ХIеб садаалли, ургуба азир рангла вавнала кьалтинни жагабирахъуси саби. Гьайгьайрагу, ца рангла вавнала халаличиб дахъал ранганала вавнала халара жагаси бирар. Пагьмуртачил давлачевси адамла хIурматра халаси бирар. Илдигъунти адамти-ургар халаси хIурматличил пайдаларикIуси машгьурси педагог сари Дахадаевла районна Хъярбукла урга даражала школала директор МяхIяммадкьадиева Жамиля ГIябдулкаримовнара.
Гьалавван бузерила архIяличил районнизи вакIибси Дагъистан Республикала багьудила ва гIилмула министр ЯхIъя Бучаевли ил гIибратчебси бузери багьандан шабагъатларариб. Районна педагогунани дурхIнас багьудлуми-бяркъ дедлугнила баркьуди гьалабяхI башахънилизир дирахъути чедибдешуни ва бучIанти гьар секIайчи ункъли хIядурбирнилизи илдани халаси пай кабирхьни багьандан шабагъатлабирнила баркьудира шадлихъла аги-хIяйзиб дураберкIиб.
Жамиля ГIябдулкаримовнала багьудила бетуцлизир рузнила халати устадешра лер. Илини Дагъиста пачалихъла университетла дурала мезанала факультет таманаибсири. ГIур халкьла хозяйствола институтлизибра (ДГУНХ) багьуди даимбариб. 2019 ибил дуслизиб ил багьудила заведениера, ункъли ручIули, хъараахъур ва лингвистла санигIятличи регIриуб. Илала дурабадлира, илис имканбакIиб кIел чеимцIати багьуди касесра: англияла мезла мугIяллимла ва управлениела руководительла. Илкьяйдали илис гьанна имканбикIули саби школализиб ункъли багьудила бетуцлис бекIдеш дирес.
ГIяхIцад дусмазир Жамиля ГIябдулкаримовнани сунела бузерилизир черяхIти баркьудлуми дурадуркIули сари. Илала илгъуна сабухъчебси бузерилис улкалира ахъси кьимат бедлугули саби. Илкьяйдали илис Дагъистан Республикала багьудила ва гIилмула Министерствола шайзибад шабагъат беднилира ил секIайс бикьридеш дирули сари. Амма, илис бегIлара халаси шабагъат саби бучIанталара илдала бегIталара уркIи-уркIилабадси баркалла.
Илини белчIудилизир пайдаладирути бетуцуни дурхIнас гьар шайчирадли чедетаахъибти багьудлуми дедлугнилис кумекли детарули сари. Илкьяйдали дурхIнала пикрибикIнила даража къулайбирули саби, сабицун бузес ва чула баркьудлумас лайикьти кьиматуни кадалтес бурсибирули саби.
Жамиля ГIябдулкаримовна школализирцун рузули паргъатли кариили ахIен. Илини жамигIятла гIямрулизирра мурталра жигарла бутIакьяндеш дирули сари ва декIар-декIарти организациябачил рарх рузули сари. Илдигъунти баркьудлумазибадли ца мисал саби ил дявила самбола Европала, дунъяла чемпионатуначир 2018 ибил дуслизир тилмажли рузули кални. Илгъуна баркьудили илала бузерила бетуц гьатIира давлачеббариб ва регионна спорт гьалабяхI башахънилизи илини белгиси пай кабихьиб.
ХIурматла Грамоталичил Жамиля ГIябдулкаримовна шабагъатларарни илала сабухъчебси бузерилис кьимат бедницун ахIен, сунечил барх бузути мугIяллимти, студентуни ва Дагъиста багьудила бетуцлизиб бузути педагогуни уркIичеббарнира саби. Илгъуна баркьудили чебиахъули саби чула ибкьси бузериличил чеалкIуси наслу гIибратчебси бяркъличи биркахънила ва илдас мурхьти багьудлуми дедлугнила бетуц гьалабяхI башахънила баркьудилизи мугIяллимтани белгиси пай кабирхьни.
Гьаннала гIергъира хъярбукан педагогли сунела бузери гьатIира жигарчеббирахъниличи вирхес вирар.
Дахадаевла районна администрацияла пресс-служба
