIяжатли биъниличила гьанбушиб.

Нушала улкали ункъли гIеббурцули саби ВатIан балтахъанти. Илдигъунти гьунибаънибала кумекличил пачалихъла кабизунала ва жамигIятла ургарти бархбасуни чIумадирули сари.

Жамалудин Рабазановра илгъуна гьунибаънили уркIичеввиахъуб ва сай гIевурцнила баркьудилис баркалла багьахъур. Илини аргъиб ВатIан багьандан сунени дакIударибти гъабзадешлис ахъси кьимат бедни. Гьунибаънила ахирличиб гIяхIлани илис арадеш балгун.

Дахадаевла районна администрацияла пресс-служба