Россияла ДР-лизибси туснакъбарибти хIерудилиуб бихIуси Управлениела (УФСИН) саби техникалашал ва ярагъличил гIеббурцуси Центрлизиб баягъи кабизла жагьилти хIянчизартачил гьунибаъни бетерхур. Ил чула къуллукъ таманбирули алхунти хIянчизарти гьанбиркахънилис багъишлабарибсири.

Балбуцлизир бутIакьяндеш дариб учреждениела бургани, жагьилти хIянчизартани ва СВО-ла бутIакьянчи, Жуковла медаль сархибси младший сержант Шамил Рабазановли.

Учреждениела начальникла заместитель майор Керим Нуровли жагьилти хIянчизартази чула хъялис марли калунти гъубзначила буриб. Ил учреждениелизиб илдигъунти дебали бахъал саби ва илди кабизла хIянчизартала уркIбазиб даимлис кавлан.

Шамил Рабазановли цалабикибтази бетурхуси дявила хасси балбуцличила буриб. Илаб бургъути дагъистанлантачилара гьанбушиб. Илдани гьар бархIи чула жан ахIерахIедирули, ВатIан багьандан бургъули чула улка гъармукабазибад балтахъули саби. Жагьилти адамтази сегъуна-дигара аварализир, сегъуна анцIбукь кабикалра яхI, адамдеш детхIейхъахъес маслигIятбариб.

Марлира, гьарил баркьудилизиб, хIянчилизиб, чинаб-дигара адамдешличила, жавабкардешличила, мардешличила хъумартес асухIебирар. Дирхала бирхьехIе, ил учреждениелизи бузес бакIибти жагьилти специалистуни илдигъунтили бетарниличи.